Lucas 1 - El Nuevo Testamento Salmos y Proverbios

Tíhi mé xránkíxixín ti xroon i

¹ Nchónhña chojni tjinkaon sin ndoá chrókjin sin kaín ti nkehe kꞌuatsínka Ìnchéni ti kꞌuéjoni.

² Ikjin sin éxi ti nkehe kuíhini kjuako ti sin tsíkꞌikonxín ikon sin ti xránkíxixín la kꞌuáyéhe̱ sin ti ixra̱ sákjuichronka sin ti itan jína.

³ A̱ndá janhan kja̱xian kjuánchánkiá jína kaín ti nkehe kóhen ti xránkíxixín. La kjuénka̱yáxian tsokjian kaín tíha éxi tsíkóhen ndá chrꞌahán jaha Teófilo

⁴ kixin tso̱noha jína ti nkehe chaxín xrako̱ha.

Ijnko ángel chrónka kixin tsokjíhi Juan Bautista

⁵ *Ti ña̱o kꞌue̱to̱an ti rey Herodes ti nonte Judea la kjuákꞌe ijnko ncha̱tꞌá itꞌin Zacarías, kuènté ti sin tsíkꞌaxrjeníxin ti ncha̱tꞌá Abías. Ndá ti ichjién chꞌan Elisabet mé tsíkꞌaxrjeníxin tjan ti ncha̱tꞌá Aarón.

⁶ Yóí sin la jína kjuínchexiteyá sin éxi tjinkaon Díos la kuitekaon sin kaín ti nkehe kꞌue̱to̱an chꞌan. La kohya ijie̱ chrókꞌueka chojni ti jehe sin.

⁷ Kjánchó kóchóntahya sin ixjan kixin ti tjan Elisabet la xrokjuahya tsochonta tjan ixjan la ko ó táda, nána sin.

⁸ Ndá ijnko ña̱o ti ó kóhen tókan Zacarías la ko ti sin tjejóko chꞌan kixin sichꞌe chꞌan ixra̱ kuènté Díos ti ni̱nko a

⁹ la kjuíchꞌe sin suerte éxi kuéhen sin la chꞌin Zacarías kóhen tókan tsꞌixehen ti cuarto tjóá kuènté ni̱nko kixin tsjakꞌe chi̱nko̱ chritaón ti altar kuènté Díos.

¹⁰ Ndá kaín ti chojni la kꞌuejó sin ndója nixje̱he̱ sin Díos ti ó kꞌuixenko chꞌan ti chi̱nko̱.

¹¹ Ndá ikui jnko ángel kꞌuíkon chꞌin Zacarías tjexín to̱té nánko chjina ti altar tjakꞌe ti chi̱nko̱.

¹² Ndá ti ó kꞌuíkon Zacarías ti ángel la kóxakohen chꞌan la ko imá chrákon chꞌan.

¹³ A̱ndá ti ángel ndáchro: ―Zacarías, chrakonhña kixin ó kuíhin Díos ti nkehe tjanchia la ti ichjián Elisabet la tsꞌikon tjan ijnko xjan ndoa mé si̱nchekꞌian xjan Juan.

¹⁴ Imá tso̱cháha la ko itsjé chojni tso̱chéhe̱ sin kixin tsokjíhi xjan

¹⁵ *kixin imá tsotjetoan ti xjan nkayakon Díos. Tsꞌihya chꞌan ixran vino la ko nijnko ixran, la tsochónta xjan kjuachaxin kuènté Ncha̱kuén Díos kjónté ndesi nkaya tse̱e ìñé xjan.

¹⁶ Jehe chꞌan mé tsja̱ko̱he̱ chꞌan ti chojni Israel, la itsjé sin tsokjan sin tsinkáchónki sin Ìnchéni Díos.

¹⁷ *Tsítaón chꞌan nti̱a tsi̱xi̱n Ìnchéni. Éxi kꞌuékjako Elías ósé mé tsjako chꞌan la ko tsochónta kjuachaxin éxi kꞌuéchónta Elías. Jehe chꞌan tsondáche ti sin itꞌé xjan kixin í tsjajo̱nkohya ti xje̱en sin la ko kja̱xin ti sin titekakonhña mé tsitekaon sin. Mé xi̱kaha tsonixje̱he̱ chꞌan chojni kixin tsitekaon sin Ìnchéni ti ó itsi.

¹⁸ Ndá chꞌin Zacarías kjuanchankíhi ti chꞌin ángel, ndáchro: ―¿Nkexrín tso̱nona kixin chaxín tso̱hen tíhi? Kixin janhan la ó tádana la ko ti ichjin chonta la ó nána tjan.

