OBADIA 1 - KÜMÜTSE Naga Bible (BSI)

Kürhieza Edom tü asaji vü Viturum na thuoh

¹ Obadia kümohtsa. Edom kenüh Vüwa Saküüwuowa nüh hakümjie küza: Hiri tü Vüwa vünüh azhüke küsü künara, thi zhüleküvüri küsü tü akuoküjira za vü küzemthuoh: “Süraluo! Arie sana küsa kenüh kürü süra nü jüma siesaluo ünüh.”

² Hi nüh noh tü akuoküjiri azhie vü aküzahtsawa satsütsa wie naveh; noh tü rüju kümwa sa wie na thuoh.

³ Noh kürhieza luoveh nüh noh müram thuoh, noh alokrü kümkheh vü kürhowa, noh kürhope tü kümsie vü. Noh nüh noh luoveh vünüh, “Thawa nüh hi vü azhih vü turura na lo?” ta küza veh.

⁴ Noh nüh aluomü kümjie prütse wie nga, noh phra tü awutsi azavü sakesa wie nga, jüla nüh hi nüh noh viterum naveh, ta Vüwa nüh küza.

Edom Rokümsü tü Khoküvi thi kürehthe nüh vi thuole naveh

⁵ Mükütüküzü rühukütsari noh vü ru, mükütüküzü akükhori arüza vü ru, noh tü mokümjie zoriem lo! mari tü mari nüh mowa vi ngü veh ünüh jüma mpa küviwa nyu ülo? Mükütüküzü rhelivi külazhuhri tü noh vü ru thuoüji, mari tü amahse müja nüh sanaveh ülo?

⁶ Mokümjie Esau tü khoküvim lo, ma künyirhie ri tü phahzhutewa!

⁷ Noh refüri aveh tü noh nüh arüshu vü zheküzemthuoh, noh sie nü zazhü kükari noh no nüh müramthuoh; mari tü no nyie vü khrate wathuoh; noh lohse kütsari nüh noh kenüh küjurü küsü sakhesa vehthuoh, jüma kenüh küthsükümshi küsü nga münyie.

⁸ Jüma rülo vü, Edom vünüh hi nüh aküthsüri zorie naveh, thi Esau küzhi vünüh küthsükümshiri zorie naveh.

⁹ Noh nyi kümzhotsari tü kürhieriem na thuoh, O Teman, jüta thuoüji Esau küzhi vü anyiri aveh tü vijam nathuoh.

Edom nüh Ma nü vü Müküsaleh Saküm

¹⁰ Noh nüh Jacob vü kürehthe thi küvürie saküm kenüh, küzükrü nüh noh küzhutem naveh, thi noh tü küsuokürho vijam nathuoh.

¹¹ Noh nüh athuo sanü kütsie rülo vü, anyitheri nüh ma künyirhie vüteküwa rülo vü, thi alienyiri nüh ma kheri lovü tu nü Jerusalem kenüh aküze küsavü, noh nga mari nyi küsü kümjie sa wie thuoh.

¹² Thitü noh tü noh nü ma münguküsazih rülo vü ma rügi vü no küükhri vüh nyu; Judah nyiri ferie küm rülo vü noh tü nyierakükhruovüh nyu; müsheküna rülo vü noh tü kükuotikuoshivüh nyu.

¹³ Noh tü eh nyiri kheri lovü kütuvüh nyu; mari lokürü rüloa; noh tü ma küpoka rüloa ma küriesa vüh nyu; ma lokürü rüloa; noh tü ma zanyori müzhihküvileh nyu, ma lokürü rüloa.

¹⁴ Ma lepruo ri kükashukarieri vü kütsiete vühnyu; müshekümna rülo vü noh tü ma rhoküvehri vi küülie vü nyu.

¹⁵ Vüwa rülowa tü akuoküji aveh shenyi kümthuoh kenüh. Noh nüh küsa üta noh vü satsü naveh; noh nüh küsari tü noh mpa noh lü vü sheleru wienaveh.

¹⁶ Noh nüh eh kümtse küzhi vünüh küzhu üta, akuoküji noh mükiele küpehri aveh tü zhu naveh; mari tü küülole tsüle naveh, thi mari tü küsükeri nga jükümjie müjie küsanaveh.

Israel Kükhrara Sehkhewa

¹⁷ Thitü Zion küzhi vütü müriete küwari peh naveh, thi jüma tü mütha naveh; thi Jacob zhehlowa nüh müka müküvehra zhi müka naveh.

¹⁸ Jacob zhehlowa tü anyih küsü sanaveh, Josef zhehlo nüh anyihzu küsü sanaveh, thi Esau zhehlowa nüh amaguo feküjawa sanaveh; masü nüh jümari tso thi jümari tsojam naveh, thi Esau zhehlo tü kürhora küsü nga küpeh wa nyu; Vüwa nüh küza kümthuoh kenüh.

¹⁹ Negebri nüh Esau küzhi müka naveh, thi shefelari nüh Filistinra zhih müka naveh; mari nüh Efraim zhih thi Samaria zhih müka naveh, thi Benjamin nüh Gilead müka naveh.

²⁰ Israel aküsi sateküwa hala vü küpehri nüh Foenicia thi wa nü Zarefat küju müka naveh; thi Jerusalem küsi sateküwa Sefarad vü küpehri nüh Negeb nyujiri müka naveh.

²¹ Külole kümri tü Esau küzhiwa takrü nta Zion küzhi vü khru naveh; thi kajipewa tü Vüwa zhi sanaveh.