Mark 3 - Pinyin

Yěsû a parə̀ ŋònə̀ nɨ taʼà àpô e à lə̀ kwɨghə̀nə

¹ À lə̀ pə amwuə yɨ̀tse nkwùə̀, Yěsû a kẅirə̀ ndèrə̀ amwuə ndâ àshwatə̀ pɨ̀Jew. Ŋònə̀ ɨ̀tse à lə̀ pə amwuə ndâ ghu nɨ taʼà àpô e à lə̀ kwɨghə̀nə

² Pànə̀ pɨ̀tse amwuə pobə lə̀ tə̂ àtwuə̀ nnaŋə̀ a nɨ zəənə̀ lo Yěsû à parə̀ a ŋònə̀ wə̀ amwuə njyə̂ àlaʼà pɨ̀Jew, mbə̀ʼə zəənə̀ ànwùə̀ nɨ mbə̀ʼə pobə chyâ ɨ̀sàʼa ghu aŋunə ze.

³ Yěsû à lə̀ shwəŋə̀ ambo ŋònə̀ wa nɨ àpô e a lə̀ kwɨghə̀nə la lo, “Lòo a ɨ̀shyə̂ ndàŋə̀ ntəəmə̀ a mbyə̀.”

⁴ Tsaʼnə a lə̀ làŋə̀nə ntəəmə̀ la, Yěsû a pə̀ŋə̀ mbyiitə̀ ambo pobə lo, “Mbòomə ɨ̀wəənə̀ à nèrə̀ lo pə̀ənə̀ ghɨ̀rə̀ la ɨla njyə̂ àlaʼà? Ɨ̀pòŋə̀ kə̀ a tɨ̀pòŋə̀? Nchwarə̀ kə̀ nzhwuutə̀?” Tsaʼnə à lə̀ pyiitə̀nə la pobə zhwemnə̀ a ghobə.

⁵ A naŋə̀ a ghobə moʼo moʼo nɨ àsinə̀ ɨ̀sɨghə̀, la nsòmnə̀ aŋunə pobə ka mɨ̀zùŋə ntiinə pobə lə̀ nàanə̀nə mɨ̀ntɨŋmə̀ ɨ̀mobə, ntyiʼə̀ nshwəŋə̀ ambo ŋònə̀ wa lo, “Shwùumə̀ ɨ̀faanə̀ àpô o.” À lə̀ shwùumə̀ àpô e zèrə a zùŋə̀ nkẅirə̀ ntɨ̀ŋnə̀.

⁶ Pɨ̀Farìsî pa lə̀ furə̀ ndzùŋə̀ ngə̀ ngẅìimə̀ àshwatə̀ pobə pɨ pànə̀ pɨ Heròdə̀ a nɨ tyankə̀ tsaʼnə pobə làŋə̀ zhwuutə̀ e.

Ɨ̀pùŋə̀ pə̀ənə̀ zùŋə̀ a Yěsû a nɨ̀pwùnə atəŋə

⁷ Yěsû pobə ɨ̀zùŋə̀ ndzùmə̀ ɨ̀pe lə̀ furə̀ ndèrə̀ a nɨ̀pwùnə atəŋə Galìlyə̂. Àpùŋə̀ pànə̀ pɨ̀noʼnə nɨ a lə̀ furə̀nə a Galìlyə̂ ghobə Judyà a lə̀ tyiʼə̀ mmə ndzùŋə̀ e.

⁸ Pɨ̀tse pànə̀ lə̀ furə̀ a Yèrusalèmə̀, pɨ̀tse furə̀ a Idumyà, pɨ̀tse furə̀ a ndzìnə nchyə Jodànə̀, nkɨ furə̀ amwuə ɨ̀laʼà a nɨ̀pwùnə Tayə̀ ghobə Sidònə̀. Àpùŋə̀ pànə̀ pɨ̀noʼnə zə a lə̀ tô ambo ze ntiinə pobə lə̀ zuʼnə mɨ̀nwùə̀ nɨ a lə̀ ghɨ̀rə̀nə.

⁹ Yěsû a zəənə̀ lo àpùŋə̀ pànə̀ za a tô nnoʼò tɨsɨŋnə, nshwəŋə̀ ambo ɨ̀zùŋə̀ ndzùmə̀ ɨ̀pe lo, pobə lòo àkànwuʼə ntô ŋŋâ nɨ ze lo â kwuunə̀ amwuə mbə̀ʼə pànə̀ pɨ̀ghu kaŋə nyə̀nkə̀ e.

