Dioni 1 - GODENA EPE ANGELE - Pena la wi angele

Endoae Angeleme gole ali aulisaya ei

¹ Ambala ririna go su yaa laapo ambe na-waruma winyale dinare monde Angele ao-aisaya. Nipuri Gode rapu ao-aisayapare nipu pange Gode gole ao-aisaya.

² Angelere ambala ririna Gode rapu ao-aisaya.

³ Godeme lisaya ei pangoma monde Angelemere alenda alenda raayo warisaya. Alenda mendasinda pange Godeme nipuna kunuma ara na-warisayapare Angele raisamba ara warisaya.

⁴ Monde Angele ruparare endoaya eina ree kini pisaya. Gupuma mo endoaya eimi su wenaalina paa pi ei ma-epea.

⁵ Monde paa pi eimi rimbalea para paa pa puaya. Go peapare rimbalea eimi mo paa na-kundinao-aya.

⁶ Godeme nipuna angele ma-epenayanda rapaisaya aliri Dioni rapaisaya.

⁷ Gupuma Dionimiri monde Paa pi ei wenaali wadoame ipisaya. Gupuma wenaali raayome nipumi ma-ipisaya angele pangoma angele minyayanda doame ipisaya.

⁸ Dioni nipuri monde Paa pi ei diayapare nipumiri monde Paa pi ei wenaali para wadoame ipisaya.

⁹ Su raayo para ipumare wenaali raayo para paa pao-aya. Go eiri ora Paae.

¹⁰ Gupuma monde Angelemere suna ipuma aisaya. Godeme lisaya ei pangoma su alenda alenda raayo nipumi warisayapare su wenaalimiri nipu kone na-wisimiya.

¹¹ Nipuri nipuna andasu nane ipisayapare nipuna anda wenaalimiri nipu na-lamu misimiya.

¹² Gupisimiyapare mendane wenaalimiri nipu lamu muma nipu para kone rulao ala pisimiya. Gupisimiyandare go wenaaliri Godena naki nongonu ainya lisaya.

¹³ Godena nongo naki ala epe auri suna wenaalinumi nongo naki mandu widame rupa mandu winyaloma na-ala ipisimiya. Nipuna Apare Gode gole ao-aya.

¹⁴ Monde Angelere ali auloma naa rapu epa aisaya. Nipuna ora yaakopi epe bi wi aunu andama. Nipuna ora au pange nipuna yarame kome ei andama. Nipuri Gode nipuna loma komea Naki loma Apa Godeme ale epe yaakopi bi wi aunu naa para walande.

¹⁵ Dioni Baparaisi alimi Yesu epea ei naa para gurupa la gea. Wi loma lalore, Neme ambalande loaripunde eiri gupae. Ni Godena angele lao-ayo ali lo Godeme ni ambala penameyao ririna walena loma go aliri na kou nane werepe epea. Go peapare go aliri ni ambe na-maindi ainya nipuri naare raayo pa ao-aisaya. Go pea eimi ni angulaya loaripunde aliri ambia go ali para loaripunde, lisaya.

¹⁶ Nipuna pakama yarame kome ei rumbiaya ei muma naa para ma-giala pumare naa raayo para pa guaya.

¹⁷ Godemere nipuna Rudule Angele wi einu naa para la ginyaya Mosesi para la alisaya. Gupisayapare yarame kome ei pange ora au pia ei pange Yesu Kerisome ma-ipisaya.

¹⁸ Suna ali komea mendame Gode ora na-andea. Go peapare ali komea Gode gole ao-aya ali, Apana popeke ki nane pia ali nipu komeame naa para Gode walea.

Dioni Baparaisi alimi angele walisaya ei

¹⁹ Diurusaleme ree anda para aisimiya Isaraelimi mandu rangala pae wenaalinuna kalu alinumi Dioni para Gode repara alinau puaisimiya alinu menda pange Lipai anda ruru alinu rapaisimiya. Go alinu rapa eiri Dioni neere apiyapae lo lora pinyaya, rapaisimiya.

