Maka 1 - GODENA EPE ANGELE - Pena la wi angele

Dioni Baparaisi alina angele waloaisaya ei

¹ Gode nipuna Naki Yesu Keriso nipuna epe angele kini pu mea ei go ei.

² Godeme poropedi ali Aisayame gurupa wape pisaya. Gode nipumi lalore, Andalepae. Neere ambe na-epe-ainyalomare ambala ririna neme na angelenu ma-epenayandare ali menda rapalua, lisaya. Ririnare nipumi nena pora pialia, loma lea lisaya.

³ Mendame wenaalinu na-ao-palia lena ara gurupa wi lisaya. Realina pora epealepae, lisaya. Nipuna pora rendepoyao epealepae loma wi lisaya.

⁴ Baparaisi pao-aisaya ali komea Dionimi mo wenaalinu na-ao-palia lena epa ara angele waloaisaya. Godeme wenaalinuna koae einu pisimiya einu rambuainyayanda Dionimi wenaalinu para lalore, Nimina koae koae einu raayo gioma epe kone menda perekeyao wilimindare baparaisi au palua, loaisaya.

⁵ Diudia andasu para aisimiya wenaali raayo pange mo Diurusaleme ree anda para aisimiya wenaali raayo, nipu para puala pisimiya. Gupuma mo Diodani ipa para mo wenaalinumi nimuna koae koae au pisimiya einu kepeala pisimiyandare nipumi baparaisi pala pisaya.

⁶ Mo ali Dionimi gamelo menana iri yongaleme akame warisaya ei pambaoma akore aari yongale ako warisaya ei yamisaya. Gupuma nipuna noaisaya endare komboro pange alumbi kapa noaisaya.

⁷ Angele walala ara gurupa loaisaya. Na kou nane epelea aliri, neme ande ali na-epelea, lisaya. Nipuri ora andaa ali epelea, lisaya. Neme andainyao, nipuna ange anda ridipea kope ambuna neme kepeape ana na-pea, lisaya.

⁸ Nemere ipa kamame nimi baparaisi au paripupare nipumiri Epe Yaakopi Sipiridimi baparaisi au paliae, lisaya.

Dionimi Yesu baparaisi au paisaya ei

⁹ Go dinare Yesu Galili andasu nane aoma Nasarere ree anda minyapalaoma Diodani ipa para paisaya. Go ipa para Dionimi Yesu baparaisi paisaya.

¹⁰ Gupuma go gole Yesumi ipa minyapalaoma ree nane popisaya. Go dinare so yaa wapeminyamboma mo Epe Yaakopi Sipiridi yaa malipu mandana kolopelisaya ei, andisaya.

¹¹ Gupuma so yaa nane ara angele gurupa lainyaisaya. Neere ora nina raname ora waru komea Nakiae, lisaya. Gupuma nina pumi nee para raname waru komaloae, lisaya.

¹² Go gole mo Epe Yaakopi Sipiridimi Yesu mo wenaalinu na-ao-paluaisimiya lena, Yesu penayanda rapaisaya.

¹³ Gupuma naare ali ria laapo Yesu go para ainya Sadanimi koae kone ma-sialuame ipisaya. Yari sayale aisimiya lena paluma aisaya. Go para ainya eindiolo alinumi Yesu andere-aisimiya.

Yesumi repali muaisimiya ali malapu wi lisaya ei

¹⁴ Dioni dipula pirisaya dinare, Yesumi mo Galili nane pumare Gode nipuna epe angele walala pisaya.

¹⁵ Gurupa loaisaya. Ambiare Gode nipuna naareae, loaisaya. Ambia go Godena Ki Rambuao-aya Ei rana mena epelea, loaisaya. Nimina koae koae einu raayo gioma kone menda perekeminyu sumare go epe angele mealepapeae, loaisaya.

¹⁶ Gupuma Yesumi mo Galili nane wi ipa lee reena pupula ara Saimono Anduru ameayame, angona andaai mo ipa para ma-lopada-ainya andisaya. Niipuri repali muaisipiya ali laapo aisipiya.

¹⁷ Yesumi niipu laapo para lalore, Na kou nane raidapae, lisaya. Niipiri alinu mula pepe ali laapo ma-alua, lisaya.

¹⁸ Go gole niipu laapona angona nunuri minyapaoma Yesuna kou nane ralisipiya.

¹⁹ Yesumi ongesinda mo parelele pu pumare Dieimusi Dioni ameaya Sepedi nipuna naki laapo nipuna kawaso andaaina piri, angona nu rambulala pirisipiya lena andisaya.

²⁰ Andoma Yesumi Ipulupae loma wi lisaya. Go gole niipu laapona apa Sepedi pange pupudengi nao-aisimiya alinu mo kawaso andaaina pirinya minyapaoma Yesuna kou nane ralisipiya.

Yesumi ali mendana koae remo ralu lisaya ei

²¹ Gupuma Kapeneame ree anda para paisimiya. Go gole mo Isaraelimi mandu rangala pae wenaalinuna koro piruaisimiya naarena Yesumi mo Isaraelimi mandu rangala pae wenaalinuna Godena angele kuruaeme anda para konda pamboma angele walisaya.

