2Píyɛr 1 - Bélaɓay a Gáŋvbôn

Hɛ̧nama

¹ Mǐ, Simɔŋ Píyɛ́r, njukupéna rá̧ apotere a Zezú Kiris. Mi ɗé hí̧ njukuri ka ziŋ láɓulaw ka nɛ́rɛ̧ké mambɛ̧́nɛ́ kuu a ɓurú, ka ŋgboro a péna a ndáráké a Gáŋvbôn a manárí̧ rá̧ Zezú Kiris njuku pɛ̧́ nárí̧.

² Béla rá̧ a vónáké, ké hí̧ wǎyri ɓá ŋgɛ̧́náké ka ŋgboro a tu Gáŋvbôn rá̧ Zezú, Gáŋmbây a manárí̧.

Gáŋvbôn ɗí wǎyri ɓay a sé bɔʼɔséna a béláké

³ Katína, a ɓil kpɔ́ŋa a mɛ̌, Gáŋvbôn hí̧ nárí̧ hɛ̧ too ka ma ɓay ná ziŋ káwa a law mbêw kuu mɛ̌. Ɓayhí̧lé, ké tɔ́ʼɔ nárí̧, njuku ka ɗí nárí̧ ɓay a ná rí ɓil hɔ̧́na a mɛ̌ rá̧ ɓil ŋgɛ́rɛ a mɛ̌y.

⁴ Ɓá nǎŋnɔ́, pé ké hí̧ nárí̧ béla ka erú ka nɛ́rɛ̧y mambá, a ké hí̧nzáʼa ɓaykéy, rá̧lǒo í mí ziŋ lé, í ziŋ pɛ̧́ ka tísiri nɛ́ ka ɓew ka ŋgboro a ɓéké kɛrɛy, a í ziŋ káwa mbêw kuu Gáŋvbôn.

⁵ Ɓaykénɔ́ dáy, í rú mûn a wǎyri ɓay a í ɓá ziŋ láɓulaw a wǎyri, bɔʼɔséna a béláké, a í ɓá ziŋ bɔʼɔséna a béláké, gbát tu Gáŋvbôn,

⁶ a í ɓá ziŋ hɛ̧túna, ŋgbátûl, a í ɓá ziŋ ŋgbátûl, ewá a kpúnáké rá̧ ewá a kpúnáké, káwa mbêw kuu Gáŋvbôn;

⁷ Rá̧ kɔ́rɔ́ké, í ɓá ziŋ káwa mbêw kuu Gáŋvbôn, zína a nyînrí̧ a ɓil láɓulaw rá̧ zína a nyînrí̧ a ɓil láɓulaw, zína.

⁸ Wǎyri, mí erú ka mára̧ káwa nɔ́rí̧, ka a hɔ̧́ a ɓil káwakéy, ké e hí̧ wǎyri ŋgɛ́rɛ niŋ péna, a ɓá wǎyri hɔ̧́ a ɓil tu Gáŋmbây a manárí̧ Zezú Kiris.

⁹ Dáy njuku mí zi tí ka káwaké nɔ́rí̧ nyáy, ké zi kó gel ɗí yá ɓá báŋa râ̧w, ké yɛʼɛrɛ ɓá, Gáŋvbôn turu ɓékéhɛ̧ a mɛ̌ a í̧ŋásá̧ too dá yá.

¹⁰ Ɓaykénɔ́ nyîn nírí̧, í rú mûn a wǎyri ɓay a í ew ɓá kpúnáké a ɓil ɗína ka Gáŋvbôn ɗí wǎyri, rá̧ ɓay ka ké ten wǎyri, ɓayhí̧lé a ɓil niŋ nǎŋnɔ́, í tí lé ɓil ɓékéhɛ̧ bɔʼɔ mbêw yá.

¹¹ Nǎŋnɔ́ pé ŋgboro rí ɓil Pû a Gáŋmbây a manárí̧ Zezú Kiris, njuku pɛ̧́ nárí̧, ka ná dát e ŋgburu ɓá ánaké hí̧ wǎyri.

¹² Í tí tu ɓá táŋáké dá, a ew ɓá kpúnáké a ɓil gbátɓay ka i ziŋ nyánákéy, ɓaykénɔ́, pé mi e toʼoro wǎyri dát sé tûlkéy.

¹³ Dáy mi kó ɓá, belɓá mí toʼoro wǎyri dát sé tûlké, ka mi pa̧n káwa a ndísɛ̌ʼɛ ɓáy.

¹⁴ Ɓayhí̧lé mi tu ɓá, nâm gí ɗɛ́ŋ hí̧ mí, ɓay a mí tɛ̧́ a ɓil mûn hûl nɛ́, ɓá báŋké ka Gáŋmbây a manárí̧ Zezú Kiris tɔ́ʼɔ hí̧ míy.

¹⁵ Dáy, mi e niŋ rá̧ a fal hûl a mǐ, í kɛrɛ hɛ̧ nɔ́rí̧ dát.

Njukuri ka kó hɔ̧́na a Kiris

¹⁶ Katína, tí ɓá ka ŋgboro a si̧ŋɓay a njukuri, pé rú tɔ́ʼɔ wǎyri réna a ɓil hɔ̧́na a Gáŋmbây a manárí̧ Zezú Kiris yá: Ɓá ka nûn a ɓurú pé rú kó hɔ̧́na a mɛ̌.

¹⁷ Katína, ké ziŋ hɛ̧ hɛʼɛ rá̧ hɔ̧́na a gel a Bâa, Gáŋvbôn, dáy Gáŋvbôn a ɓil kpɔ́ŋa a mɛ̌, saɓay hí̧ nɛ́ ɓá: «Njuku nɛ́ ɓá gun zína a mǐ, mi ɓá lawrína a mǐ too kɔ̧ tûlé.»

¹⁸ Rú láɓayké ka gbé gí a nûnalê ka súku a ɓurú, a sêe ka rú e kuu mɛ̌ a tûl kon a táŋáké.

¹⁹ Nǎŋnɔ́, rú reláɓulaw ɓáy sé tûl ɓayri ka porofɛ́tri tí sáy. Dáy belɓá í ɓá tûl a wǎyri ka̧nrú̧ ɓá báŋa hɔrɛ a lámbe ka táŋ a ɓil tirí̧ma, sé ka̧ tɛ̧́na a sêe, ka rôo pélé tɛ̧́ a táŋ law a wǎyri.

²⁰ Í tu ɗambɛlké too ɓá: Njuku a há̧na mbêw zi ma tu ka mûn nɛ́, a ten táŋa ɓay ka porofɛ́tri sa a ɓil Mbété a táŋáké yá.

²¹ Ɓayhí̧lé, ɓay a porofɛ́t a há̧na mbêw ka gí ka ŋgboro a zína a njuku zi tí yá, ɓá Têm Pukí ka sɔʼɔrɔ njukuri, pé kú saɓay ka kó Gáŋvbôn.