JEMS 1 - KÜMÜTSE Naga Bible (BSI)

¹ Jems, Saküüwuowa thi Vüwa Jisu Khrista siepewa nüh Külozhe zhü vi Saküüwuowa anyi akuoh türakünyi azhih aveh vü vohrie tekütseri vü kütsü.

Kütsotü thi Küthsü

² Eh füri, kümüte rühle küpapa vünüh küru vü amüngukümühie ti chieke luo,

³ küpakenühnyunü no kütsotüwa nüh jümari küchara vü noh tü küüzhike pehraveh ta thsüra veh.

⁴ Noh küüzhike müsara nüh sakümü müsatümü taji no lekhuji aveh vü küüsatoh luo, jütathuoüji nohri tü jutsara thi tsera naveh, thi zanyoküsü nga küüphewa nyu.

⁵ Thitü nohri nyi wuori nüh küthsü küpheveh üji Saküüwuowa vü khuo luo, ma nüh jüma tsü naveh; küpakenühnyunü Saküüwuowa nüh aveh vü nga müküte nüh küzhietsü küveh kenüh.

⁶ Thitü noh nüh kükhuo küsavü müküütoh vünüh mükhuotü tsotü nü kükhuo saluo. Thari nüh müküütoh vünüh kükhuo sanaveh nüh amürhü nüh juhküji vü küshüh taji amürhü nüh wekütse kümüjie wiethuoh.

⁷ Küpakenühnyunü anyi jümatü Vüwa vünüh zanyo küsüküsü nga ngu nati mümüshetümü luo.

⁸ Luoveh künyi küsari thuoüji zanyo küsüküsü nga satü küsatohra münyie.

Kümükhuo thi Künyirhie

⁹ Khristanyiri thawa nüh mükhuo tse nüh Saküüwuowa nüh ma kükhake vü lomüzheji mümühie,

¹⁰ thi Khristanyi künyirhiewa tü Saküüwuowa nüh ma vikütsuo kümüvü lomüzheji mümühie. Küpakenühnyunü künyirhie tü are küwu kümüjie kretewa naveh.

¹¹ Arünyi tü ma küsa peh she nü shuru nü apra chüthemümüti; ma küwuri tü kretewawati, thi ma küzü tü zoriemümüti. Jükümjie nyirhieri tü ma mpa ma küpre satse thuoüji zoriemü naveh.

Kümüte thi Kümüjimüra

¹² Kümüte küru vü küüzhikerari nü kümüngatsari, küpakenühnyunü kümüte jüma kükarirari tü Saküüwuowa nüh ma küümzeri vü phrahteke küsa kürho kajilüwe ma jisuo ngu naveh.

¹³ Mükütüküzü kümüte jüma nüh nyi küsü müjimüra thuoüji, “Kümüjimüra hama tü Saküüwuowa vünüh küru ti müphratetümü.” Küpakenühnyunü Saküüwuowa tü kümüsü vi küümütewa nyu, thi ma wie nga küpari kümüra münyie.

¹⁴ Thitü nyi küsü nüh kietuo tewa thi ma mpa ma kümüsü kümünguwa nüh ma sakümüsü tse thuoüji kümüjimüra tü ruveh.

¹⁵ Jütisanü ma kümüsü kümünguwa atsamo nü wuo kükhiemuo tsütsüti; thi kükhiemuo tü khruomü thuoüji aküsü vü wuo tsütsüti.

¹⁶ Küümüze eh füri, nyuri nüh müküümüratümü!

¹⁷ Zanyo aküte kümühie aveh thi aküju kütsü aveh thajüwu vünüh ru veh; jümatü Saküüwuowa vünüh ru veh, thajüwu küwie aveh Küsawa, kükhaphrükhale vünüh küpa müsa nyutü sietse kümüjie mükhaphrükhale.

¹⁸ Azhütsa vünüh ma mpa ma müshe vünüh hiri tü satsü, jütisataji hiri tü ma nüh küsa aveh nyia avi apokhuwa küüsa nta sa tsü.

Küüna thi Küsa

¹⁹ Küümüze eh füri hama müsheluo! Nyiri aveh nga shishiti küna luo thitü pre nü küphrahte müsatümü thi shishiti arümüshutümü.

²⁰ Nyira rüküshu thuoüji Saküüwuowa künyitsa kümüshewa samüküjira.

²¹ Jükenüh khuke mükümtse aveh thi nohri kürho rühle kümüsü aveh vijamü luo. Saküüwuowa kükhu vü peh luo thi nohri küülolera nohri luoveh lovü küche küsa zhüwa vi luo.

²² Azhüwa mpa küna taji noh mpa no mümüratümü; jüüta nyu nü küna küsari vi nü küüro vü vimüthse üji mümühie.

²³ Thawa nüh azhüwa küna nü vi küüro vü müthse nüh sanaveh nüh jüma thuoüji ma mpa anyikünovüh vü no nü ma mpa ma mokümjie ünüh küngu kümüjie wiethuoh.

²⁴ Ma mpa ma kümühie ta no nü tewa nü shita ma mpa ma mokümjie ünüh kümaküm kümüjiewiethuoh.

²⁵ Thitü thawa nüh kütuosheke nü nyiri sakürüzihkütsü khonyo küjutsahwa no, jümawa vü luoveh tsah thse thi küüna mülie mpa sanü jüma kümamühmü nüh vi küüro lovü thse thuoüji ma nüh mowa küro ünüh Saküüwuowa nüh tsia tsü naveh.

²⁶ Nyi wuori nüh ma mpa anale küvi kümühieri ta müshe veh ülo? Mükütüküzü ma nüh ma mizhi mükhete thuoüji ma nale tü moma sathuoh thi ma tü ma mpa ma müra vehthuoh.

²⁷ Saküüwuowa nüh anale kümtsetsahwa thi zhütsa ta küsawa thuoüji hama: mürari thi tünyivühri kümnomna vü no thi azhihwa vünüh ma mpa ma samüküümüne ti küsawa wiethuoh.