²⁰ Dionimiri nimuna angele pangoma menda kundiri na-pi, yango liada ara ora kepe rumboma lalore, Niri Keriso diae, lisaya.

²¹ Go lisayanda mo alinumi nipu lora pula ara lalore, Gore neere apiyapae. Neere Ilaidiayapae, lisimiya. Dionimi nimuna angele yango liada ara lalore, Niri Ilaidia diae, lisaya. Nimumi wala lalore, Neere monde Godena poropedi aliyapae, lo lora pisimiya. Nipumi yango liada ara lalore, Ni dia, lisaya.

²² Monde alinumi Dioni para lalore, Neeme de ei naa rapaeme alinu para ora la eiri popeyale, neere Ni ora go ali ayo lo la giae, lisimiya. Neere ora apiyapae, lisimiya.

²³ Dionimi nimuna angele yango liada ara lalore, Go ali ayo, lisaya. Ande Godena poropedi ali Aisayame lea ali ayo. Aisaya nipumi gurupa lea. Wenaali na-ao-palia lena ara wi loma Realina pora epealepape lalo ali ni ayo, lisaya.

²⁴ Mo angele lora pula penaya rapaisimiya alinuri, Parisi alinumi rapaisimiya.

²⁵ Mo alinumi Dioni angaa meala ara lalore, Neere Keriso pange Ilaidia pange monde Godena poropedi ali diayapare akepeanda wenaali baparaisi pao-alepae, lisimiya.

²⁶ Dionimi nimuna angele yango liada ara lalore, Nemere ipame wenaali baparaisi pao-ayopare nimi rupara aya ali menda nimimi na-andeleme, lisaya.

²⁷ Go aliri na kou nane ipulapare nipuna ange anda ridipea kope ambuna neme kepeape ana na-pea, lisaya.

²⁸ Go aunuri Bedani anda para pisimiya. Bedani andare Diodani ipa repale nane naare opala naneyame, Dionimi wenaali raayo go para baparaisi au pao-aisaya.

Godena Sipisipi Menasi go ei

²⁹ Yapi lisayandare Dionimi nipu para Yesu ipisaya ei andoma lalore, Gode nipuna Sipisipi Menasi go ipulale andalepae, lisaya. Su wenaali raayona koae au peme einu nipumi kunao-aya.

³⁰ Neme ambalande loaripunde eiri gupae. Ni Godena angele lao-ayo ali lo Godeme ni ambala penameyao ririna walena lama go aliri na kou nane werepe epea. Go peapare go aliri ni ambe na-mandi-ainya nipuri naare raayo pa ao-aisaya. Go pea eimi ni angulaya loaripunde aliri ambiare go ali para loaripunde, lisaya.

³¹ Ande ali api aliapae loma kone na-siawapare nimi Isaraeli wenaali raayo para wadoame ipame wenaali baparaisi pala epawa, lisaya.

³² Dionimi angele lala ara lalore, Go angele lisaya. Monde Epe Yaakopi Sipiridi Godena Aya Lena aoma yaa malipu mandana kolopinyaoma Yesuna dona epa pira ei andawa, lisaya.

³³ Go dina neme mo ali go ali lo kone na-siawa. Go pawapare ande ipame wenaali para baparaisi pua pa lama ni raparipa Godeme gurupa la ei kone siawa. Monde Epe Yaakopi Sipiridi kolopinyao epa ali menda para pidia ei andelendare go alimiri Epe Yaakopi Sipiridimi wenaali baparaisi pao-ala pilia la ei kone siawa, lisaya.

³⁴ Dionimi lalore, Go eiri neme ora andawae, lisaya. Go eina nipuri Godena Naki aya eiri neme nimi para la gialoae, lisaya.

Yesumi ali malapu nipuna kou nane raluainyayanda ririna misaya ei

^35-36 Wala yapi kepea nane Dioni nipuna kou nane raluaisipiya ali laapo rapu ara Yesu popisaya ei andala ara lalore, Godena Sipisipi Menasi go pupulandae, andalepae, lisaya.