¹⁰ A lə̀ kɨ pə la nɨ a parə̀ mə pànə̀ pɨ̀noʼnə. Ànwùə̀ zèrə zə a lə̀ ghɨ̀rə̀ lo pɨghoonə pɨ̀noʼnə tyiʼə̀ ntinə̀ ntô lo pètə̀ e.

¹¹ Nkwùə̀ za ɨ̀tsùmə̀ nɨ ɨ̀zhwùə̀ tɨ̀pòŋə̀ zəənə̀nə e, pobə pa nkunə̀ a mbyə̀ ze, nkyiinə̀ nshwəŋə̀ lo, “Ghò la Moonə̀ Nẅùə̀.”

¹² La Yěsû a kwàtə̀ a ghobə nshwəŋə̀ lo kò pobə laʼa ngɨ̀rə̀ pɨ zhyə̂ a ŋònə̀ nɨ à pənə ẅèrə.

Yěsû a tsoʼò ngàŋə ntwuumə̀ ɨ̀ze za ntsòbə̀ ɨpaa

¹³ Yěsû à lə̀ nkoʼò ndèrə̀ àtwuə̀ mbarə̀ nfuŋə̀ pànə̀ nɨ à lə̀ tàʼnə lo fuŋə̀. Pobə kɨ ntô ambo ze,

¹⁴ a ghə̀ amwuə pobə ntsoʼò pànə̀ ntsòbə̀ ɨpaa nɨ à lə̀ fuŋə̀nə nɨ ngàŋə ntwuumə̀ ɨ̀ze ntyiʼə̀ nshwəŋə̀ ambo pobə lo, “Ntsoʼò a wɨghə lo nɨ̀ pə pə̀ənə̀, mbɨ tsàa a wɨghə lo nɨ̀ ghə̀ nchwìitə̀ ntwuumə̀ Nẅùə̀,

¹⁵ nɨ̀ kɨ mbə nɨ ɨ̀tɨ̀ŋnə̀ a nɨ fuukə̀ ɨ̀zhyə̂.”

¹⁶ Pànə̀ pyə̀ nɨ à lə̀ tsoʼnə la à lə̀ pə Shimùnə̀ nɨ à lə̀ ŋânə nɨ̀linə̀ ɨ̀tse lo Pità.

¹⁷ Jemə̀ pobə momaa e Jònə nɨ pobə lə̀ pənə ɨ̀poonə̀ pɨ Zebedì. A lə̀ chwùə̀ nɨ̀linə̀ ɨ̀tsobə lo Boanerges nɨ nɨ pənə lo, “Ɨ̀pômbyàŋnə̀ pɨ nɨ̀fàŋə̀.”

¹⁸ A lə̀ kɨ ntsoʼò Andrù nɨ Filibə̀ nɨ Bartholomew nɨ Matyù nɨ Thomas nɨ Jemə̀ moonə̀ Àlfeyùsə̀, ntsoʼò a Tàdyusə̀ nɨ Shimùnə̀ ŋwùə̀ Kanàanə̀,

¹⁹ nɨ Yudà Iskaryòtə̀ nɨ a lə̀ shwùunə̀nə a Yěsû.

Pɨ shwəŋə̀ lo Yěsû à chyə̂ nɨ ɨ̀fò pɨ ɨ̀zhyə̂ amwuə nɨ̀pùmə̀ ɨ̀tse

²⁰ Yěsû à lə̀ furə̀ nkwə̂ a ɨmwuə alyiʼə. Àpùŋə̀ pànə̀ yè noʼnə a kɨ nchi nshwatə̀ amwuə ndwuumə̀ nɨ ka à lə̀ pə e nɨ ɨ̀sàanə̀ nɨ mbə̀ʼə pobə ɨ̀zùŋə̀ ndzùmə̀ ɨ̀pe nwuunə̀ ndzɨghə̀.

²¹ Nkwùə̀ nɨ ngẅàrə̀ Yěsû ɨ̀ lə̀ zuʼnə pànə̀ mə nshwəŋə̀ lo à paarə̀ la, pobə lə̀ ghə̀ lo tə pyamnə̀ e.

²² Pɨ̀nèrə̀ mbòomə pɨ̀tse nɨ pɨ lə̀ furə̀nə a Yèrusalèmə̀ nshwuʼə̀ ntô lə̀ shwəŋə̀ lo, “À wə̀ nɨ Beelzebùbə̀ nɨ à pənə ɨ̀fò pɨ ɨ̀zhyə̂ a nɨ̀pùmə̀ ze. À wa ndòo la ɨ̀tɨ̀ŋnə̀ ɨ̀fò pɨ ɨ̀zhyə̂ nfuukə̀ a pyə̀ ɨ̀zhyə̂ ghu.”

