Pailimoni 1 - GODENA EPE ANGELE - Pena la wi angele

¹ Niri Polo Yesu Keriso mana dipula piri go ramayo wape pi. Ni pange na ame menda Dimodi saame Pailimoni nee saana andami pange saana mendaa para Keriso pupudengi noaema ali yango repara wape pipa.

² Mendaa ramayore ande Pailimoni nena anda para epa mombeaemende Keriso wenaali repara pange saana Keriso ainya Apia pange saana ali yango Akipasi ande endali ripinyi ali mandana ayande ali nimi repara wape pipa.

³ Naana Apa Gode pange Reali Yesu Keriso niipu laapome pumi pakama yarame komea ei pange kuma pi ei nimi para ginyae.

Pailimoni nipuna pu aloaya ei pange kone rulao-aya ei

⁴ Ame Pailimonio, neme naare raayo yainya pula ara Gode para nena bi loma ranae loayo.

⁵ Akepeandare neeme Godena wenaali raayo para pumi komoale eina pange, nena Reali Yesu para kone rulale einu pangoayo.

⁶ Saame Godena angele pangepandare nimi rapu komea para runaoma aepa. Naa Keriso rapu runaoma aemandare Godeme epe alenu gea. Neme yainya pi eiri go naana komea para runaoma aema eimiri naame one mone alenu andema einu raayosi Godeme epe rupa kone ma-sialia.

⁷ Ora nina amesio, neeme nena pu aloale eimiri ni para rana andapupe ma-pao-aya pange nina pu kana mandana ma-yari ao-aya. Neme pele aunumiri Godena wenaali raayona pu rana ma-pao-ale.

Onisimasi wala Pailimoni nipumi karu minyayanda konge lisaya ei

⁸ Go einayandare niri Keriso rapu runaoma ara saare ameayayandare ni yalame pange paala paalame na-kome neeme go au pape lo painyayandare mandana mana mana doa.

⁹ Go peapare neme nee pu ge ainyayandare neme nee mana mana na-lere pa nee kongeyala ara lalo. Ni Polo Yesu Kerisona alona ae ali ni ambia nipu rondona dipula piriyapare gole lalo.

¹⁰ Go einare Onisimasi nipumi da pea rupare neme kongeyado. Keriso ruparare nipuri na naki. Ni dipula anda para piriri nipuna Keriso apa ayo.

¹¹ Ambala ririna nipumiri neere waru na-rambameapare ambiare nipumi nee ni saa raida waru rambamida.

¹² Go einare neme nipu nee repara wala apo rapadondae. Gupumare nipu rapuri na pu pange na kone laapo raidipuna pula.

¹³ Neme Godena Epe Angele rondona go para dipula piri Onisimasi pa karu siamba pidua, kone sialo. Akepeare nipumi nena alona piri ni rambaminya loma lawa.

¹⁴ Go peapare neeme ni rambamea loma nee mana mana na-dapepare neeme nena koneme pula kone wilindare gore nena rana pi eina komea papeae. Go einare neme ale menda na-pula pepare neeme ee denda komea pula.

¹⁵ Mendare nee rapu werepenu pange pa ao-ainyayandare Onisimasiri nee pa ongepusimi komea nee minyapalaripande.

¹⁶ Gupuma ambia nipuri pakama pupudengi nada ali komea diayapare ambiare go ei pange wanduaya. Nipuri Keriso rapu runaoma arare ambiare nena amesi aya. Neeme nipu minyapalape-na-ya. Gupumare nipu nena pakama pupudengi nada aliyandepare ambiare Reali rapu runaoma arare nena ameyandare ambiare nipu ora neeme minyapalape-na-ya.

¹⁷ Go einare ni nena andami ali kone wilindare gore ni anda mula pele rupa nipu andameapeae.

¹⁸ Mo nakimi nee para koae aunu menda pu o rundunu menda mu piliandare gore neme wamu pulale ni para la giape.

¹⁹ Na kimi gole go wape pulu ara lalondae. Ni Polome Onisimasimi nee repara mea kanana yangiri neme anana gulae, loma wape piae. Neme nee Keriso ruparare neme karu epawande eimiri neme nee rundu ma-ayopare neme go ei pepe na-doa.

²⁰ Go einare Reali yalalome neeme ni rambameainyayanda lora piae. Gupuma Keriso rapu runaomare niri nena ameyale nina pu rana ma-pae.

²¹ Neme go ramayo nee repara rapada ara kone sialopare neme kongeyalo ale anana pali kone sialo. Gupuma na lalo rupare ora lombai paoma pali, kone sialo.

²² Gupumare mendaa naarenare ni epa alape anda panda menda ambe wamo puma siape. Akepeare neme kone sialopare Godeme nimina puaeme yainya pangoma ni wala nimi repara ma-gilia kone sialo.

Werepena yarae angele lisaya ei

²³ Epaperaisi Yesu Keriso rondona ni rapu dipula piri nimi repara paidapape dae.

²⁴ Gupuma nina mendaa pupudengi nema yangonu Maka, Arisidakasi, Dimasi pange Luka nimumi pange paliape dame.

²⁵ Reali Yesu Kerisona pakama yarame komea ei nimi rapu winyae.