¹⁹ *Ndá ángel ndáchro: ―Janhan Gabriel tꞌa̱ha̱ ixra̱ Díos, mé kꞌue̱to̱an chꞌan kꞌuinka kixin tso̱tjo̱nka ti nkehe jína tso̱hen.

²⁰ Kjánchó ijie kuitekákonhña ti nkehe xrja̱nká, la tso̱nósian, xitjahya tsonixja hasta tsoxítjajia ti ña̱o tsokjíhi ti xjan. La xi̱kaha tsoxiteyá kaín ti nkehe ndáxrja̱n ―ichro ti ángel.

²¹ A̱ndá ti sin kꞌuejóchóhen ti ndója ni̱nko ti chꞌin Zacarías, la kóxakohen sin kixin imá isé kjuákꞌe chꞌan nkaxehen ti ni̱nko.

²² Ndá ti ó kꞌuaxrjexín chꞌan ti ni̱nko la í xitjahya nixja chꞌan. Ndá kónohe sin kixin nkojín kjuaxroan kuènté Díos tsíkꞌikon Zacarías ti nkaxehen ni̱nko. Ndá itja chꞌan ó tja̱ko̱xi̱n chꞌan kixin í xitjahya nixja chꞌan.

²³ Ndá ti ó kjuixin ti ña̱o kjuíchꞌe Zacarías ixra̱ nkaxehen ni̱nko ndá sákjuí chꞌan ndo̱e chꞌan.

²⁴ Ndá chrꞌéxi̱n la kjuákꞌeyá ti ichjién chꞌan Elisabet. Ndá ndo̱e tjan ó kuíto̱he tjan inꞌó nitjó la kjuénka̱yáxin tjan:

²⁵ “Tíhi kjua̱ko̱xi̱n Ìnchéni kixin í tsjanoáhña chojni ti janhan kixin ó tsochonta xjan”, ichro tjan.

Ijnko ángel chrónka kixin tsokjíhi Jesús

²⁶ Ndá kꞌuatsínka injon nitjó ndá Díos kꞌue̱tue̱hen ti ángel Gabriel kixin sátsji ijnko chjasin ti nonte Galilea mé itꞌin Nazaret.

²⁷ *Sátsjinixje̱he̱ chꞌan ijnko tjan tjarisoá na̱xa̱ kuákjahya tjan chojnindoa mé itꞌin tjan María. Jehe tjan mé tso̱te̱he tjan ijnko nkexro itꞌin José, tsíkꞌaxrjeníxin ti rey David.

²⁸ A̱ndá ti ángel kꞌuíxehen ti itjen tjan la ndáchro: ―Díos tjinki̱tsa ti jaha. Ìnchéni Díos tjeko̱a. La imá kjuíntañaoan chꞌan ke ti íso sichjin ―ichro ti ángel.

²⁹ Kjánchó ti ó kꞌuíkon tjan ti ángel la kóxakohen tjan la kjuénka̱yáxin tjan nkekuènté xi̱kaha ichro.

³⁰ Ndá ndáchro ti ángel: ―Chrakonhña, María. Díos la imá tjetjinki̱tsa ti jaha.

³¹ *A̱ndá ijie la tsjakꞌèya, tsochonta ijnko xjan ndoa la si̱nchekꞌian xjan Jesús.

³² *Ti ixjan la imá tsꞌe̱to̱an la ko itsꞌin xjan Xje̱en Díos nkaya nka̱jní. Ìnchéni Díos mé tsjajon kjuachaxin tsꞌe̱to̱an xjan éxi ijnko rey éxi kꞌue̱to̱an ti rey David, ti nkexro tsꞌaxrjeníxin xjan.

³³ Nkochríxín tsjakꞌe xjan tsꞌe̱tue̱hen xjan ti nación Israel, la tsjeje̱hya ti kjuachaxin tsochónta xjan ―ichro ti ángel.

³⁴ Ndá María kjuanchankíhi ti ángel: ―¿Nkexrín tso̱hen tíha kixin janhan la na̱xa̱ chontahya chojnindoa?

³⁵ Ndá ti ángel, ndáchro: ―Ti Ncha̱kuén Díos mé itsi la ko ti kjuachaxin kuènté Díos mé tsjakꞌe ti itjen éxi jnko tsꞌuan, ndá tsochonta ti xjan. Méxra̱ ti ixjan tsokjíhi la tjóá xjan la itsꞌin xjan Xje̱en Díos.

³⁶ Kja̱xin tjan Elisabet na̱xa̱ kjéhya jaha, la kjónté ó nána tjan la í jóhya tjan. Senó la kꞌuéchóntahya tjan ixjan, a̱ndá ijie la ó injon nitjó tjeyá tjan.

