LEVIRI 1 - KÜMÜTSE Naga Bible (BSI)

Küsahthuo vü Ajü Kütso

¹ Vüwa nüh Mosa ji nü juhthsü nazizheh vünüh ma vü,

² Israel nyiri nüh zanyoküthse viküru vü, jüma tü ma nyihnyih nyutü anyihzhü nyutü ma mieshü-miesa vünüh viru üti küza luo.

³ Azhüazhü ma nüh küthsewa tü ma nyihnyih vünüh kütso kükhurü kenüh thuoüji, jüma tü avo azhührhü müküpe saluo, thi jüma tü juhthsü nazizheh mükhie vünüh müsaji mümhie, jüti sanü ma tü Vüwa tüvü ma küvira küsanaveh;

⁴ ma ke tü kütso kükhurüwa alü rügi vü thsuoke nü kütsathuo sanü ma kenüh küvira sanaveh.

⁵ Jüti sanü ma nüh Vüwa tüvü nüh shüvotsawa fethe nü Aron tsa nyimpari navüri nüh azühwa Vüwa vünüh vi nü juhthsü nazizheh lehpie kütuoh vü kükhurüpewa nato aveh vü zümkiele naveh.

⁶ Jüti sanü ma nüh tso nü khurüna saküveh shüvotsawa sahu müzuom nü asawa teh taji;

⁷ Aron atsa navüri nüh kükhurüpewa rügivü anyih thse thi ma nyiehvü kümhieta athsohthse naveh.

⁸ Thi mari nüh asa tehnya küsari, alü thi ma küthüri vi nü kükhurüpe rügivü anyih thse nü athsoh saküveh rügivü thse naveh.

⁹ Thitü ma votsasari thi ajihri thuoüji phrühm naveh. Jüti sanü navüwa nüh kütso kükhurü sanü kükhurüpe vünüh jüma ajü tso nü jüma tü anyih vünüh kükhurü sataji Vüwa vü arheküüngu küsü küsa naveh.

¹⁰ Mükütüküzü ma nüh kütsüwa tü kütso kükhurü küsü küsa nta ase-ashuh vünüh, nyihzhü vünüh nyutü anyihsü vünüh thuoüji avo azhührhü müküpe tsü naveh.

¹¹ Thi jüma tü kükhurüpe zhietü wuovü Vüwa tüvü nüh fethe nü Aron atsa navüri nüh jüma züh vi nü kükhurüpewa zümkiele naveh.

¹² Jüti sanü ma nüh asa jüma alü nga thi ma küthü nga ti ajü tehnya nü kükhurüpewa rügivü anyih anyiehvü athsoh thse küsawa rügivü kümhieta sanaveh;

¹³ thitü votsasari thi ajihri thuoüji ajuh nüh phrühm naveh. Jüti sanü navüwa nüh kütsokükhurü sanü kükhurüpewa vünüh jüma ajü tso nü jüma tü anyih vünüh kükhurü sataji Vüwa vü arheküüngu küsü küsanaveh.

¹⁴ “Mükütüküzü nüh ma nüh Vüwa vü kütsüwa tü amüwa thuoüji jüma tü ato mükhrietü kükala nyuji azheh mükhrietü kükala sanaveh.

¹⁵ Jümatü navüwa nüh kükhurüpewa vü viru nü ma ku kürühthuo taji kükhurüpe rügivü nüh tso naveh, thi ma zühwa tü kükhurüpewa natonahuo vü kürüsü küzem naveh.

¹⁶ Thi ma tsuozhuori ma küneh thuoüji kükhurüpe zhieshu wuovü wejiku lovü thsem naveh.

¹⁷ Tüti sanü ma küsa asatsoh vünüh künyokhuo naveh, thitü shohthuo küüpawa nyu. Jüti sanü navüwa nüh kütso kükhurü sanü kükhurüpe vünüh jüma ajü tso taji jüma tü anyih vünüh kükhurü sanü Vüwa vü arheküüngu küsü küsanaveh.