Judə̀ 1 - Pinyin

¹ Àŋwàʼnə̀ zə̀ a furə̀ ambo mɨ̀ŋə̀ Judə̀ ngàŋə̀ àfàʼà Yěsû Kristù, nkɨ mbə momaa Jemə̀. Ngwə̀ ŋŋwàʼnə̀ àŋwàʼnə̀ zə̀ ambo pànə̀ nɨ Nẅùə̀ à fuŋə̀nə a ghobə; pobə pə pànə̀ pa nɨ Tǎ Nẅùə̀ à kòŋə̀nə, Yěsû Kristù a kɨ mmə mbyabə̀ a ghobə.

² Nẅùə̀ à koorə̀ mɨ̀lɨŋə̀ ɨ̀mɨghə, ŋŋâ a wɨghə nɨ àporə̀porə̀, nkɨ ngɨ̀rə̀ nɨ̀ pə nɨ ɨ̀kòŋnə̀ a tɨ̀tɨ̀rə̀ pɨghə tyìʼə̀ ɨ̀shìʼnə̀.

Nɨ̀ zhìʼtə̀ aŋunə pɨ̀nèrə̀ ɨ̀nwùə̀ pɨ pɨ̀chwìrə̀

³ Pɨ̀swùə ɨ̀pâ pɨ̀shìʼnə̀, ndə̀ mə nkyiitə̀ nɨ mɨ̀tɨ̀ŋnə̀ ɨ̀mâ mɨ̀tsùmə̀ a nɨ ŋwàʼnə̀ àŋwàʼnə̀ zə̀ ambo pɨghə ntii ànwùə̀ nɨ Nẅùə̀ à lə̀ chwarə̀nə a wə̀ənə̀ pɨ̀tsùmə̀, ntɨŋmə̀ mə̀ ɨ tyiʼə̀ ntinə̀ mə̀ lo ŋ̂ŋwàʼnə̀ ngyèmpə̀ ngɨ̀rə̀ nɨ̀ ghoŋə̀ nɨ àpyiimə̀ ntɨŋmə̀ za nɨ Nẅùə̀ à ŋâ mə ambo pə̀ənə̀ ɨ̀pe taʼà nkwùə̀ nɨ nkuŋə̀.

⁴ Mbə̀ʼnə pànə̀ pɨ̀tse nɨ pobə pa ka pô a ghobə a Nẅùə̀ lə̀ nyaʼtə̀ nkwuunə̀ amwuə pə̀ənə̀, pànə̀ pa nɨ pobə pa nkẅebə̀ ntwuumə̀ wa mbə̀ʼə àpòŋə̀ ntɨŋmə̀ Nẅùə̀ ɨ̀wə̀ənə̀ a nɨ lə̀əmə̀ ɨ̀nyòrə̀kə̀ mɨ̀nwùə̀ ɨ̀pobə. Lə̌ pànə̀ nɨ pɨ twuunə̀nə a Yěsû Kristù nɨ à pənə ndàʼà masàa nkɨ mbə ndàʼà Ndòʼnə̀mbyə̂ ɨ̀wə̀ənə̀. Àŋwàʼnə̀ Nẅùə̀ a lə̀ kwaa mə ndə̂ ɨ̀sàʼa ɨ̀ghobə.

⁵ Mbaa pə tsaʼnə nɨ̀ zhyə̂nə mɨ̀nwùə̀ mə mɨ̀tsùmə̀, ǹtàʼà kẅempə̀ a wɨghə tsaʼnə Ndòʼnə̀mbyə̂ à lə̀ fuukə̀nə pə̀ənə̀ ɨ̀pe pànə̀ pɨ Israel a àlaʼà Egypt, la a kɨ chi pə aŋunə mətùmə nkwùə̀ a pyaatə̀ pyə̀ pa nɨ ka pɨ lə̀ nùŋə̀ a ghobə ntɨŋmə̀ aŋunə ze la.

⁶ Nɨ̀ kɨ nchi nkẅempə̀ pəngèrə̀ pa nɨ ka pobə lə̀ ghoŋə̀ a ghobə amwuə mɨ̀sàanə̀ mɨ àfàʼà ɨ̀mobə, la mmyàʼtə̀ alyiʼə nɨ̀chyə̂ àzobə: Nẅùə̀ à kô a ghobə nkorə̀ nɨ mɨ̀tsaŋə̀ nɨ mɨ ghoŋə̀nə nɨ nkuŋə̀ nnùŋə̀ amwuə alyiʼə ndzùmə za ntyiʼə̀ mmə mbyabə̀ njyə̂ ntsoʼtə̀ ɨ̀sàʼa yɨ̀ ngẅùunə za.

⁷ Lə̌ tyìʼə̀ tsaʼnə pànə̀ pɨ Sodòmə̀ pobə Gomorrah nɨ ɨ̀laʼà nɨ kamnə̀nə a ghobə lə̀ ŋânə mbɨ̀ŋmə̀ ɨ̀zobə amwuə ànyòrə̀kə̀ pobə nɨ̀chyə̂mbyə̂ mɨ̀kɨ̌, Nẅùə̀ a tòonə̀ a ghobə nɨ ɨ̀mǔ tɨ pyaatə̀ nɨ ɨ pənə àkwàʼtə̀ ambo ŋwùə̀ lo â zəənə̀.