³⁷ *Kixin ti kjuachaxíen Díos la tsjacha tso̱hen kaín nkehe.

³⁸ Ndá María ndáchro: ―Janhan tꞌa̱ha̱ ixra̱ Ìnchéni Díos. Tso̱hen éxi kꞌue̱to̱an chꞌan. Ndá kjuixin chrónka ti ángel tíha ndá sákjuí chꞌan.

Tjan María sákjuitsjehe ti tjan Elisabet

³⁹ Ndá ijnko ña̱o la María tji̱a̱n sákjui̱ tjan ijnko chjasin itjen ti ijna̱ Judea.

⁴⁰ La ti ó kjuíji tjan ntiha ndá kꞌuíxehen tjan ndo̱e Zacarías la nixje̱he̱ tjan ti tjan Elisabet.

⁴¹ Ndá ti ó kuíhin Elisabet nixja tjan María la chrika ti xjan nkaya tse̱e tjan. La a̱ntsí kꞌuáyéhe̱ tjan kjuachaxíen Ncha̱kuén Díos.

⁴² La itsen ndáchro tjan: ―Díos imá kjuíntaña̱oan ke ti íso chojnichjin la ko kjuíncheñao chꞌan ti xja̱an.

⁴³ ¿Xá nkexro ti janhan kixin kjuinixja̱na ti ìñé Ìnchéni?

⁴⁴ Kixin ti ó kui̱ha̱n nixja la ti xja̱na la chrika nkaya tsa̱na kixin chéhe̱ xjan kjuihá.

⁴⁵ Díos sintañaoan kixin kuitekaoan la Ìnchéni Díos sinchexiteyá ti nkehe ndáchro.

⁴⁶ Ndá ndáchro tjan María: A̱sená la imá tjikosáyehe Ìnchéni Díos

⁴⁷ la chéhe̱ a̱sená kixin Díos sinchekaána.

⁴⁸ *Kixin Díos ikuá kuentá ti chojnichjin nóa chꞌe ixra̱ kuènté chꞌan. A̱ndá ijie la ko nkochríxín tsondáchro chojni kixin náxrjón tsjakꞌé janhan,

⁴⁹ kixin Díos chónta kaín kjuachaxin mé kjuasixína ijnko kjuaxroan ijié ti janhan; imá tjóá ti ihni̱é Díos.

⁵⁰ La nkochríxín ti̱konoéhe̱ chꞌan kaín ti sin tjikosáyehe ti jehe chꞌan.

⁵¹ Díos kjuasin itsjé kjuaxroan ijié; kuakitsje chꞌan ti kjuachaxin chónta ti sin nchehnke

⁵² *la ko kuakitsjehe chꞌan ti kjuachaxin chónta ti sin tꞌe̱to̱an. A̱ndá ti sin nóa la chjéhe chꞌan kjuachaxin tsꞌe̱to̱an.

⁵³ Ti sin tꞌenxín kjinta la kjuajon chꞌan kaín ti nkehe ticháxi̱hin sin, a̱ndá ti sin rico jehó itja sin sákjuí sin.

⁵⁴ Kjuínki̱tsa chꞌan ti nación Israel kixin chꞌehe sin chꞌan ixra̱; La kꞌuitjáñehña chꞌan, kui̱konoéhe̱ chꞌan ti jehe sin,

⁵⁵ *éxi tsíchenka ti sin kꞌuaxrjeníxini kꞌuejó ósé, Abraham la ko kaín ti sin tsꞌaxrjeníxin chꞌan.

⁵⁶ Ndá tjan María kuito̱eko tjan Elisabet iní nitjó ndá chrꞌéxi̱n xíkjan tjan ndo̱e tjan.

Kokjíhi Juan Bautista

⁵⁷ Ndá ti ó xítja ti ña̱o sinchekokjíhi tjan Elisabet ti xje̱en tjan, ndá kjuínchekokjíhi tjan ijnko xjan ndoa.

⁵⁸ A̱ndá ti sin chjinaxón ndo̱e la ko ti sin kjéhya tjan mé kjuíjitsjehe sin tjan la imá chéhe̱ sin kixin kuíhin sin kixin Díos imá kui̱konoéhe̱ ti jehe tjan.

⁵⁹ *Ndá ti ña̱o jníxin ikjuí sin kixin sincheka sin xjan ti xro̱ye kuènté sin judío. Ndá chrókjuinchekꞌin sin xjan Zacarías éxi itꞌé xjan.

