KOLOSIRI 1 - KÜMÜTSE Naga Bible (BSI)

¹ Saküüwuowa müshe vünüh Khrista Jisu povü sakütsewa Paul thi Timothi hiri füwa nüh,

² Rhü nü Kolosi vü küpeh kümtseri thi zhütsanü fülüpuo sataji pehküvehri vü tsüveh. Saküüwuowa hiri Pawa vünüh küümze thi kürünyiwa nohri vü küpehwa saluo.

Kümünakütsü Kükhuo

³ Hisü nüh nohri kenüh kükhuo küsavü Vüwa Jisü Khrista Pa Saküüwuowa kümüna tsüpeh huoveh.

⁴ Küpakenühnyunü Khrista Jisu vü nohri kütsotü küpeh thi kümtseri aveh kenüh küümze küpeh küünara kenüh.

⁵ Küpakenühnyunü nohri kenüh rügivü küluozhewa sakümüthuoh kenüh. Hamatü nohri nüh khanavü nüh küzhütsazhü Zhühthe Kümühie vünüh künarathuoh.

⁶ Jümatü nohri vü ruthuoh, jükümjie azhih aveh vü avi pevehthuoh thi shivehthuoh, nohri nüh küsie nüh Saküüwuowa küümze küzhütsawa künara thi thsüra nüh jürülo vünüh nohri azhie vü nga avi pe thi shivehthuoh.

⁷ Jümatü nohri nüh kürü siepe sakütse küümzetsahwa Epafra vünüh thsüra thuoh. Ma thuoüji hiri müthoh vünüh Khrista küüro küsa küzhütsari küsü.

⁸ Thi Sietse vünüh ma nüh nohri küümze nga hiri vü küthsütsüthuoh.

⁹ Thi jükenüh hisü nüh jüma küthsüra rülo vünüh nohri kenüh hisü nüh mükükhuotuowa thuoüji sietse kümahtsa thi kümüshi aveh ma kümüshe zanyoküthsü nohri pro na küsa kenüh wiethuoh.

¹⁰ Vüwa kümüshe kümüjie vünüh nohri kürho rhotsü, ma külo sajutsü, küüro kümühie aveh vü avi pe, thi Saküüwuowa küthsü vü küzhitsa wa nti küsa kenüh wiethuoh.

¹¹ Ma küthohla kükhra kümüjie vünüh kükhra aveh vi nohri sakükhratsü, luoveh küüzhike aveh vü thi luoveh suo nü lozhera naveh.

¹² Loküzhe vünüh kümtseri akawa nyi küsü küsara sakütsüwa Pawa vü kümüna tsüluo.

¹³ Aküzo nüh hiri nyia takrü sanü pehküveh vünüh hiri vizhu nü hiri sie ma nüh küümzetsah Tsawa kajipe vü savehthuoh,

¹⁴ ma vünüh hiri tü kürhesa pehra thi kükhiemuori noküja pehra.

Khrista Nyito thi Ma Küüro

¹⁵ Ma thuoüji müküngura Saküüwuowa atsowa wiethuoh; zanyo aveh atüvü küpehlawa wiethuoh.

¹⁶ Küpakenühnyunü ma vünüh zanyo aveh nga sa, rügivü nga satü, thi azhih vü nga satü, ngu küvehri nga satü thi mükünguringa satü kajiperi nga nyutü takrüri nga satü nyutü lüküvüri nga satü nyutü kükhrari nga satü zanyo aveh ma vünüh thi ma kenüh sakheh.

¹⁷ Ma thuoüji zanyo aveh atüvü küpehlawa wiethuoh, thi zanyo aveh nga ma vünüh küsü saveh.

¹⁸ Ma tü satsa lüwa, jümatü kümühuwa; ma thuoüji küsatekhuwa, aküsü vünüh kürholekhuwa, jümatü zanyo aveh vü ma nüh küthohla khuwa küüsa nti küsa kenüh wiethuoh.

¹⁹ Küpakenühnyunü Khrista vünüh Saküüwuowa kürho aveh sajuveh.

²⁰ Ma vünüh zanyo aveh nga ma mpa ma vü siekütsarü sara, azhih vü nga satü nyutü rügivü nga satü ma khieluothso azühwa nüh kütsathuoh satsü.

²¹ Thi nohri nga küsükeri müküchiekeri sa thi luoveh vü mükünongü peh nü küüro kümüsüri saru.

²² Thitü khinyi thuoüji mütse thi müküle münyie nüh thi küzükrü münyie nüh ma tüvü tsü na küsa kenüh Khrista nüh sü nü ma satsa vünüh sakükatsümüthuoh.

²³ Mükütuotü kütsotüwa sapeh huo, mükhaphrükhale nüh thi müzho nü, nohri nüh zhühlekümühie küünarawa vünüh mükütseletümü, jümatü thajüwu kükhuvü kütseri aveh vü küzamüthuoh, hi Paul nga jüma küüro satetsethuoh.

Siepe kümüjie vünüh Paul nüh Nazizheh vü Küüro

²⁴ Nohri kenüh eh kümnomnari khinyi eh lozheveh, thi ma satsa, jümatü Nazizheh kenüh Khrista kümnomna müküsajura eh satsa vünüh sajutsü.

²⁵ Saküüwuowa zhü küüthsüju na küsa kenüh rügivü küüro müzhe taji hi tü nohri kenüh küüro hama kütsü kümüjie hi nga kürotseveh,

²⁶ atükhuri thi kürhokhuri vünüh azhüküshehwa ma nyi kümtseri vü küthsütsümüthuoh.

²⁷ Judahmükünyuri azhievü zhüküsheh hamatü küzakele ji, mühie thi thohlathohvü nüh ta küsa küthsü na küsa kenüh Saküüwuowa nüh mari rüka.

²⁸ Hiri tü nyi küsüsü Khrista zhühku phrate tseveh, nyiri aveh vü küthotsü thi aküthsü aveh vi nyiri aveh vü sosie, jümatü Khrista vünüh hiri aveh nga khruo nü tsü naküsa kenüh.

²⁹ Hama kenüh eh kükhra thse nü kürotse, ma nüh hi vü sakükhra taji kütse kümüjie eh kümüzho vünüh wurie tseveh.