LUKE 1 - KÜMÜTSE Naga Bible (BSI)

¹ Küümüze Theofilas: Hiri azhie vü momowa sathuoh nüh nyiri hozake wienga mari kükhra thse taji azhükewa rhü.

² Mari nüh kürhü thuoüji, hiri vü mowa küza nüh, thi atüvü nüh mari nüh künguri thi mari nüh zhüle küphrateri rhü.

³ Thi jükenüh küsiake küvüwa Theofilas, hi nga atütso vünüh kümühieti no wa nü jümari zhüku rhükümühie sheh le taji no vü tsü thuoüji mühie naküveh müshe.

⁴ Küpakenühnyunü hakümjie sathuoüji noh nüh küzhütsawa khana no vü küza küsawa thsütora naküveh kenüh.

Johan Baptist Küwuo Küthsükütsü

⁵ Thi Herod nüh Judea azhih vü kaji sape küveh vü Abijah refü vünüh levüri küsü Zekharia ti küsa peh, ma tü Aron tsa rüla küsü Elizabeth ti küjiwa za.

⁶ Masükhürü nga Saküüwuowa atüvü nyitsanü Vüwa nüh wule kütsüri thi ma zhüri müzheju nü kütseri küsü.

⁷ Thitü Elizabeth tü tsa küsa aviwa mükünyiethuoh kenüh masü tü atsa münyie, thi masü tü kükhruo nga khruokümüthuoh kenüh.

⁸ Rülo küsü Zekharia tü ma mütho küru kümüjie Kükhurüzhe vü levü sataji ma rülo aveh küürowa saveh ünü,

⁹ levü wule vünüh aküze sataji levü küürowa ma vü turu taji ma tü Kükhurüzhe lovü arheküüngu zanyo tso nti wa.

¹⁰ Thi arheküüngu zanyowa tsoküvehvü anyi riekhuowa tü alie vünüh kükhuo sa peh.

¹¹ Thi tsoküvehvü Kükhurüpe azhie wuovü Vüwa zhüleri küsü turu peh.

¹² Thinü Zekharia tü jü ngu nü ngo thi kükrüwa ma vü ru.

¹³ Thitü zhülewa nüh ma vü, “Mükrütümü luo, Zekharia, küpakenühnyunü no kükhuotü künamütüthuoh, thi no vüvüh Elizabeth nüh atsa nyimpari küsü wuo no tsü naveh, thi no ma nyo Johan ji naveh.

¹⁴ Thi noh tü lowie thi lozhe sheh naveh, thi nyiri hozake wienga ma küwuo kenüh lozhe sheh naveh.

¹⁵ Küpakenühnyunü ma tü Vüwa atüvü ji sheh naveh, thi ma tü akha nga küzhuwa nyu thi küzhu kümüsheri nga küzhuwa nyu, thi ma tü Kümtse Sietse nüh pro naveh, ma za vo lo vünüh nga pro nü wuo naveh.

¹⁶ Ma nüh Israelri atsa hozake wienga mari Vüwa Saküüwuowa vü sieru naveh.

¹⁷ Thi ma tü Elijah sietse thi kükhra vünüh ma tüvü wa naveh, ma nüh apari thi atsari sakütsarütsü naveh, thi nyiri zhümüküünari sie kümüsho aküthsü vü thse naveh, Vüwa kenüh nyiri küche sanaveh,” ti küza.

¹⁸ Thinü Zekharia nüh azhülewa vü, “Hi nüh mokümjie ha thsüra naveh lo? Küpakenühnyunü hi tü anyi kükhruori küsüthuoh, thi e vüvüh nga khruomüthuoh,” ti küza.

¹⁹ Thinü zhülewa nüh, “Hi thuoüji Gabriel, Saküüwuowa atüvü tsieküpewa, hi tü zhühthe kümühie hama viwa no vü küza üta küze nü tse.

²⁰ Thi halie, zanyo hamari müjie küsaju nü noh tü azhü müphrara nüh zota peh naveh, küpakenühnyunü mari tsotho vü sajuna küsari noh nüh mükütsotü kenüh,” ti küza.

²¹ Nyiri tü Zekharia huope, thitü ma nüh shita müküshuhru kenüh mari ngo.

²² Thinü ma tü alievü shuhru ünü, mari müjülera nüh sa, thinü mari nüh ma tü Kükhurüzhe lo vünüh Vüwa nüh mowa küngu saveh nüh ti müshe, thi ma tü amüke mpa sakütsa taji azhü müphrara nüh satewa.

²³ Jütiküsavü ma tü Kükhurüzhe vü küürowa jumü nü ma zheh vü tewa.

