RUTH 1 - KÜMÜTSE Naga Bible (BSI)

Elimelek thi Ma Tharuo Moab vü Küru

¹ Lesari nüh takrü küsa tsothovü azhihwa vü kümkhuojih ru, Judahvü Bethlehemri nyi küsü, ma tü ma vüvüh thi ma tsa nyimpa künyi ti sie nü Moab anyu vü priru rho.

² Anyiwa nyo nü Elimelek thi ma vüvüh nyo thuoüji Naomi, ma tsa nyimpa künyi nyo thuoüji Malon thi Khilion; mari tü Judah vü Efratri Bethlehem vünüh. Mari tü Moab anyu vünüh tsezhuwa nü jüla rho.

³ Thitü Elimelek, Naomi vüpa tü ma vüvüh thi ma tsa künyi jam nü sütewa.

⁴ Hamasü tü Moabvühri vi; vüvüh küsüwa nyo nü Orpah thi küpawa nyo thuoüji Ruth. Mari tü jüla mahvi türake kümjie rho;

⁵ jüti küsa vü Malon thi Khilion masü tü süm nü nyimzawa tü matsa künyi thi ma vüpa ti kümie küm sa.

Noami thi Ruth Bethlehem vü Sheleteküru

⁶ Jüti küsa vü nyimzawa tü ma jühnyi künyi sie nü Moab anyu vünüh sheleteru, küpakenühnyunü Vüwa nüh Moab vü ru nü manyiri no nü ashie vi mari tsü saveh ta küsa küünara kenüh.

⁷ Jükenüh ma tü ma jühnyi masü sie nü ma küpehpe vünüh tsezhutaji mari letse sa Judah zhih vü sheleteru.

⁸ Thitü Naomi nüh ma jühnyi künyi vü, “Waluo, nohsü khürüngashele nohsü zahra zheh vü tewaluo. Nohsü nüh aküsüri vü nga thi hi vü nga kümhie küsa üta Vüwa nüh nohsü vü kümhie küsawa saluo.

⁹ Nohsü khürü nga nohsü vüpa zheh vü Vüwa nüh azheh küüngu küsarawa küsaluo,” ti küza. Jüti sanü ma nüh masü kümetsü, thinü masü tü masü jikhi zia nü krietewa.

¹⁰ Jüti küsa vü masü nüh, “Nyu, hisü nga noh senyi nü noh nyiri vüwa naveh,” ti küza.

¹¹ Thitü Naomi nüh, “Sühlem luo, eh tsavüh künyi, nohsü tü mokenüh hi vü nyiwa na lo? Eh shiekuo lovü nosü kenüh vüpa küsalera atsa pehüveh ülo?

¹² Sühlem luo, eh tsavüh künyi, nohsü lehkhuji vü tewaluo, küpakenühnyunü hi tü avüpa ngutü na küsa kükhruolethuoh kenüh. Mükütüküzü hi nüh küluozhe küpeh küphrahtera küpehtüla sütavü nga nüh vüpa sanü atsa nyimpari satsü na nü,

¹³ jükenüh nohsü tü masü kükhruo huola nyi lo? Thi nohsü tü vüpa samwa nüh sanaveh ülo? Nyu, eh tsavüh künyi, küpakenühnyunü nohsü kenüh hi vü kha shehke nü Vüwa ke tü hivü kuowuluo teküwa kenüh,” ti küza.

¹⁴ Jüti küsa vü masü jikhi tü zia kümsie nü krietewa lehü; thi Orpah nü ma nyi kümetsü, thitü Ruth thuoüji ma khephohke.

¹⁵ Thinü nyimzawa nüh, “Noluo, noh nyo thuoüji ma nyiri thi ma nyiazari vü sheletewathuoh; tinü noh nyo vü sühletewaluo,” ti küza.

¹⁶ Thitü Ruth nüh, “Hi tü noh jam üti nyutü noh sekünyi vünüh sühletewa üti hi vü mükhuo tüm; küpakenühnyunü noh khievü wanaveh ünüh hi nga wa naküveh kenüh; thi noh nüh khiela peh naveh ünüh hi nga jüla peh naveh, noh nyiri tü eh nyiri sanaveh, thi noh Saküüwuowa tü eh Saküüwuowa sanaveh;

¹⁷ noh nüh khiela nüh sü naveh ünüh hi nga jüla nüh sü naveh, thi jüla nüh hi tü chohwu naveh. Vüwa nüh jü üta hi vü küsaluo, thi hi tü aküsü nüh noh sie müküporie küju nü jüma nyiehvü nga nüh saluo,” ti küza.

¹⁸ Jüti küüza vü ma nüh ma senyiwa nta müshethuo küm Naomi nüh küngu vü ma tü müphrahte le nüh sam.

¹⁹ Jükenüh masü tü Bethlehem vü müjie ruküju nü tsetewa. Thi masü Bethlehem vü ruju ünü masü kenüh anyu ajü tü küngahtewa; thinü nyimzari nüh, “Hamatü Naomi thuoh ülo?” tisa.

²⁰ Nyimzawa nüh mari vü, “Naomi, ma zhühnyo kümhie, ti hi müji tüm nü Mara, ma zhühnyo akükha ti ji luo, küpakenühnyunü Kükhratsawa nüh hi vü kha sheh kümthuoh kenüh.

²¹ Hi tü pro nü wa, thitü Vüwa nüh hi tü rütso nü sie shele teru. Vüwa nüh hi sakümnomna thi Kükhratsawa nüh ngukümsü hi vübtsü ti küsa kenüh mokenüh hi tü Naomi ta jiveh lo?” ti küza.

²² Jükenüh Naomi tü sühle teru, thi Ruth, Moabvühwa ma jühnyi nga masie teru, masü tü Moab anyu vünüh sühle teru. Masü tü khuohzhikürümieh kümrhe te vü Bethlehem vü teru.