DANIEL 1 - KÜMÜTSE Naga Bible (BSI)

Daniel thi

¹ Judah Kajiwa Jehoiakim kükaji mahvi kücheawa vü, Babilon Kajiwa Nebukhadnezzar tü ru nü Jerusalem mükiete.

² Vüwa nüh Judah Kajiwa Jehoiakim thi Saküüwuowa zheh vü atsokrüri suo, ti vi nü ma ke akükhra vü thsem. Ma nüh hamari vi Shinar zhih vü ru nü ma nyiazari künyirhieku lovü sam.

³ Jüti sanü kajiwa nüh ma kajizheh lehvüwa Ashbenaz vü Israelri kaji tharuo thi zanyoküthsüri sieru üti azhütsü,

⁴ küviza azhührhü müküpe asazüh küju, kükala thi kümtsa aveh vü mahtsa, zanyoküthsü aveh küpeh, küthsükümshi küthsüra, thi kajiwa kajizheh vü akütsüküsa sakümjieluora, thi Khaldeara lasikie thi azhü vi mari sosie na küsa kenüh sieru luo.

⁵ Kajiwa nüh kajira kütsaküzhu awihshie thi akhah rülorülo suope küsüsü vi mari tsü. Mari tü mahvi küche zanyosaküüthsü naveh, jüta thuoüji asehkhe vü thuoüji mari tü kajiwa anyula vü saküüpe ra nathuoh.

⁶ Hamari azhievü tü Daniel, Hanania, Mishael, thi Azaria, mari aveh nga Judah akuoh vünüh.

⁷ Kajizheh lehvüwa nüh ma nyori küpa jitsü kheh. Daniel thuoüji Belteshazar, Hanania nyo thuoüji Shadrak ti jitsü, Mishael thuoüji Mashak ti jitsü, thi Azaria nyo nü Abednego ti jitsü.

⁸ Thitü Daniel tü kajira kütsaküzhu thi akhah vi nü ma mpa ma saküümnewa nyu ti kürathuo; jüti sanü ma nüh kajizheh lehvüwa vü ma samküümne tüm üti khuo.

⁹ Saküüwuowa nüh Daniel tü kajizheh lehvüwa vünüh küütso thi rüthaküna küngura küsam.

¹⁰ Kajizheh lehvüwa krü veh, ma nüh noh shie thi noh küzhu chiekem thuoh nü. Mükütüküzü noh tü noh sie afü küsü küsari anyiehvü nüh asatsa nomsüm thuoüji, noh nüh eh lü tü kajiwa vü akükrü thsemthuoh nü, ti küza.

¹¹ Thi nüh Daniel nüh kajizheh lehvüwa nüh Daniel, Hanania, Mishael thi Azaria nyiehvü arieh huo saküvehwa vü.

¹² “Münathetü rülo türake azhievü nüh noh sieperi noluo. Anyawa vi hiri küütsa thi ajuh vi hiri küüzhu luo.

¹³ Noh tü jüta thuoüji hiri atso tü kajira kütsaküzhu kütsa vizara tso sie müjiehra naveh, thi noh nüh mokümjie vünüh no veh ünüh jükümjie vünüh noh sieperi vü sara naveh,” ti küza.

¹⁴ Jüti küüza vü ma tü amüsheküthse hama nyie üti sanü rülo türake mari müteno.

¹⁵ Rülo türake sehkhe vü mari tü kajira kütsaküzhu tsaküveh vizari aveh nyiehvü nüh mpha thi thü ti küsa ngura.

¹⁶ Jükenüh ariehuowa nüh kajira kütsaküzhu thi akhah mari nüh zhu na küsa vishele peh huo nü nyawashie tsü.

¹⁷ Viza hamari müzü vü tü Saküüwuowa nüh thsürhüzhu thi kümtsa rüleh aveh vü zanyoküthsü thi kümtsa tsü, Daniel kümohtsa thi amoh küthsükümshi aveh nga peh.

¹⁸ Atsotho sehkhe vü kajiwa nüh mari sieturu üta azhükütsü vü kajizheh lehvüwa nüh Nebukhadnezzar atüvü mari sie ru,

¹⁹ thinü kajiwa nüh mari sie jüle. Mari aveh azhievü nyi küsü nga Daniel, Hanania, Mishael thi Azaria sie mümjiehra nüh sam, jükenüh mari tü kajiwa zheh vü küüpeh.

²⁰ Kümahtsa thi küthsükümshi akero aveh kajiwa nüh mari vü küüna vü ma kajipe aveh vü amünguküüzari thi mahtsari aveh nyiehvü nüh mari nüh türakeri küümpha kajiwa nüh ngura.

²¹ Thi Daniel tü kajiwa Sairas mahvi pokhuwa küju jüla peh.