1Timoté 1 - Bélaɓay a Gáŋvbôn

Hɛ̧nama

¹ Mǐ Pôl, apotere a Zezú Kiris, ka ŋgboro a zína a Gáŋvbôn, njuku pɛ̧́ nárí̧ rá̧ Zezú Kiris njuku ka ná ɓá kɛrɛ a manárí̧ ka̧n tûlé.

² Mi ɗé hí̧ mɔ́ Timoté, gbát gun a mǐ a ɓil láɓulaw. Bâa, Gáŋvbôn rá̧ Gáŋmbây a manárí̧ Zezú Kiris, kú hí̧ mɔ́ béla, bélalaw rá̧ a vónáké!

Nzáʼa nzɛ́rɛ sé tûl tɔ́ʼɔhɛ̧ a belyákéri

³ Ɓá báŋké ka mi tí sa hí̧ mɔ́y, ka mi kaw sé Maseduwa̧n, ɓá mɔ́ kaw Efɛze, ɓay a sa hí̧ njuku a há̧narí̧ a goló, a kaw tɔ́ʼɔhɛ̧ a manyákéri, ɓá kú pɔŋ nzáʼandɔ́ʼɔké nɔ́.

⁴ Mɔ sa hí̧ kuriri ɓá, kú pɔŋ sa galí rá̧ ten sɛ̧w a zîiri ka kɔ́rɔ́ké zi tí yáy. Ɓayhí̧lé ɓaykénɔ́ uru ɓá manyɓay baa a bazeŋ a njukuri, a zi hí̧ ŋgboro, ɓay a nzáʼapéna a Gáŋvbôn ka mɔny, ké ziŋ niŋa a ɓil láɓulaw yá.

⁵ Gáŋ ɓay a hí̧nzáʼa nɛ́, nɛ́rɛ̧ké ɓá hí̧ zína ka tɛ̧́ a ɓil law a táŋáké, kɛrɛ a béláké, rá̧ láɓulaw a gbátké.

⁶ Njuku a há̧narí̧ ɓɔ́l ŋgboro káwaké, dáy a ri ɓil manyɓay ka zi tí ka nɛ́rɛ̧ nyá.

⁷ Kú mbí mûn a kuriri ɓá, kú kaw ɓá njuku tɔ́ʼɔ sáŋna a Gáŋvbônri̧, dáy, kú zi lá ɓil ɓay a kú kaw sanáké yá, a zi lá ɓil hɛ̧ri̧ a kú saɓay sé tûlké a ŋgɛ́rɛ a kuriri too yá.

⁸ Katína, rú tu ɓá sáŋna ɓá béla hɛ̧, ka njuku mí mbí sáŋnaké a niŋ péna rú̧ ka ŋgboroké ɓá béláké.

⁹ Nǎŋnɔ́, ná tu ɓá táŋáké ɓá sáŋna zi tí ɓá ɓala a njuku a ndárákéri yá, ɓá ɓala njuku niŋ hɛ̧ a belyákéri, njuku kpútûlri, njuku ŋgbɔ́rɔri rá̧ ɓéké njukuri, njukuri ka zi hɛʼɛ Gáŋvbôn malé hɛ̧ a táŋáké yáy, njukuri ka í bâa malé mâa, njuku í hûlri,

¹⁰ njuku niŋ dalari, wɔ̧rɔ̧́njuku ka niŋ dala kuu mbáŋa kuriri, njukuri zé koyri, njuku kúŋɓayri, njuku háhɛ̧ foori, rá̧ njukuri too, ka niŋ hɛ̧ ka zi sé ma gbátɓay a Gáŋvbôn, ka rú tɔ́ʼɔy yáy.

¹¹ Hɛ̧tɔ́ʼɔké nɔ́, e a ɓil Bélaɓay ka mi ziŋ ka gí a ŋgboro Gáŋvbôn ka e ka hɔ̧́na ka hí̧ bélay.

Pôl zi awá hí̧ Kiris

¹² Mi zi awá ɓá ŋgɛ̧́náké hí̧ Gáŋmbây a manárí̧ Zezú Kiris, ka hí̧ mí ŋgɛ́rɛ, ɓay mí niŋ nzáʼapéna a mǐ. Mi zi awá hí̧ nɛ́ ɓay ka ké kó mi, ɓá njuku law mbêw, ɓay niŋ péna a mɛ̌, ka a mbí mí ka̧n ɓil péna a mɛ̌.

¹³ Mǐ, ka ɗambɛlké, mi kaw ɓá njuku ka ɓew ɓay a mɛ̌, mi niŋ ŋgɛ́rɛ kuu mɛ̌, ka ɓá njuku a mɛ̌ri̧ tɔ́ʼɔsêe. Dáy, Gáŋvbôn kósêe a mǐ, ɓayhí̧lé, mi zi láɓulaw yá, a zi tu hɛ̧ ka mi kaw niŋáké yá.

¹⁴ Dáy, béla a Gáŋmbây a manárí̧, ɓay a mǐ, hɔ̧́ mambá, ké hí̧ mí láɓulaw rá̧ zína, a ɓil káwa a mǐ mbêw kuu Zezú Kiris.

¹⁵ Dáy, ɓay nɛ́ ɓá gbátɓay, ma ɓay a njukuri too kú mbílaw, a kú nyá ka law mbêw ɓá: Zezú Kiris gí tísiri, ɓay a ké pɛ̧́ ɓéké njukuri. Mǐ, mi kaw ɓá gáŋ ɓéké njuku a bazeŋ a kuriri.

¹⁶ Dáy ɓaykénɔ́ pé Gáŋvbôn kósêe a mǐ, a zi ɓá Zezú Kiris, ké tɔ́ʼɔ ka ŋgboro a mǐ, mǐ gáŋ ɓéké njuku, ikilaw a mɛ̌. Ké niŋ nǎŋ, ɓay a tɔ́ʼɔ hí̧ njuku a fékéri a fal, ka e láɓulaw hí̧ nɛ́, ɓay a ziŋ káwa ndísɛ̌ʼɛ a wɔmké.

¹⁷ Gáŋmbây a wɔmké, Gáŋvbôn ka ma hûl yáy, ka njuku ma kó nɛ́ nyáy, mɛ̌ Gáŋvbôn mbêw yáŋ, hɔ̧́na rá̧ ɗéla ké hí̧ nɛ́ mbii ka mbii! Amɛn!

¹⁸ Timoté gun a mǐ, mi hí̧ mɔ́ nzáʼa nzɛ́rɛ nɛ́, sé tûl ɓay a porofɛ́tri, a kú sa sé tûló í̧ŋásá̧y, a tûl ɓayké nɔ́, mɔ́ rúbére a béláké ka e a mbɔ́lɔ́y.

¹⁹ Mɔ koro ɓay ka mɔ láɓulaw sé tûlké, rá̧ kɛrɛ a béláké. Njuku a há̧narí̧ sáŋ kɛrɛké nɔ́, nǎŋnɔ́, kú ɓá láɓulaw a kuriri ɓɔ́l wɔm.

²⁰ A ɓil a njuku nɔ́rí̧, Himɛ̧́nɛ́ rá̧ Alekzaŋndɛrɛ erú kɔ́, ka mi ɓá kuriri kɔ̧ ɓil ndɔ̂ʼɔ a Sata̧n, rá̧ kú zi ná mbɛl fára Gáŋvbôn ɓáy.