²³ La Yěsû a fuŋə̀ a ghobə mbyiitə̀ ambo pobə amwuə ɨ̀shwəŋnə̀ pɨ̀nàanə nàanə lo, “Satàanə̀ a kantə̀ Satàanə̀ lə ɨla?”

²⁴ Àlaʼà a tə mbə la ngàpə̀ ntəəmə̀ a mɨ̀kwurə̀ mɨ̀kwurə̀ ndzòŋnə̀ mbɨ̀ŋmə̀ e, àlaʼà ghu a laʼa ntəəmə̀ e apə̀.

²⁵ Ngẅàrə̀ tə mbə la ngàbə̀ ɨ̀pɨ̀ŋmə̀ e mbə a mɨ̀ntswùə̀ mɨ̀ntswùə̀ lo zòŋnə̀ pobə nɨ pobə, ngẅàrə̀ ghu ɨ laʼa ntəəmə̀ e apə̀.

²⁶ Satàanə̀ a kɨ nchi mbəla ndòo a ɨ̀shyə̂ ntyiʼə̀ mmə ndzòŋnə̀ ɨ̀pɨ̀ŋmə̀ e ngàbə̀, yi ǎ kunə̀, ànwùə̀ Nɨ̀fò e â myə̀.

²⁷ A ndəŋə ndəŋə lo, mbə̀ʼə ka ŋwùə̀ a pəʼə̀ e nkwuunə̀ a ndâ ngàŋə̀ mɨ̀tɨ̀ŋnə̀ ndyàa ɨ̀pwuumə̀ ɨ̀pe tɨghu a pyə̀ nkô e nkorə̀ zaʼà mbòŋə̀ kwuunə̀ lyàa ɨ̀pwuumə̀ ɨ̀pe.

²⁸ Ǹshwəŋə̀ tyiʼə̀ nkǔŋə nkuŋə ambo pɨghə lo, “Pɨ̌ waʼà ɨ̀fànə̀ mɨ̀nwùə̀ pə̀ənə̀ tyiʼə̀ ɨ̀tsùmə̀ pobə mɨ̀ndzòomə̀ mɨ̀tsùmə̀ nɨ pə̀ənə̀ zòomə̀nə a Nẅùə̀ ghu.

²⁹ La mbə̀ʼə pɨ laʼa ngwaʼà e tɨ̀pòŋə̀ ŋònə̀ wa nɨ à zòomə̀nə Àzhwùə̀ Nẅùə̀ la apə̀, ntiinə a ghɨ̀rə̀nə la tɨ̀pòŋə̀ nɨ a ghoŋə̀nə nɨ nkuŋə̀.”

³⁰ Yěsû à lə̀ shwəŋə̀ a lenə la ntiinə pobə lə̀ shwəŋə̀nə lo, “À wa nɨ àzhwùə̀ tɨ̀pòŋə̀.”

Mǎ pɨ Yěsû pobə pɨ̀momaa pɨ Yěsû

³¹ Lenəla, mǎ pɨ Yěsû pobə pɨ̀momaa pɨ Yěsû lə̀ tô ntəəmə̀ a àpyìinə, ntsàa ntwuumə̀ nfuŋə̀ e.

³² Àpùŋə̀ pə̀ənə̀ a lə̀ nwuunə̀ nkamnə̀ e, nshwəŋə̀ ambo ze lo, “Mǎ o pobə pɨ̀momaa ɨ̀pô pə a àpyìinə ntàʼà o.”

³³ Yěsû a pyiitə̀ lo, “Mǎ mə̀ pobə pɨ̀momaa ɨ̀pâ la pɨ̀wə̌?”

³⁴ Mbə̀ŋə̀ nnaŋə̀ pànə̀ nɨ pɨ lə̀ nwuunə̀nə a nɨ̀pwùnə ze, nshwəŋə̀ lo, “Lə̌ pɨ̀mǎ ɨ̀pâ pobə pɨ̀momaa ɨ̀pâ!

³⁵ Ŋònə̀ wa ntsùmə̀ nɨ a wa ngɨ̀rə̀ ànwùə̀ nɨ Nẅùə̀ a tàʼnə la, a momaa mə̀ ghu mbyàŋnə̀, mbə ghu mə̀ngyə̌ nkɨ mbə mǎ mə̀.”