JOHAN 1 - KÜMÜTSE Naga Bible (BSI)

Azhüwa Satsa Küje

¹ Tükhu vünüh Zhüwa tü pelawiethuoh, thi Zhüwa tü Saküüwuowa sietsewiethuoh, thi Zhüwa tü Saküüwuowa wiethuoh.

² Ma tü tükhu vünüh Saküüwuowa sietse wiethuoh.

³ Zanyo aveh ma vünüh sa wie, thi saküsaringa ma vünüh mükünyunü zanyoküsü nga samüsa.

⁴ Akürhowa tü ma vü peh veh, thi akürho jümawa tü nyiri kenüh küwiewa.

⁵ Küwiewa tü küzo vü wieketsüveh, thi küzowa tü jüma müchara nüh samü.

⁶ Saküüwuowa vünüh nyi küsü küze, thi jümatü Johan.

⁷ Ma vünüh nyiri aveh nga kütsotü peh na küsa kenüh ma tü küwiewa povü sanü küza ru.

⁸ Ma tü küwiewa nyu, thitü küwiewa povü sa nta küruwie.

⁹ Nyiri aveh wieketsü nta küsa küwie tsahwa tü azhih hala ruwie naveh.

¹⁰ Ma tü ru azhih vü rho, thi azhihwa tü ma vünüh sa, thitü azhihwa tü ma müthsü nüh samü.

¹¹ Ma mpa ma nyiri vü ru, thitü ma mpa ma nyiri nüh ma müsieke nüh samü.

¹² Thitü ma nyo tsotü nü ma küsiekeri aveh thuoüji Saküüwuowa tsari küsana küsa kenüh kükhra tsümüthuoh.

¹³ Jümaritü azüh vünüh nyutü satsa vünüh nyutü nyiri vünüh müwuo nü Saküüwuowa vünüh küwuowie.

¹⁴ Thi Zhüwa tü satsa je taji nyiri azavü rho, küümze thi küzhütsa pro, hiri nüh ma kümühie ngu, kümühie jümatü ma nüh Pawa vünüh küümzetsahwa Tsa ta küsa ngura.

¹⁵ Johan nüh zie taji ma povü sanü, “Eh sevü kütsewa thuoüji eh nyia vünüh ji veh, küpakenühnyunü ma tü e tü vünüh kütselawa wiethuoh ti hi nüh küüzawa wiethuoh,” ti küza.

¹⁶ Thi hiri aveh nga ma küümze küpro vünüh kümüze nyia vünüh küümze vi hiri tsü.

¹⁷ Küpakenühnyunü Khonyoh thuoüji Mosa vünüh tsü, thitü küümze thi küzhütsa thuoüji Jisu Khrista vünüh shuküruwie.

¹⁸ Khinyiküju nyi küsü nga Saküüwuowa müjie ngu, Pawa küso rügivü küpe Tsa küümzetsahwa vü mpa ma nüh saküüthsüwie.

Johan Baptistwa Zhühle

¹⁹ Thi Judahri nüh Jerusalem vünüh levüri thi Leviri Johan vü küze taji ma tü thawa nüh ti küsa küna üti küüze vü Johan nüh povü küsa zhü hamari:

²⁰ Ma tü mükürüwiethuoh nüh phrazhu taji, “Hi nü Messiah nyu,” ti küza.

²¹ Thinü mari nüh, “Thinü noh tü thawa lo? Noh tü Elijah ülo?” ti küna. Thitü ma nüh, “Hi nü nyu,” ti küza “Thinü noh tü setsaküthsüri ülo?” ti küna. Thitü ma nüh, “Hi nü nyu,” ti rületsü.

²² Mari nüh ma vü künalehü taji, “Thinü noh tü thawa lo? Hiri küüzeri vü wa küza na küsa kenüh noh tü thawa nüh hiri vü küza luo,” ti khuo.

²³ Jütiküsavü ma nüh Isaya setsaküthsüwa lasi vünüh phrazhu taji mari vü rületsü nü: “Hi thuoüji nyi küsü reza vü zie taji kütsewa: Vüwa küzekütse kenüh ma lekhuji sakümüsho luo ta sakütsewa wiethuoh,” ti küza.

²⁴ Nyi hamari tü Farisiri vünüh küüzewie.

²⁵ Mari nüh ma vü, “Noh tü Khrista nga nyu, nyutü Elijah nga nyu, nyutü setsaküthsüri nga nyuji noh tü mokenüh nyuri baptis saveh lo?” ti küna.

²⁶ Thinü Johan nüh mari vü, “Hi thuoüji aju vünüh baptis sa veh, thitü nohri azhie vü nohri nüh müküthsü küsü tsieveh.

²⁷ Ma tü eh sevü tse veh, hi thuoüji ma jiküükruvüh li wienga mületse,” ti küza.