³⁷ Monde kou nane raluaisipiya ali laapome go lisaya angele pangomare Yesu raluma paisipiya.

³⁸ Yesu perekeyoma niipu raluma ipisipiya ei andoma nipu laapo para lora pula ara lalore, Ale waidapepae, lisaya. Niipu laapome nipuna angele yango liada ara lalore, Rabai, neere a para ao-alepae, lisipiya. (Go Rabai da eiri Waloae Alio loma lea.)

³⁹ Yesumi niipu laapona angele yango liada ara lalore, Epa andalepae, lisaya. Go einare nipuna aisaya lena andola pumare go dina niipu laapore Yesu rapu angele lo pirisimiya. Go au pisimiya eiri naare pambala-ainya pisimiya.

⁴⁰ Monde ali laapore Dionimi lisaya angele pangoma Yesu rapu ala paisipiya ali mendare Saimono Pidana ame Anduru aisaya.

⁴¹ Go gole Andurumi nipuna ame Saimono andasuma nipu para lalore, Ande Mesayare saame andasiapae, lisaya. (Go Mesaya lea eiri Keriso para lea.)

⁴² Go angele loma nipumi Yesu para Saimono karu paisaya. Yesumi Saimono andoma lalore, Neere Dionana naki Saimonoae. Werepe nena bi Sipasi demeae, lisaya. (Sipasi Pida mandana. Pidare kana bi mandana ma-aeme.)

Yesumi Pilipi Nadaniele laapo wi lisaya ei

⁴³ Yapi lisayandare Yesuri Galili nane polae kone wisaya. Nipumi Pilipi andasuma nipu para lalore, Saana bana ipuae, lisaya.

⁴⁴ (Pilipiri Bedesaida ree anda aliae. Anduru Pida laapo pange Bedesaida ree anda ali laapo aisipiya.)

⁴⁵ Go eina Pilipimi Nadaniele andasuma nipu para lalore, Ande Mosesimi mo Rudule Angelenu wape pula ara wape pea ali pange mo Godena poropedi alinumi wape peme ali andasuma nipuri Nasarere ree anda ali Diosepana naki Yesuae, lisaya.

⁴⁶ Go angele lisaya ei Nadanieleme pangoma lalore, Nasarere ree anda para epe au menda rekelea loma lalepae, lisaya. Go angele lisayanda Pilipimi lalore, Epeleale, epa anda, lisaya.

⁴⁷ Yesumiri Nadaniele nipu andola ipisaya ei andoma lalore, Andalepae. Gore ora Isaraeli aliae, lisaya. Nipumi ora nipuna kone para wi angele loaya. Nipu kone menda sia ara angele menda wala pa ei na-loaya, lisaya.

⁴⁸ Nadanieleme Yesu para opapala ipuma lora pula ara lalore, Neeme niri akipuma andasuma lalepae, lisaya. Yesumi nipuna angele yango liada ara lalore, Pilipimi nee ambe na-wi lee ainya monde poke repana ree para pira ainya, neme ambala andawande, lisaya.

⁴⁹ Nadanieleme nipuna angele yango liada ara lalore, Waloale Alio, neere Godena Nakiae, neere Isaraelimi mandu rangala pae wenaalina Kini Ali ale, lisaya.

⁵⁰ Yesumi lalore, Neme neere poke repana ree para pira ei andawande lalo eina pa ambia go kone rulada ara lalepae, lisaya. Gupi ausinu angulala peme au andaa einu pula pea einu andele, lisaya.

⁵¹ Yesumi nimu para Ialore, Neme nimi para ora angele laloae, lisaya. Godena Aya Lena lombeleanda andeleme, lisaya. Godena Aya Lena gurupa lombapa wilia lena, Godena eindiolonu Alina Si Nakina Godena Aya Lena puala, su nane epala puala pilimi ei andeleme, lisaya.