2Timoté 1 - Bélaɓay a Gáŋvbôn

Hɛ̧nama

¹ Mǐ Pôl, apotere a Zezú Kiris, ka ŋgboro a zína a Gáŋvbôn, ka ɓá mí, ɓá mí tɔ́ʼɔɓay a ndísɛ̌ʼɛ, ka Gáŋvbôn hí̧nzáʼa hí̧ nárí̧ ka ŋgboro a Zezú Kiris.

² Mi ɗé hí̧ mɔ́ Timoté, gun zína a mǐ: Bâa Gáŋvbôn rá̧ Gáŋmbây a manárí̧ Zezú Kiris, kú hí̧ mɔ́, bélalaw, vbá̧buma ɓéké rá̧ a vónáké.

Pôl zi awá hí̧ Gáŋvbôn

³ Mi zi awá hí̧ Gáŋvbôn, mɛ̌ ka mi kaw niŋ péna hí̧ nɛ́, ka law a táŋáké, ɓá báŋké ka zîi a mǐri̧ tí niŋ hí̧ nɛ́y. Nǎŋnɔ́, mi kɛrɛ mɔ́ sû̧ŋ ka sêe dát a ɓil gɔ́ŋ Gáŋvbôn a mǐ.

⁴ Mi kɛrɛ mbii nûn nɔ́, nǎŋnɔ́ mi e ka nzala kó mɔ́, ɓay a law ní ké mbá ka sáʼa.

⁵ Mi kɛrɛ mɔ́ dát sé tûl láɓulaw a táŋáké, ka mɔ erúy. Láɓulawké nɔ́, tí niŋ péna a ɓil law a zâa a mɔ̌ Loyís, rá̧ mâa a mɔ̌ Enise tí ɗambɛl hí̧ mɔ́. Dáy mi tu ɓá táŋáké, ɓá láɓulawké nɔ́ mɔ erú kɔ́.

⁶ Ɓaykénɔ́, mi kaw sa hí̧ mɔ́ ɓáy ɓá, mɔ́ niŋ a hɛ̧ ka Gáŋvbôn hí̧ mɔ́y ké hɔ̧́ sé mbɛl ɓá béláké, hɛ̧ ka mɔ ziŋ ka ŋgboro ndɔ̂ʼɔ ka mi ɓá ka̧n tûló.

⁷ Ɓayhí̧lé, Têm ka Gáŋvbôn hí̧ nárí̧, zi tí ɓá Têm vómûn nyá, ɓá Têm ka hí̧ nárí̧ ŋgɛ́rɛ, zína rá̧ ŋgbá mûn.

⁸ Mɔ́ niŋ sɔ̧rɔ̧ saɓay a Gáŋmbây a manárí̧ hí̧ njukuri yá, mɔ́ zi ná niŋ sɔ̧rɔ̧ a mǐ kɔ́, ka e ɓil vûn sɛl ɓay a rɛŋɛ́. Dáy, ka kpɔ́ŋa Gáŋvbôn, mɔ́ zibɔʼɔ tɔ́ʼɔsêe kuu mǐ, ɓay tûl Bélaɓay.

⁹ Gáŋvbôn pɛ̧́ nárí̧, a ɗí nárí̧ ɓay ná kaw ɓá njuku a mɛ̌ri̧, zi tí ɓá, ɓay tûl péna a manárí̧ nyá, dáy ɓay tûl hɛ̧ a ké tí mɔny rá̧ ɓay tûl lawbéla a mɛ̌. Ké tí tɔ́ʼɔ nárí̧ lawbéla nɔ́ ka ŋgboro a Zezú Kiris ɗibaŋ rá̧ pé a mɔny tísiri.

¹⁰ Dáy a ŋgɛŋnɛ́, ké tɔ́ʼɔ nárí̧ lawbéláké ka ŋgboro gína a Zezú Kiris, njuku pɛ̧́ nárí̧. Mɛ̌ ka tí í ŋgɛ́rɛ a hûl, dáy ka ŋgboro Bélaɓay a mɛ̌, ké tɔ́ʼɔ nárí̧ káwa a ndísɛ̌ʼɛ ka tí ɔna nyáy.

¹¹ Ɓaykénɔ́, Gáŋvbôn ɗí mí, a ɓá mí ɓá njuku tɔ́ʼɔ Bélaɓay hí̧ njukuri ka zi tí ɓá Juyífri yáy rá̧ apotere, njuku tɔ́ʼɔhɛ̧.

¹² Nǎŋnɔ́ ɓay tûl Bélaɓayké nɔ́, pé mi kaw tɔ́ʼɔsêey. Dáy, mi zi tí ka wɔ́w yá, ɓayhí̧lé mi tu njuku ka, mi láɓulaw hí̧ nɛ́y. Mi tu ɓá táŋáké ɓá Gáŋvbôn erú ka kpɔ́ŋa, ɓay koro hɛ̧ a ké hí̧ míy ka̧ sêe kɔ́rɔ́ké.

¹³ Mɔ́ mbɛl mára̧ gbátɓayri ka mɔ lá a gél ní, mɔ́ ŋgbá kpú a ɓil láɓulaw rá̧ zína ka ná ziŋ a ɓil káwa mbêw kuu Zezú Kiris.

¹⁴ Mɔ́ koro ka ŋgboro kpɔ́ŋa a Têm pukí béla hɛ̧ ka Gáŋvbôn hí̧ mɔ́y ɓá béláké, Têm pukí nɔ́ e kuu manárí̧.

¹⁵ Ɓá báŋké ka mɔ tuy, njuku ka tísiri a Azíri too, sáŋ mí, a ɓil a kuriri Figɛ́l rá̧ Hɛrmozɛn.

¹⁶ Gáŋmbây, ké ɗí béla a mɛ̌ kɔ̧ ɓil vûn a Onɛ́zifɔr, ɓayhí̧lé ké kaw gí hí̧ mí ŋgɛ́rɛ dát, a zi niŋ sɔ̧rɔ̧ a mǐ ɓay ka mi e a ɓil vûn sɛl yá.

¹⁷ Nǎŋnɔ́, sêe a ké gí ka̧ ɓil pû Rɔm, ké ɛ́ mí ka ŋgɛ́rɛ a mɛ̌ too, a gí ziŋ mí.

¹⁸ Gáŋmbây Zezú, ké hí̧ nɛ́ ŋgboro ziŋ béla a Gáŋvbôn ka sêe a kɔ́rɔ́ké! Katína, mɔ tu ɓá táŋáké, pénari̧ too, a ké niŋ hí̧ mí ka Efɛze.