²² Mo wenaalinumi Yesumi walisaya angele pangomare lee opoma andae wisimiya. Nipuri bi wi alimi wada rupa walisayanda pisimiya. Mo Mosesimi Rudule Angele waloae alinumi waloaisimiya rupa, na-walisaya.

²³ Go dinare mo Isaraelimi mandu rangala pae wenaalinuna Godena angele kuruaeme anda para koae remo piri ali menda epa aisaya.

²⁴ Epa arare mo alimi gurupa wi loma lalore, Yesuo, Nasarere ree anda aliae, naa para ake au pulame ipuma pilipae, lisaya. Nee epe eiri naa raayo ma-koyaluame ipuma papae, lisaya. Neere ni kone wi, lisaya. Neere Gode nipuna yaakopi aliae, lisaya.

²⁵ Go lisayapare Yesumi mo koae remo para angele rendaa pimi mana lala ara lalore, Angele na-le. Go ali gioma opalumba pupu, lisaya.

²⁶ Go lisaya dina mo koae remome e lapale, mo ali ma-puru-puru liioma opalumba popisaya.

²⁷ Gupuma wenaali raayome rungula mealo pambisimiya. Go eina nimuna nimuna lora lora pula ara lalore, Gore ake aupae, lisimiya. Pena au wadapae, lisimiya. Bi wi alimi da rupa nipumi mo koae remonu para mana angele loaliandare nipuna angele rungulape-na-ya, lisimiya.

²⁸ Go loma go gole mo Galili andasu raayo para Yesuna bi kende wisaya.

Yesumi wenaali andapu ma-epeaisaya ei

²⁹ Gupuma go gole Yesuri mo Isaraelimi mandu rangala pae wenaalinuna Godena angele kuruaeme anda minyapalaoma Dieimusi Dioni laapo mo Saimono Anduru laapona anda para puma konda pambisimiya.

³⁰ Mo anda para Saimono nipuna werena angi riripu yainya koma pa wisaya. Yesu mo anda rupara konda pambala-ainya nimumi mo wenana yainya aisaya rupa la alisimiya.

³¹ Gore Yesu ipuma nipuna ki minyu muma ma-rekaisaya. Gupisayanda mo riripu yainya ma-pereyaisayanda puri paloma ara mo wename mo alinuna enda kiraoma alisaya.

³² Go dina gaepame nane naare pena pambala-ainya yainya koma pa wisimiya wenaalinu pange lo para koae remo piri wenaalinu raayo Yesu para karu ipisimiya.

³³ Mo ree anda wenaalinu raayo Yesu aisaya anda pora gape para epa pamboaisimiya.

³⁴ Gupuma yainya rando rando aisimiya wenaali andapu Yesumi ma-epeaisaya pange wenaalinuna lo rupara piri koae remonu waru ralu lu pisaya. Mo remonumi Yesu nipu kone wisimiyanda Yesumi mo remonuna angele na-lena, lisaya.

Yesumi Galili andasu para Godena angele walisaya ei

³⁵ Wala yapi ambe na-lea-ainya Yesu mo anda minyapaoma wenaali angele na-lisimiya para rekoma puma go lena Gode para yainya pisaya.

^36-37 Gore Saimono pange nipu rapu aisimiya alinu Yesuna ange raluma puma andasumare nipu para lalore, Wenaali raayome nee aisa pimiae, lisimiya.

³⁸ Yesumi nimu para lalore, Anda menda menda paranu angele walo punu balepae, lisaya. Go epe angelenu walo pulame epawa, lisaya.

³⁹ Gupuma mo Galili andasu raayo para mo Isaraelimi mandu rangala pae wenaalinuna Godena angele kuruaeme andanu para angele walama walama pu pange koae remonu ralu liama liama pu paisaya.

Yesumi kindi yainya komisaya ali ma-epeaisaya ei

⁴⁰ Go dina kindi yainya komisaya ali komeame Yesu para kongeyala ara rumu yaruao piruma nipu para lalore, Nena rana pilindare nina go yainya ma-epea loma konge lisaya.

⁴¹ Yesumi nipuna pumi ree lisayandare nipuna ki rindapeao moneyaoma warada ara nipu para lalore, Nee yarapeanda go ma-epeadondae, lisaya.

⁴² Go gole mo kindi yainya perelisaya. Gore mo aliri yainya na-ae ali mandana aisaya.

^43-44 Gupuma Yesumi mo ali para angele rendaa pimi lalore, Wenaali menda para angele na-lape loma lalore, Mo Gode repara alinau puaeme alimi nena do andena puae, lisaya. Gupuma wenaalimi nena kindi yainya perelealo andena, ande Mosesimi pape lisayande rupa Gode para alinau pape, lisaya. Go angele loma rapaisaya.

⁴⁵ Go loma rapaisayapare gole mo wenaalinu para la eiri pamisayanda go eina Yesumi wenaalinumi andena rupa ree anda paranu na-pamisaya. Go eina wenaalinu waru na-ae paranu ari pamisayapare anda menda menda wenaalinu waru andapu nipu para ipisimiya.