²⁴ Rülo hamari sevü ma vüvüh tü atsamo, thi asa münga ma tü küthipe ünü,

²⁵ Vüwa nüh hi sie küjüle rülo vünüh hakümjie sa, küpakenühnyunü nyiri aza vünüh e küzükrüwa vija na küsa kenüh, ti küza.

Jisu Küwuo Küthsükütsü

²⁶ Asah türoawa vü Saküüwuowa nüh Gabriel tü Galilee vü nyuküji Nazareth ti küsa vü küze.

²⁷ Ma küüze thuoüji rülamüküwuosa David akuoh Josef ti küsawa küsü vü zana saküveh vühwa vü küze; thi rülawa jüma anyo tü Maria.

²⁸ Rügizhülewa tü ru nü ma vü, “Kümühiewa saluo, halie rükakümüvühwa, Vüwa nüh no siepevehthuoh, thi noh tü nyimzari aveh zhie nüh kümüngatsawa,” ti küza.

²⁹ Thitü jüti küüza vü ma tü luoveh lalati sanü azhü hamatü mowa thuoh ünüh ti müshe peh.

³⁰ Thinü rügi zhülewa nüh ma vü, “Mükrütümü luo, Maria, küpakenühnyunü noh tü Saküüwuowa nüh rükakümüthuoh kenüh.

³¹ Thi halie, no vo lo vünüh atsa nyimpari küsü mo nü wuo naveh, thi no ma nyo Jisu ji naveh.

³² Ma tü ji sheh naveh, thi ma tü Kümüsie Tsawa ta ji naveh, thi Vüwa Saküüwuowa nüh ma pa David kajipewa vi ma tsü naveh.

³³ Thi ma nüh Jacob küthsoküzhi anyia vü küsuokürho kaji naveh; thi ma kajipewa tü sehkhe münyie nüh sanaveh,” ti küza.

³⁴ Thinü Maria nüh zhülewa vü, “Khiela nüh hakümjie sara naveh lo, küpakenühnyunü hi tü nyimpari müjiethsü nü,” ti küza.

³⁵ Thinü rügizhülewa nüh ma vü, “Kümtse Sietsewa nüh no vü ru naveh, thi Saküüwuowa kükhra no vü peh naveh, thi wuo na küsa kümtse tsawa tü Saküüwuowa Tsa ta ji naveh.

³⁶ Thi halie, no küshuküravühwa Elizabeth nga ma kükhruo se vünüh nyimpari küsü movehthuoh, ma tü atsamüküsavühwa ta ji thitü asah türo atsamotetsethuoh.

³⁷ Küpakenühnyunü Saküüwuowa vünü zanyoküsü nga müküsara münyie,” ti küza.

³⁸ Thinü Maria nüh, “Halie, hi tü Vüwa siepevühwa wiethuoh, tinü no zhükümüjie vünüh hi vü jüma küüsaluo,” ti küza. Jütisanü rügizhülewa tü ma vünüh tewa.

Maria Elizabeth vü Küwa

³⁹ Jüsevü Maria tü süra nü küükhrü tse küzhiho vü küpe anyuküji Judea vü wa.

⁴⁰ Thi ma tü Zekharia zheh lo vü tu nü Elizabeth khurü.

⁴¹ Thinü Elizabeth tü Maria nüh ma kükhuru jikhi thsü ünü atsa ma vo lovü tü küvehwa tü künga, thi Elizabeth tü Kümtse Sietse nüh pro.

⁴² Thi ma tü azhü zia tajinü, “Noh nyimzari azhie vünüh kümüngatsawa, thi atsa no lovü tüküvehwa nga kümüngatsawa.

⁴³ Thi eh Vüwa zah hi vü kürutü mokümjie küsa vünüh hi vü satsü thuoh lo?

⁴⁴ Küpakenühnyunü halie, noh nüh hi kükhurü jikhiwa e khüna vü ru ünü, eh vo lovü atsa tüküvehwa nga lozhe nü küngavehthuo

⁴⁵ Thi Vüwa nüh ma vü küüzari sajuwie naveh ta tsotü küpehvühwa nga kümüngatsawa wiethuoh,” ti küza.

Maria nüh Küsiake Zah Küsa

⁴⁶ Thinü Maria nüh, “Eh luoveh tü Vüwa siekevehthuoh;

⁴⁷ eh sietse nga Saküüwuowa küülolewa vünüh lozhevehthuoh.

⁴⁸ Küpakenühnyunü ma nüh ma siepevüh kürünyiewa nga sakümüsie kütsüthuoh kenüh. Küpakenühnyunü halie, nosü vünüh tu vünü hi tü kümüngatsawa ta ji nathuoh.

⁴⁹ Küpakenühnyunü Kükhrawa ma mpa eh kenüh zanyo küji sakütsüthuoh kenüh.

⁵⁰ Ma küümze thuoüji ma kükrüri vü awurawura küju peveh.