⁶⁰ Kjánchó ti ìñé xjan ndáchro: ―Náhí. Ticháxi̱n itsꞌin xjan Juan.

⁶¹ Ndá ndáchro sin: ―¿Nkekuènté xi̱kaha chrókꞌuin xjan? Kohya nkexro na̱xa̱ kjéhya xi̱kaha itꞌin.

⁶² Ndá kjua̱ko̱xi̱n sin itja sin kjuanchankíhi sin ti itꞌé xjan nkexrín tjinkaon chꞌan chrókꞌuin xjan.

⁶³ Ndá ti itꞌé xjan mé kjuanchia ijnko nta intsí ndá ikjin: “Ti ihni̱é xjan mé Juan.” Ndá kaín ti sin tjejó ntiha la chrákon sin kixin xi̱kaha kjuanchia chꞌan.

⁶⁴ La tuénxín kjuankíxin nixja chꞌin Zacarías ínaá, la chjéhe chꞌan Díos kjuasáya.

⁶⁵ Ndá kaín ti sin tjejó chjinaxón ndo̱e sin mé chrákon sin. La nkuíxín ti ijna̱ kuènté nonte Judea kuíhin sin kixin xi̱kaha tsíkóhen.

⁶⁶ A̱ndá kaín ti sin kuíhin mé kjuénka̱yáxin sin la kjuanchankíhi kícho sin: ―¿Xá nke ixra̱ tsíki̱to̱nhe̱n ti xjan i? Kixin ó nohe sin kixin chaxín Ìnchéni Díos kjuíncheñao ti ixjan.

Ti nkehe chrónka Zacarías

⁶⁷ A̱ndá Zacarías itꞌé ti ixjan, la a̱ntsí kꞌuáyéhe̱ chꞌan ti kjuachaxin kuènté Ncha̱kuén Díos la nixja chꞌan itén Díos, ndáchro chꞌan:

⁶⁸ Tjikosayéhéra Ìnchéni, ti Díos kuènté Israel, kixin ikui ti tjejóni a kjuínchekaá ti nación kuènténi.

⁶⁹ La kjuajon chꞌan ijnko nkexro tꞌe̱to̱an sinchekaá ti jeheni kꞌuaxrjeníxin ti rey David, ti nkexro kꞌuékjichꞌehe ixra̱ Díos.

⁷⁰ Éxi kꞌuéchronka ti sin kjueyá Díos kꞌuéchronka itén chꞌan ósé,

⁷¹ ndáchro kixin Díos sinchekaá ti jeheni kixin tsjachahya kaín ti sin nínkakohen ti jeheni.

⁷² La tsi̱konoéhe̱ chꞌan ti sin kꞌuaxrjeníxini ósé, la tsꞌitjáñehña chꞌan ti nkehe tsíchronka chꞌan tsoxiteyá.

⁷³ Ti nkehe tsíkjo Díos Abraham ósé kixin chaxín tsoxiteyá chrꞌéxi̱n

⁷⁴ kixin Díos mé sinchekaá ti jeheni la kohya nkehe sichꞌe ti sin nínkaon kixin jína sichꞌeheni ixra̱ Díos la tsochrakonhñani,

⁷⁵ la jína la ko tjóá tsꞌejóni. Tsjikosáyeheni chꞌan kaín ña̱o ti na̱xa̱ tjejóchóni.

⁷⁶ *A̱ndá jaha xje̱eni mé itsꞌian, ti nkexro chronka itén Díos itjen nkaya nka̱jní. Kixin tsꞌito̱nxian nti̱a la si̱ncheyóxian ti nti̱a tsi̱xi̱n Ìnchéni.

⁷⁷ Jaha tsjákohé ti chojni chjasintajni nkexrín tsjìin ti ijie̱ chónta sin, ndá tsaá sin.

⁷⁸ A̱ndá Díos mé imá tjue̱heni la ko kui̱konóe̱he̱ni ndá kjuajon chꞌan ijnko xrohi ni̱xin kui̱xi̱n nka̱jní tsꞌinkaséñaxíni.

⁷⁹ *La tsꞌinkaséñexín ti sin tjejó ti sítie la ko ti sin chrókꞌuitjáña, la tíhi mé tsꞌikonxíni ti nti̱a tsjajon kjuaxróxin.

⁸⁰ Ndá xi̱kaha tinkákꞌánkí ti xjan la Díos kjuínchekꞌánkí ti kjuaxrexinkaon kuènté xjan. La kjuákꞌe xjan nte̱je̱ hasta kjuixrakájña ti ña̱o kjuankíxin kjua̱ko̱he̱ chꞌan ti chojni Israel.