Filemɔŋ 1 - Bélaɓay a Gáŋvbôn

Hɛ̧nama

¹ Mi ɗé mbété nɛ́ mǐ Pôl, ka e ka vûn sɛl ɓay a nzáʼapéna a Zezú Kiris rá̧ Timoté nyîn a manárí̧, hí̧ mɔ̌ Filemɔŋ, mbáŋa péna a manárí̧.

² Rú nam mánǎa a manárí̧ Abiya kɔ́, rá̧ Arsipe mbáŋa bére a manárí̧ kɔ́, rá̧ mára̧ njuku láɓulawri ka e a ɓil vûn a mɔ̌ kɔ́y.

³ Béla rá̧ a vónáké a Gáŋvbôn, rá̧ Gáŋmbây Zezú Kiris, ké kaw kuu wǎyri.

Pôl zi awá hí̧ Gáŋvbôn ɓay tûl zína rá̧ láɓulaw a Filemɔŋ

⁴ Filemɔŋ, mi kaw kɛrɛ mɔ́ dát, a ɓil gɔ́ŋ Gáŋvbôn a mǐ, a zi awá hí̧ nɛ́ sêe too, ɓay tûló,

⁵ ɓayhí̧lé mi kaw láɓay a zína a mɔ̌, ka mɔ tɔ́ʼɔ hí̧ njuku láɓulawri, rá̧ láɓulaw a mɔ̌ hí̧ Gáŋmbây Zezú Kiris.

⁶ Mi kaw gɔ́ŋ Gáŋvbôn, ɓá láɓulaw ka ná erú mbêw, ké hí̧ mɔ kpɔ́ŋa rá̧ mɔ́ tu béla too ka ná erú a ɓil káwa a manárí̧ mbêw kuu Kiris!

⁷ Nyîn ní, zína a mɔ̌ hí̧ mí lawrína, rá̧ mûn kpúna mambá, ɓayhí̧lé mɔ vóna law a gun láɓulawri too, ka ŋgboro a zína a mɔ̌.

Pôl vú hí̧ Filemɔŋ ɓay a Onɛzîm

⁸ Nǎŋnɔ́, ka rɛŋ a Kiris, mi erú ka ŋgboro sa hí̧ mɔ́ hɛ̧ too ka mɔ e niŋáké,

⁹ dáy mi zi ɓá mí vbí mɔ́ a ɓil zína a mɔ̌, mǐ Pôl kpɔʼɔrɔ, ka vûn sɛl ɓay a Zezú Kiris.

¹⁰ Dáy, mi zi ɓá mí vbí mɔ́, ɓay tûl a Onɛzîm. Ké tɛ̧́ gun a mǐ, a ɓil láɓulaw hí̧ Zezú Kiris, ka vûn sɛl a gelé.

¹¹ Í̧ŋásá̧, ké zi tí ka nɛ́rɛ̧ hí̧ mɔ́ nyá, dáy a ŋgɛŋnɛ́, ké erú ka nɛ́rɛ̧ ka mbɔ́lɔ́ rá̧ mǐ kɔ́.

¹² Mi e pé nɛ́ resé goló, mɛ̌ ka kaw ɓá báŋa a ŋgboro a hay mûn ní mbêw.

¹³ Mí ɓá zína a mǐ lé, mi zi ɓá ké kaw kuu mǐ, ɓay ké niŋ péna hí̧ mí a gel a mɔ̌, a ɓil vûn sɛl nɛ́ ka mi erú ɓay tûl a Bélaɓay.

¹⁴ Dáy, mi zi ɓá, mi niŋ hɛ̧ a há̧na táŋ zína a mɔ̌ nyá, rá̧ niŋ béla a mɔ̌, ké zi ná, ná ɓá ka ŋgɛ́rɛ yá, nǎŋnɔ́ mi zi ɓá ké niŋ ka ŋgboro a law zína a mɔ̌.

¹⁵ Há̧na Onɛzîm, wal há̧na kuu mɔ̌, ɓay nâm kpay yáŋ, rá̧ mɔ́ rezíŋ nɛ́ ɓáy, a kaw kuu mɛ̌ wɔm lé.

¹⁶ Ɓayhí̧lé ŋgɛŋnɛ́, ké zi tí ɓá gun koy ɓǎŋ mbaa, ké ndé gel a gun koy: Ké kaw ɓá nyîn a ɓil láɓulaw, ka erú ka nɛ́rɛ̧ mambáy. Ké e ka nɛ́rɛ̧ hí̧ mí mambá, dáy nɛ́rɛ̧ a mɛ̌ hí̧ mɔ́, re ndé a mǐ ɓáy, a ɓil káwa a njuku, rá̧ káwa a ŋgboro a láɓulaw hí̧ Gáŋmbây.

¹⁷ Dáy, mɔ̌ mi kó mí, ɓá báŋa a mbáŋa a mɔ̌ lé, mɔ́ nyá nɛ́ ɓá báŋa mǐ.

¹⁸ Rá̧ ké mí niŋ hɛ̧ belyá hí̧ mɔ́, malé mɔ̌ mí tɔ́ŋ nɛ́ hɛ̧ a há̧na lé, mɔ́ mára̧ kɔ́ tûl ní.

¹⁹ Ka ndɔ̂ʼɔní pé mi ɗé hɛ̧ nɛ́rí̧ hí̧ mɔ́: Mǐ Pôl, mí e repú a hɛ̧ké hí̧ mɔ́. (Mɔ tu ɓá, mɔ̌ pí, mɔ tɛ̧́ njuku láɓulaw ɓay tûl ní.)

²⁰ Dáy nyîn ní, mi vú hí̧ mɔ́, mɔ́ niŋ béla nɔ́ hí̧ mí, ɓay tûl zína a Gáŋmbây: Mɔ́ volaw ní ɓay tûl law mbêw a manárí̧ kuu Kiris.

²¹ Ka mi kaw ɗé mbété nɛ́ hí̧ mɔ́y, mi tu ɓá, mɔ e niŋ hɛ̧ ka mi vbí mɔ́, a reniŋ ndé a nɔ́ ɓáy.

²² Mi vbí mɔ́ hɛ̧ a féké ɓáy ɓá, mɔ́ mɔny gel nâm ka̧n zoko mí, ɓayhí̧lé ka ŋgboro a gɔ́ŋ Gáŋvbôn a wǎyri, mi tu ɓá, zaa kpay lé, kú e pɔŋ mí hí̧ wǎyri.

Hɛ̧nama a kɔ́rɔ́ké

²³ Epafáras, ka e ka vûn sɛl kuu mǐ, ɓay tûl a Zezú Kiris, nam wǎyri,

²⁴ nǎŋnɔ́ Márke, Aristark, Demás rá̧ Luk, ka ɓá mbáŋa péna a mǐri̧, nam wǎyri kɔ́.

²⁵ Béla a Gáŋmbây Zezú Kiris, ké kaw kuu wǎyri!