⁵¹ Ma mpa ma pie vünüh kükhra kütsamüthuoh, thi mari luoveh vü müshe taji kütse kürhiezari tü saküvohriemüthuoh.

⁵² Ma nüh kükhrari mari kajiperi vünüh vikütsuomüthuoh, thi kürünyia vü küperi khakemüthuoh.

⁵³ Zanyo kümühie vi rüma kütseri saküpromütüthuoh, thi ma nüh nyirhieri sakürütso nü küzemüthuoh.

⁵⁴ Ma nüh ma siepewa Israel kükratsüthuoh, ma küümzewa müsheke taji.

⁵⁵ Ma nüh hiri pa Abraham thi ma küshukürari vü küüza kümüjie.”

⁵⁶ Thi Maria tü asah küche kümüjie Elizabeth vü nyipe taji ma zheh vü shele tewa.

Johan Baptist Küwuo

⁵⁷ Elizabeth tü atsa küwuo tsotho teru ünü nyimpari küsü wuo.

⁵⁸ Ma zhephruri thi ma küshuküturi tü küümze aküji vi ma küütsa kenüh ma sie lozhe kheh.

⁵⁹ Rülo tüzeawa mari tü atsawa ahu rhe nti ru, thinü mari tü ma pa anyo Zekharia vi taji ji nti sa,

⁶⁰ thitü ma za nüh, “Jütiküsawa nyu, ma tü Johan ta jinaveh,” ti küza.

⁶¹ Thinü mari nüh ma vü, “Noh küshuküra nyi küsü nga anyo hama müjie ji wie,” ti küza.

⁶² Thinü mari nüh amüke sa ma pa kütsa taji ma nü mokümjie vünüh jingüveh nüh ti küsa küna.

⁶³ Thinü ma nüh alokhie khuo taji kürhü, ma nyo thuoüji “Johan”, ti rhü. Jütiküsavü mari aveh tü ngo sheh.

⁶⁴ Thinü müküzhikewiethuoh nüh ma po poka teru thi ma mizhi tü künyah teru, jütisataji ma tü azhü phra nü Saküüwuowa siake.

⁶⁵ Jütiküsavü mari zhephru aveh tü krü thi ngo kheh. Thi zanyo hari aveh Judea azhih küzhiho vü kürhori aveh vü ha luo tewa.

⁶⁶ Azhü hama küthsüri nüh mari luoveh vünüh müshe taji, “Tsa hama tü thuohtüvü mowa sanathuoh lo? Küpakenühnyunü Vüwa ake tü ma vü pemüthuoh nü,” ti sa.

Zekharia nüh Setsaküthsüzhü Küphra

⁶⁷ Thinü ma pa Zekharia tü Kümtse Sietse nüh ma pro nü setsaküthsüzhü küphra hakümjie:

⁶⁸ “Israel Vüwa Saküüwuowa kütsiawa saluo, küpakenühnyunü ma nüh ma nyiri notü thi küloletsü,

⁶⁹ Ma siepe David küshuküra vünüh ma nüh küülolewa rütsü hiri vü tsümüthuoh,

⁷⁰ Ma nüh setsaküthsü atükhura po vünüh nga azhü jükümjie küsari küzake küsa kümüjie,

⁷¹ Jümatü hiri mükünongüri vünüh külole na küsa kenüh, thi hiri mükünongüri ake vünüh külole na küsa kenüh.

⁷² Hiri pari vü kümüze phrazhu küsari sana küsa kenüh, thi zhühthuoküsa kümtsewa müshe na küsa kenüh.

⁷³ Ma nüh hiri pa Abraham vü küüshie zhü tsüküsawa,

⁷⁴ hiri mükünongüri ake vünüh külole küsa kümüjie hiri tü mükrüthuoh nüh ma zhu küro na küsa kenüh.

⁷⁵ Thi hiri kürho vü rülo aveh nga mütse thi zhütsa na küsa kenüh,

⁷⁶ thi no atsawa tü setsaküthsü Kümüsie Tsawa ta ji naveh, küpakenühnyunü noh tü Vüwa atüvü wa taji ma lekhujiri küche naküveh kenüh.

⁷⁷ Ma nyiri vü küülole aküthsüwa tsü nü mari kükhiemuowa nojatsü naveh,

⁷⁸ Saküüwuowa küümze kürünyi vünüh arülowa rügi vünüh hiri vü wieke taji,

⁷⁹ Aküzo vü peküvehri vü thi aküsü sietse vü peküvehri vü aküwie tsü nta, thi hiri sie kütsathuoh lekhuji vü thse nta,” ti küza.

⁸⁰ Thi atsawatü satsa vü nga thi sietse vü nga ji thi müzhora, thi ma Israelri atüvü müjie küüngu küju nü areza vü rho.