Daidasi 1 - GODENA EPE ANGELE - Pena la wi angele

¹ Niri Polome Godena pupudengi nada ali ara pange Yesu Kerisona aposolo ali ara go ramayo wape pie. Niri Godeme muma yarepe mea wenaalina kone rulaeme ei puri ma-palanoya ma-maya. Gupuma pange nimumi ora angelena ree pango pange Godena aunu walanoya ni raparipa.

² Go ei laapore mo endoaya eina pa airi pope ei masumba aya eina ruladema. Mo pereke pereke angele na-loaya Godeme ambala mo alenda alenda raayo ambe na-wari ara gole go endoaya eiri naa para kone siala ara angele la waisaya.

³ Gupuma nipuna di wia naarena nipuna angeleme penameyao walea. Go eiri Gode naa rambamuaya alimi neme walanoyanda na ki nane sianeleya.

⁴ Go einare go ramayore mo Daidasi nee para wape puma rapadoe. Mo saana kone ruladepa eiri komea eiyandare neere na nakie. Mo Apa aya Godeme pange mo naa rambamuaya Keriso Yesumi pange nee para yarame komoma rambamida ei para kuma pi ei laapo ginyaya laloe.

Keriso wenaalinu kalu alinuna mana angele go ei

⁵ Neme nee apo Kiridi anda para pa-ainya epawande eiri ande mendapare ale ambe na-wamo pi alenu wamo painyayanda pa ainya lawande. Gupuma neeme anda raayosi para Keriso wenaalinu andere-ala peme kalu alinu ma-ainyayanda pawande.

⁶ Go kalu ali mula pele ali nipuri wena komeana ali alia pange nipuri wenaalina lee ronare rondo menda na-ae ali alia. Nipuna naki nongonuri angele mi repaa alimi pange ara anginuna angele pangoaeme nongo nakinu ao pilimi.

⁷ Nee kone wili. Keriso wenaali andere-aya aliri Godena pupudengi andere-aya ali aya. Go einayandare nipu ora rendepona pamilia pange wenaalimi nipu repara rondo menda wia ei na-andeleme. Gupuma nipumi rendaa rendaa na-pu pange amo alenuna wee na-pambao pu pinyalape pange rono rono rana komea na-pango pange nipu andaa ali ayo kone suaya ali na-meape. Gupumare nipu koae ipa na-no pinyalape.

⁸ Nipuna anda para kimisu wenaali pambolo opolo puainya aya ali pange epe au pi eiri raname komoma kone waru wida ali alia. Gupuma nipuna kone para gole anana aya ali pange rendepona aya ali pange yaakopi ali pange nipumi papeya au komea pualia.

⁹ Gupuma nipumi ande ora epe angelere ora ei loma ande ambalande walamende rupa irulaoma ripinilia. Gupilia eimiri mendane wenaali para ora rupa walala ara rambameapeyae. Gupuma pange monde ora rupa wada angelenuri kondo lia lia pi rupa wadame wenaali ma-rendepoyada ali alia.

Makirae alinu aisimiya ei

¹⁰ Alinu andapumi ora angele giada ara mo nimuna pakama angelenumi mendane wenaali makirao-aeme. Gupi angele loaeme alinu mendapare mo Isaraelimi mandu rangala pae wenaalimi loaeme.

¹¹ Go einare go angelenuri ambe sese pape. Akepeare nimumi repaa raayo nimumi na-walape aunu waloma koae konenu ma-siademe. Go einuri yalapi rupa muni mulameya puaeme.

¹² Ambalande Kiridi ali menda olemole waru andoaya alimi gupi lisaya. Kiridi alinu nimuri naare raayo pereke pereke angele kama loaeme lisaya. Gupuma nimuri koae sayaleme andoma ara lo pambo piraoma ara enda waru noma gimi komea alinu ao-aeme lisaya.

¹³ Go angelere ora angeleyandare mo Keriso wenaalina kone rulademe ei puri palena neeme puri paloma pa-au pimi lo waru angeleme lainyae.

¹⁴ Nimumi mo Diu wenaalinuna ree na-wi angele na-pangenalape pange mo ora angelena ree repara kou waloaeme alinuna rudule angele na-pangenalape.

¹⁵ Lopunu yaakopi repaa aeme repaa reparare enda menda na-nape einda menda dia. Go peapare lopunu kodo puma Keriso repara kone na-wimi repaa reparare epe ale menda na-wia. Lopunu raayo kodo ambala pea.

¹⁶ Nimuna angaa kambulu komeame lalore Naare Gode kone wima loaeme. Go lemepare nimuna pamu aleme poramere Gode kou waleme. Gurupa alinuri Godena angele na-pangeme einayalore Godeme raname na-kome nimumiri ora epe aunu menda na-pilimi.