Aposolo 1 - GODENA EPE ANGELE - Pena la wi angele

Yesumi lalore, Neme Epe Yaakopi Sipiridi rapalua, lisaya ei

¹ Diopilasio, nemere ririna buka wape pawande eina Yesumi pena para nipuna pupudengi nisaya ei kini pa pua nipu Epeni nane ambe na-pe ara pi ei pange walala pi ei pange raayo wape pawa.

² Nipu yaa nane ambe na-pe ara ande nipuna kou nane raluae alinu para mana angele la alisaya. Go angele lisaya eiri ande Epe Yaakopi Sipiridimi puri alala-ainya lisaya.

³ Yesu nipu komoma wala endoma naarele ali ria laapo suna aisaya. Go naare rupara ara Yesu nipuna angele ma-puao-aeme alinu para Yesu nipu wala rekoma ayo lo waru andenaya penameyao naare raayo waloaisaya. Nipuna angele ma-puao-aeme alinumi nipu waru andena rupa ara Godena Ki Rambuao-aya Ei angele la alisaya.

⁴ Yesuri wala mo alinu rapu aisaya dinare mo alinu para lalore, Diurusaleme ree anda na-gialepape, lisaya. Pa maisamba ara na Apame ande pa gilia lawande ale gilia ei maisamba alepape, lisaya.

⁵ Gupuma Dionimiri pa ipa kamame baparaisi paripandepare ongesinda aomare Godeme Epe Yaakopi Sipiridimi nimi baparaisi palia lawa eiri ambala pangamende, lisaya.

Yesu Epeni nane wala paisaya ei

⁶ Ande nipuna kou nane raluaisimiya alinumi Yesu rapu mendaa para mombelisimiya dinare nipu para gurupa lora pisimiya. Realio, ande Ki Rambuao-aya andasuri ambia Isaraeli wenaalimi andere pirinya deapae, lisimiya.

⁷ Yesumi mo alinu para angele yango liada ara lalore, Nimimiri go naarena go ei pilia, loma pange go eina gupilia, loma pangola peme eiri nimina ei dia, lisaya. Go eiri na Apame nipuna kunumame pula pea eiye, lisaya.

⁸ Go peapare mo Epe Yaakopi Sipiridi ipuma nipumi nimi puri pale ei epa giliandare nimi puri pademe. Gupiliandare nimiri na angele la aloae alinu Diurusaleme ree anda para pange Diudia andasu raayo para pange Sameria andasu para pange ama ama puma su kuni paranu pange puma la ademeae, lisaya.

⁹ Go angele la alomare nimu pa andere-ainya Yesu yaa nane Godeme ma-paisaya. Pa pulu pula-ainya andere-aisimiyapare koame epa kea punyaisaya.

^10-11 Yesu paisayanda mo alinumi so yaa para so pulandae, loma waru andae wisimiya. Go gole ali laapo kake pi aka yamoma epa ao lapaoma ara niipu laapome mo alinu para lalore, Galili andasu alinuo, gopare ara yaa para akepeanda andasiao aemepae, lisipiya. Go nimi minyapaoma yaa nane pula Yesuri wala epelea. Wala epelea dinare ambia go yaa nane puanda andamende rupa wala gurupa epeleanda andeleme, lisipiya.

Ali mendame Diudasimi nisaya pupudengi misaya ei

¹² Gupuma Diurusaleme ree anda repara kana menda bi Olipi para aoma Diurusaleme ree anda nane wala perekeya paisimiya.

¹³ Mo Diurusaleme ree anda para pumare nimuna palia ao-aisimiya anda panda mandaa nane opasiaisimiya. Pida Dioni laapo, Dieimusi Anduru laapo, Pilipi Domasi laapo, Badolomiu Madiu laapo, Alipiasina si Dieimusi pange Saimono Selode pange Dieimusina si Diudasi pange aisimiya.

¹⁴ Go alinu raayome nimuna kunuma mombea piri wenanu pange Yesuna ama Meari pange Yesuna amenu pange mendaa para mombea piri, yainya pulandere puaisimiya.

¹⁵ Yapi reponda aomare Keriso wenaali ali ria su mindipu mombelisimiya. Gupisimiya para Pida nipumi angele doame rekisaya.

¹⁶ Angele loma lalore, Na ame ainyanuo, Epe Yaakopi Sipiridina ora meape angelenu Godena angele wia buka rupara Deipidimi la wisayande angelenu ora meande. Diudasi nipumi Yesu pa ripinyape alinu karu pola pisaya einu la wi ei ora meande, lisaya.

¹⁷ Naame nalema pupudengi naa rapu ara nenaya Diudasi nipu pange Yesumi ma ma-aripanda Yesuna angele ma-puao-aya ali aripande, lisaya.

¹⁸ Diudasi nipuna koae au paya munimiri su kambisaya. Go kambisaya sunare romba lambeao lopisaya eimi nipuna lo romba rupara alenda alenda kama nane rakupi lumbepe puma komisaya.

¹⁹ Diudasi gurupa komisaya ei Diurusaleme para palisimiya wenaali raayome pangisimiya. Go einare monde suri nimuna anda angele lomare Akilidama su lisimiya. Akilidamare wee kole su, loma lisimiya.

²⁰ Go eiri nipuna anda para wenaali menda na-pali anda luda ainya loma Godena Yainya Pi Yaisa Buka rupara wape pi ei ora meande, lisaya. Mendaa buka para wape pi eiri gurupa. Ali mendame nipu alopao ainyalea ei ora mu pande, wape pea.

²¹ Go einare Diudasi alopao ali menda meaminya, lisaya. Go aliri naa rapu ara Reali Yesu komoma wala rekande ei andoma go angele walainya meaminya, lisaya.

²² Go aliri Yesu nipu Dionimi ipa isaripande ei andoma Yesu naa rapu pamu ao-palia ei epa Yesu nipu komoma wala reka Epeni nane puande ei ora raayo ando karulae ali milimanda ana pea, lisaya.

²³ Pidame angele gurupa lo pereyaisaya ei pangomare Keriso wenaalimi ali laapo laapo menda kondo Diudasi alopao Yesuna angele ma-puao-aya ape ali mu ma-aisimiya. Go ali laapore Diosepa Diasidasi nipuna bi mendare Basapasi pange Madaiasi laapo mu ma-aisimiya.

²⁴ Gupuma yainya pula ara lalore, Realio, neeme ali raayona pu romba para andoale, lisimiya. Go einare go ali laapo menda kondo nena kone pea ali meamono walae, lisimiya.

²⁵ Diudasi nipuna ala pea lena polameya giala puande Yesuna angele ma-puao-aya ali pupudengi nena ali menda alopao meamono walae, lisimiya.

²⁶ Gupuma monde ali laapona bi kana kili laapona wape puma lopasiaisimiyapare ririna epa lopisaya kanana bi wisaya alina bi misimiya. Ririna epa lopisaya alina biri Madaiasina bi lopisayanda nipu Diudasi alopao monde ki laapo pereyoma angena komea aposolo alinu rapu aposolo ali ma ma-aisimiya.