ROMRI 1 - KÜMÜTSE Naga Bible (BSI)

Kürüluo

¹ Jisu Khrista siepewa Paul, Vüwa povü küsari küsü sa üta küji, thi Saküüwuowa Zhühthe Kümühie kenüh athuoh sanü samüthuoh.

² Jümatü setsaküthsüri nüh atükhu vünüh Kümtse Zhütsazhü vü küzake samüthuoh.

³ Zhühlekümühie jümatü ma Tsa zhühku, ma tü satsawa müzhe nü David küshukütu vünüh turu.

⁴ Saküüwuowa Tsa wiethuoh ta küsa kükhra thi Sietse kümtsewa vünüh aküsü vünüh küsürawa hiri Vüwa Jisu Khrista wiethuoh.

⁵ Ma vünüh hiri tü küümze thi Vüwa povü küsa küüro ngura nü ma nyo kenüh akuoh aveh vü azhüküüna kütsotüwa viwa naküsa wiethuoh.

⁶ Jisu Khrista azhi sa nta ji küsa vü noh nga chieke sa veh.

⁷ Saküüwuowa nüh kümüze küveh kümtseri küüsa nta ji küsa Rom vü küpehri: Küümüze nohri vü thi Saküüwuowa hiri Pa thi Vüwa Jisu Khrista vünüh nohri vü noküümze thi kürükümühiewa küruwa saluo.

Kümünakütsü Kükhuo

⁸ Pokhu sa Jisu Khrista vünüh nohri aveh kenüh e Saküüwuowa kümüna tsü veh, küpakenühnyunü nohri kütsotü watü azhih aveh vü tholah kümüthuoh kenüh.

⁹ Küpakenühnyunü Saküüwuowa tü eh povüwa, hi nüh eh sietse vünüh ma Tsa zhühlekümühiewa sanü mükütuowiethuoh nüh eh kükhuo aveh vü nohri nyo thsewie veh.

¹⁰ Hi nüh kükhuo thuoüji Saküüwuowa kümüshe thuoüji hi tü ru nü nohri siekümütuwa samo ti khuoru.

¹¹ Nohri saküükhra na küsa kenüh sie tse kütsia vi nohri tsü nti nohri mütungü ru.

¹² Jüma thuoüji, noh nga hi nga küsü nüh küsü küchü nü kütsotü vünüh küzhake nti küsawa wiethuoh.

¹³ Thi eh füri, hi nüh nohri küüthsüngüwa thuoüji, nohri azhie vünüh nga thi Judahmükünyuri vünüh nga ti azakütsa ngu ntheti küsa kenüh hozakeri wienga nohri vü ru nti sa, thitü khinyi haküjuwienga lekhuji kükhe ruru ti.

¹⁴ Hi tü Greekri thi Greekmükünyuri shewi nga thi zanyoküthsüri thi müküthsüra shewi nga vüveh.

¹⁵ Jükenüh hi tü nohri Rom vü küpehri vü nga Zhühthe Kümühiewa vi küzangü sheke veh.

Zhülekümühiewa Kükhra

¹⁶ Küpakenühnyunü hi tü zhühlekümühiewa kenüh thuoüji müzükrü, jümatü küsüküsü nga kütsotü küpehri aveh thuoüji küülole kenüh Saküüwuowa kükhrawiethuoh, thi hamatü Judahri kenüh apo thi Greekri kenüh nga wiethuoh.

¹⁷ Küpakenühnyunü jülatü kütsotüwa nüh kütsotü kenüh Saküüwuowa künyitsa saküthsütsü veh, thi jüma kenüh hakümjie rhü sa veh: “Thawa nüh kütsotü vünüh nyitsara nüh ma thuoüji rhora naveh,” ta rhü sa veh.

Nyiri Rhozihkümü

¹⁸ Rügi vünüh Saküüwuowa rüküshu tü Vüwa kümüshe vünüh mükürhori vü thi khuke kümüsüri vü kütsahmüthuoh, thi mari mükümühie kenüh küzhütsawa khetemüthuoh.

¹⁹ Küpakenühnyunü Saküüwuowa nüh mari vü kütsa kümüthuoh kenüh ma zhükuri tü sakümüsie nü mari küthsümüthuoh.

²⁰ Thi azhih küsakhu vünüh nosü küju ma khuke jümatü ma kükhra thi küsuokürho kükhra müthsü nüh sa ru, thitü ma nüh saküsari vünüh ngu kümtserathuoh, Jükenüh mari tü müküle noküja münyie luo.

²¹ Küpakenühnyunü mari nüh Saküüwuowa thsüwie ketünga ma müsiake nyutü kümüna vi ma mütsü, thi mari nüh zanyo kümüshewa tü mameh münyie nüh samü thi mari kümüshewa tü saküzomüthuoh.

²² Mari tü zanyoküthsüri ta müshe veh, thitü mari tü zhemüthuoh.

²³ Thi Saküüwuowa kütholathovü müküprikürawa vi nü nyiri nyutü amüwa nyutü asa nyutü azhih vü rühvü nü kütse küprikürari müzhimüthuoh.

²⁴ Jükenüh Saküüwuowa nüh mari vi luoveh kümüngu mükümtse vü thsemüthuoh, jütisanü mari mpa mari azhie vü mari satsa müküürüpa müküzükrü vü thsemüthuoh.

²⁵ Küpakenühnyunü mari nüh Saküüwuowa küzhütsawa vi aküriewa samüthuoh, thi Saküüjewa mükhurü nüh saküjeküsari khurü, thi jümari povü satekütse kenüh, thitü ma thuoüji küsuokürho müsiakeji mükümühiewa wiethuoh! Amen.

²⁶ Hama kenüh Saküüwuowa nüh mari vi müküüzhikera asazüh kümüngu vü thsemüthuoh. Mari nyimzari tü mari satsazüh kürho wulewa tü awule vü müthse nüh wulemükünyu vü thsemüthuoh.

²⁷ Thi nyimpari nga jükümjie nyimzari sie asazüh kürho wulewa jamü nü nyimpari mpa küsü nüh küsü vü müküüzhikera asazüh kümüngu samü, nyimpari mpa nyimpari vü küzükrü amüke sanü mari müküle küsa kümülie kümüsü nga ngumüthuoh.

²⁸ Thi mari tü Saküüwuowa khuke küphrate mükütse kenüh Saküüwuowa nüh mari tü amüshe kürüpo vü thi khuke kümüsü vü thsemüthuoh.

²⁹ Mari tü khuke mükümühie, müsarüla küsa, zanyokümüngu thi nyuri saküümüsüngü nüh promüthuoh, jü mpa mükünyu nyuri noküüjizhi, nyuri küfethe, küüraluo, nyuri kümüra, nyuri phrateküümüsü thi nyura rhüküsanüh mari pro nü tetsethuoh.

³⁰ Mari thuoüji: nyuri kükhrükeri, Saküüwuowa kümürhüri, azhükünyi mükünyieri, mari mpa phrakümüsie kütseri, müsheküüjiri, kümüsü mpa phahuokütseri, azahpari zhümüküünari.

³¹ Zanyomükümüsheri, kütsotü mükünyieri, luoveh müküperi, küümze mükünyieri.

³² Anyi jüüta küsari thuoüji küsüleh ta küsa mari nüh Saküüwuowa zhü tsüküsari thsüwie ketünga mari nüh jümari mpa küsa nyu nü jümari sakütseri nga povü satsütsüti.