ATÜTSAR 1 - KÜMÜTSE Naga Bible (BSI)

Saküüje Zhüku

¹ Tükhu vü Saküüwuowa nüh atülü thi azhih sa.

² Thitü azhihwa tü ma tso münyie thi kürütso wie. Thi aküzo nüh azhih nyieh vü aküsheh aveh külüwute peh. Thinü Saküüwuowa Sietse nüh ajuh nyieh vü küngah peh.

³ Jüti küsa vü Saküüwuowa nüh, “Küwiewa shuruluo,” ti küza, thinü küwiewa shuru tsa.

⁴ Thi Saküüwuowa nüh küwiewa ngu nü mhiem ti sa. Jüti sanü Saküüwuowa nüh aküwie tü aküzo vünüh chithuo küpamtü.

⁵ Jüti sanü Saküüwuowa nüh küwiewa vi “Rülo” ti ji, thi küzowa vi “Rüza” ti ji. Thi münüleh, thi rüne ti küsa rülo pokhuwa.

⁶ Thinü Saküüwuowa nüh, “Ajuh azhila vünüh küchithuo rügi vünüh atülü turu nü ajuhri chithuo küpa üti küza.”

⁷ Jüti küsa vü Saküüwuowa nüh atülü sa, thi atülü jüma nüh anyieh vü nga thi kükhu vü nga ajuhri chithuo küpatü.

⁸ Thi Saküüwuowa nüh arügi jüma vi “Tülü” ti ji. Thinü münüleh, thi arüne ti küsa rülo künyiawa.

⁹ Jüsevü Saküüwuowa nüh, “Atülü kükhu vü ajuhri tü azhie küsü vü küjiketewa nü azhie küüweh küshu üti küza,” thinü jüti sara tsa.

¹⁰ Jüti küsa vü Saküüwuowa nüh azhie küüwehri tü “Azhih” ti ji nü ajuh wa taji nyorüluo küpehri vi “Asuozü” ti ji. Saküüwuowa nüh jüma ngu nü mhiem ti sa.

¹¹ Jüsevü Saküüwuowa nüh, azhihwa tü aphrato, are, avi küperi, avi küpe athsoh, ma vünüh avi küpelera athsoh atha ma vü kütü shozhu üti küza, thinü jüti sara tsa.

¹² Jüti sanü müzhüjah nüh azhihwa tü aphrato, thi are avi küpe, ma vünüh jükümjie atha kütülera, thi athsoh avi küpe, ma vü atha kütü jüma kümjie küsa shuru kheh tsa: thinü Saküüwuowa nüh jümari ngu nü mhieküm kenüh jüma tü “mhiem,” ti sa.

¹³ Thi münüleh, thi arüne ti küsa rülo kücheawa.

¹⁴ Jüsevü Saküüwuowa nüh, “Atülü rügi vü aküwieri shuküüru nü arüza vünüh arülo saküpazhutsüluo, azaleri, arülori, thi amahviri athsoshi saküüpatsüluo,

¹⁵ thi jümari tü thajüwu rügi vü aküwieri sanü azhih nyieh vü wieketsü üti küza,” thinü jüti sara tsa.

¹⁶ Thi Saküüwuowa nüh aküwie küji künyi sa: Asa thi arünyi, aküwie küjiwa nüh arülo vü küketezhiwa sa, thi aküzahwa nüh arüza vü küketewa sa, ma nüh awutsiri nga sa.

¹⁷ Azhih vü küüwie nta küsa kenüh Saküüwuowa nüh jümari sanü thajüwu rügi vü saküüthuotsü.

¹⁸ Arülo vü thi arüza vü kükete thi aküzowa vü nüh aküwie chithuozhu küpamtü. Thi Saküüwuowa nüh ngu nü mhiem, ti sa.

¹⁹ Münüleh, thi arüne ti küsa rülo amüzüawa.

²⁰ Thinü Saküüwuowa nüh, “Ajuh vünüh ma lovü kütü kürholi küpeh müküzüküzü küüpro luo, thi amürhü rügi vü prükütse amüwari küüpro luo,” ti küza.

²¹ Jüti sanü Saküüwuowa nüh anga küjiji thi ajuh lovü tü nü küngah kütse papara küthse küsa aveh ajuh lovü nüh khieloti shuru thi prükütse amüwari papara küthse khieloti satsü, Saküüwuowa nüh jüri ngu nü mhiem, ti sa.

²² Saküüwuowa nüh jümari vü tsiatsü nü küüza. “Avi pesheh luo thi saküzhi luo, juhküjiri saküpro luo, thi amüwari nga saküzhi nü azhih pro luo,” ti küza.

²³ Münüleh, thi arüne ti küsa rülo müngaawa.

²⁴ Jüsevü Saküüwuowa nüh, “Azhihwa tü samwa papara küthse vünüh küüshu luo, ase-ashuh nga ato vü kürho zhukütseri nga thi asa küjiri nga shuru luo,” ti küza, thinü jüti satsa.

²⁵ Jüti sanü Saküüwuowa nüh rezasari papara küthse vünüh, thi ase-ashuhri papara küthse vünüh thi azhih vü zhukütseri aveh papara küthse vünüh satsü kheh. Saküüwuowa nüh jümari ngu nü mhiem, ti sa.

²⁶ Thinü Saküüwuowa nüh, “Hiri kümjie hiri küthse vü nüh anyiri sa ünüh raluo, thi mari nüh juhküji lovü angari, thi amürhü vü prükütse amüwari, thi ase-ashuhri, thi azhih aveh anyieh vü, thi azhih vü zhukütse aveh anyiehvü kükhra küüvi naveh,” ti küza.

²⁷ Jüti sanü Saküüwuowa nüh ma mpa ma küthse anyiri sa. Ma nüh nyimpa thi nyimza sa.

²⁸ Saküüwuowa nüh tsiatsü nü masü vü, “Atsa jeshia luo, thi kümwumra zhiluo, thi azhih saküpro luo, thi jümari kete luo, thi juhküji vü angari thi amürhü vü prü kütse amüwari thi azhih vü rho nü küngah kütse aveh anyieh vü kete nü rholuo.

²⁹ “Hi nüh azhih aveh vü are avi küpe aveh, thi athsoh avi pekütsü aveh vi noh shie sa üti tsümthuoh.

³⁰ Thi azhih vü asa aveh vü, thi amürhü vü prükütse amüwari vü thi zhukütse kürholi aveh vü arekümzhi vi mari ashie sa üti tsümthuoh,” ti küza. Thinü jüti satsa.

³¹ Saküüwuowa tü ma nüh küsa zanyori aveh no nü jümari tü mhie sheh. Tinü münüleh, thi rüne ti küsa rülo türoawa.