AMOS 1 - KÜMÜTSE Naga Bible (BSI)

¹ Mükhrüküüzhüh mahvi künyi atüvü Teboa nyihzhükühuora zavü Küpehwa Amos zhüri, kajiwa Uzziah Judah rülo vü thi Joash Israelwa atsa kajiwa Jeroboam rülo vü Israel kenüh ma nüh küngu.

Israel Zhephruri rügivü Ashih

² Thi ma nüh: Zion vünüh Vüwa rümuo vehthuoh, thi Jerusalem vünüh ma khi phrazhu vehthuoh; nyihzhükühuora rekümzhiri tü wazhümthuoh, thi Karmel rügi tü küwehmthuoh, ta küza.

³ Vüwa nüh hakümjie küza veh: Damaska küphrürie küche kenüh, thi müzüawa kenüh hi tü kümnomnakütsü lekümwa nyu; küpakenühnyunü mari nüh amürü amütha küfevüh nüh Gilead rütse kümthuoh kenüh.

⁴ Jükenüh hi nüh Hazael zheh rügivü anyih küsü küze naveh, thi jüma nüh Benhadad shiehkukümzhori zorie naveh.

⁵ Damaska kheri rüpethsohri hi nüh zoshijam naveh, thi rhoküpehri hi nüh Aven Nyuo vünüh zothem naveh, thi Betheden vünüh kajikütsüh küjehküvehwa ti vijam naveh; thi Aram nyiri tü Kir vü küsi küüsam naveh, ta Vüwa nüh küza.

⁶ Vüwa nüh hakümjie küza veh: Gaza küphrürie küche kenüh, thi amüzüawa kenüh, hi nüh saküümnomna külewa nyu; küpakenühnyunü mari nüh anyiri aveh aküsi vü siete küwa kenüh, Edom ke vü thsemü nta,

⁷ jükenüh hi nüh Gaza shiehku rügivü anyih küsü küze naveh, ma shiehkukümzhori zorie na küsa anyih.

⁸ Hi nüh Ashdod vünüh arhieri vijam naveh, thi Ashkelon vünüh kajikütsüh küüjehwa nga; hi nüh Edom vü eh ke sühleru naveh, thi Filistin kümtori tü pokahm naveh, ta Vüwa Saküüwuowa nüh küza.

⁹ Vüwa nüh hakümjie küza veh: Tair küphrürie küche kenüh, thi müzü kenüh hi nüh kümnomnakütsü küsü nga külewa nyu; küpakenühnyunü mari nüh anyiri aveh Edom vü vizhutsüküm kenüh, thi kajiküsa kütsathuozhüwa mükümsheke kenüh.

¹⁰ Jükenüh hi nüh Tair shiehku rügivü anyih küze naveh, ma shiehkukümzhowa zorie na küsa anyih.

¹¹ Vüwa nüh hakümjie küza veh: Edom küphrürie küche kenüh, thi müzüawa kenüh, hi nüh kümnomnakütsü külewa nyu; küpakenühnyunü ma nüh anyuchuwa vi nü ma jie zhe taji norüthaküna aveh vijaküm kenüh; ma nüh ma rüküshu tü müküsaji wiethuoh nüh küsa kenüh, thi ma rükümthowa küsuokürho küsa kenüh.

¹² Jükenüh hi nüh Teman vü anyih küze naveh, thi jüma nüh Bozra shiehkukümzhori zorie naveh.

¹³ Vüwa nüh hakümjie küza veh: Amonri küphrürie küche kenüh, thi müzü kenüh, hi nüh kümnomnakütsü külewa nyu; küpakenühnyunü mari nüh mari natonahuori saküji nta Gilead vü atsakümohvühri phiephie küm kenüh.

¹⁴ Jükenüh hi nüh Rabbah shiehku vü anyih zhuke naveh, ma shiehkukümzhori zorie na küsa anyih, arieküsa rülo vü aküzie vi nü, nyimzarhü rülo vü atsomrhü vi nü;

¹⁵ jüta thuoüji ma kajiri tü aküsi vü tetu nathuoh, ma thi ma küjiri sie nü, ta Vüwa nüh küza.