²⁸ Haritü Johan nüh nyuri baptis kütsü Jordan rügu Bethani vünüh küza.

Saküüwuowa Nyihzhüza

²⁹ Rülo künyiawa ma tü Jisu ma vü kütse ngu ünü, “Halie, Saküüwuowa Tsa azhihwa kükhiemuo küvütüwa!

³⁰ Eh tüvü nyi küsü tsieveh ti hi nüh küüzawa tü hamathuoh, ma tü eh nyia vünüh ji, küpakenühnyunü ma tü eh tü vünüh kütsethuoh kenüh.

³¹ Hi wie nga ma müthsü, thitü Israelri vü küthsütsü naküsa kenüh hi tü baptis kütsüwie,” ti küza.

³² Johan nüh povü salehü taji, Sietsewa rügi vünüh mükhrietü kümüjie turu ma vü küpeh hi nüh ngu wiethuoh.

³³ Hi nga ma müthsü, thitü baptis tsü üta hi küüzewa nüh hi vü, “Sietsewa turu ma vü küpeh künguwa jümatü Kümtse Sietse vünüh nyuri baptis sana küsawa wiethuoh.”

³⁴ Thi hi tü jü ngu nü hamatü Saküüwuowa Tsa ta küsa povü satse, ti küza.

Jisu Sehnyi Küsa Pokhuri

³⁵ Rülo künyiawa Johan tü ma sehnyiri künyi sietse le veh ünü,

³⁶ ma nüh Jisu kütse ngu taji, “Tulie, Saküüwuowa Nyihzhü” ti küza.

³⁷ Thinü sehnyi masü tü ma nüh jüma küüza thsü taji Jisu senyitewa.

³⁸ Thinü Jisu nüh süle masü no ünü masü tü ma se nyikütse ngu nü, “Nohsü tü mowa phatse lo?” ti küna. Thinü masü nüh ma vü, “Rabbi (mazhünyo küsosiewa), noh tü khiela peveh lo?” ti küna.

³⁹ Jüti küünavü ma nüh masü vü, “Ra noluo,” ti küza. Thinü masü tü ru nü ma küpehpe no nü jü rülo masü tü ma vü nyi pehtewa, küpakenühnyunü jüma tsothovü tü münüle münühu müzü sakümüthuoh kenüh.

⁴⁰ Johan nüh küüzavü küünarawa nyi küsü thuoüji Simon Pitor anü Andrew.

⁴¹ Ma tü pokhu tsahwa ma jie Simon phara taji ma vü, “Hiri thuoüji Messiah (mazhünyo Khrista) pharathuoh,” ti küza.

⁴² Ma nüh ma jie sie nü Jisu vü ru. Thinü Jisu nüh ma nophoke taji ma vü, “Noh tü Johan tsa Simon thuoh thitü noh tü Sifas ta ji naveh,” (mazhünyo thuoüji “Aloh”).

Jisu nüh Filip thi Nathanael Küji

⁴³ Rülo künyiawa Jisu tü Galilee vü wa nti sanü wa ünü, Filip mütu taji ma vü, “Eh se nyi luo,” ti küza.

⁴⁴ Filip tü Andrew thi Pitor masü nüh kürho nyuküjiwa Bethsaida vünüh.

⁴⁵ Filip tü Nathanael mütu ünü ma vü, “Hiri nü Mosa Khonyoh vü thi setsaküthsüri nüh rhüküsawa Jisu Nazareth, Josef tsa ngu thuoh,” ti küza.

⁴⁶ Thinü Nathanael nüh ma vü, “Nazareth vünüh zanyokümühie shuramühieveh ülo?” ti sa. Thitü Filip nüh ma vü, “Ra taji noluo,” ti küza.

⁴⁷ Jisu nüh Nathanael ma vü kütse ngu taji ma vü, “Halie, Israelri müküle mükünyiewa,” ti küza.

⁴⁸ Nathanael nüh ma vü, “Noh tü mokümjie hi thsüra lo?” ti küna. Thinü Jisu nüh, “Filip nüh no müjieküji vünüh noh mparhu kükhu vü küpeh vünüh hi nüh noh nguthuoh,” ti rületsü.

⁴⁹ Thinü Nathanael nüh ma vü, “Rabbi, noh tü Saküüwuowa Tsa wiethuoh! Thi Israelri Kajiwa wiethuoh,” ti küza.

⁵⁰ Jisu nüh ma vü, “Noh amparhu kükhu vü peh nü ngu ti hi nüh noh vü küüza kenüh noh tü tsotü veh lo? Noh tü hama nyia vünüh zanyo küji ngu naveh,” ti küza.

⁵¹ Thinü ma nüh ma vü, “Hi nüh noh vü zhütsa vünüh küza naveh, thajüwu satsü taji Saküüwuowa zhüleri nyi Tsawa rügi vünüh kükhrukütsuo küsa noh ngu naveh,” ti küza.