⁸ Lə̌ tsaʼnə pànə̀ pèrə pə pa nkɨ ndyə̂ mɨ̀ndzə̀əmə̀ nɨ mɨ ma ngɨ̀rə̀ pobə ghɨ̀rə̀ tɨ̀pòŋə̀ farə aŋunə mbɨ̀ŋmə̀ ɨ̀zobə ngwâ ɨ̀tɨ̀ŋnə̀ Nẅùə̀ nkɨ mmə ndzòomə̀ pànə̀ pɨ àghuʼtə̀ nɨ pənə a nɨ̀pwuurə̀.

⁹ Mbaa pə àtwuə̀ pəngèrə̀, angèrə̀ Makə̀lə̀ nkwùə̀ nɨ à lə̀ mənə nsaʼnə̀ pobə devə̀lə̀ mbə̀ʼə ŋònə̀ nɨ ǎ lòo àkwuə̀ Mǔsî, ka à lə̀ zòomə̀ e a ye nɨ ndzòomə̀ tɨ̀pòŋə̀ ɨ̀tse, à lə̀ shwəŋə̀ pə lo, “Ndòʼnə̀mbyə̂ à saʼà o.”

¹⁰ La pànə̀ pèrə pə pa nshwəŋə̀ tɨ̀pòŋə̀ aŋunə ànwùə̀ àtsùmə̀ nɨ ka ɨ̀twuə̀ ɨ̀pobə laanə̀ e aŋunə pobə pyə̀ pa nɨ pobə zhyə̂nə àtwuə̀ pobə, ngɨ̀rə̀ tsaʼa mɨ̀nyàamə̀ mɨ mɨpaʼa. Lə̌ mɨ̀nwùə̀ mɨ̀ghu nɨ mɨ tsə̀ŋə̀nə a ghobə la.

¹¹ Ngəʼə̀ ɨ̀ chyə̂ àtwuə̀ pobə pə la ghu! Pobə zùŋə̀ mbòbə̀ mɨ̀kwùə̀ Cain, ndzùŋə̀ ɨ̀pwuumə̀ nfàntə̀ ànwùə̀ tyìʼə̀ tsaʼnə Balàamə̀ à lə̀ ghɨ̀rə̀nə. Nẅùə̀ à zhwuutə̀ mə a ghobə tyìʼə̀ tsaʼnə à lə̀ zhwuutə̀nə a Korah ntii àtɨ̀ŋnə̀ àtwuə̀ e.

¹² Pànə̀ pèrə pə chyə̂ mbə la tsaʼa ndòtə amwuə mɨ̀zɨghə̀ mɨ àshwatə̀ ɨ̀mɨghə, mmə mbwuutə̀ ndzɨghə̀ pɨghə pɨ pobə tɨ ɨ̀sɨŋnə̀, mbə pànə̀ nɨ pobə pa nkòŋə̀ pə mbɨ̀ŋmə̀ ɨ̀zobə. Pobə chyə̂ tsaʼa mbàʼà nɨ fèrə̀ à pìʼnə ndèrə̀ mbìʼì nkwə̂ la ka pə e nɨ mbə̀ŋə̀. Pobə chyə̂ mbə tsaʼa mɨ̀tɨ̀ghə nɨ mɨ tənə mbə zumə̀ mɨ̀ntàamə a ndèrə̀ mbə̀ŋə̀ la ka zumə̀ e. Pobə chyə̂ mbə tsaʼa mɨ̀tɨ̀ghə nɨ pɨ sòʼnə aŋunə mɨŋaŋə ɨ̀mobə mɨ zùŋə̀ nkwɨghə̀ a taʼà nkwùə̀.

¹³ Pobə chyə̂ mbə tsaʼa nchyə ghu nɨŋnə̀nə nɨ fèrə̀ ghù ntɨ̀ŋnə̀ à tinə̀nə ndèrə̀ ntinə̀ nkwə̂, ngɨ̀rə̀ mɨ̀nwùə̀ mɨ ɨ̀sɨŋnə̀ ɨ̀mobə mɨ furə̀ a sàŋə̀ tsaʼa àfùʼkə̀. Pobə chyə̂ mbə tsaʼa pɨsaŋə nɨ pèrə pa ngyìinə̀ yìinə̀nə nɨ Nẅùə̀ à nùŋə̀nə a ngotə alyiʼə ndzùmə tɨ̀pòŋə̀ ambo pobə nɨ nkuŋə̀.

¹⁴ Enòkə̀ nɨ à lə̀ pənə amwuə ɨ̀waanə̀ sàmbaa a ndzùmə Adàmə̀ à lə̀ shwəŋə̀ mbə̀ʼə pànə̀ pə̀ la lo, “Nɨ̀ zəənə̀, Ndòʼnə̀mbyə̂ à wə̀ ntô ghobə pə̀ənə̀ ɨ̀pe pɨ̀laanə̀nə nkaamə̀ nkaamə̀,

¹⁵ lo tsoʼtə̀ ɨ̀sàʼa ŋwùə̀ ntsùmə̀ chyâ ngəʼə̀ àtwuə̀ pànə̀ nɨ ka pobə̂ pô a ghobə a Nẅùə̀, ngɨ̀rə̀ mɨ̀nwùə̀ tɨ àkẅàrə̀ Nẅùə̀ farə pànə̀ pɨ tɨ̀pòŋə̀ pa nɨ pɨ shwəŋə̀nə ɨ̀shwəŋnə̀ àtsə̂ ntɨŋmə̀ aŋunə Nẅùə̀.”

¹⁶ Pànə̀ pèrə pə la ngàŋə àlẅùmpə̀ nkɨ mbə pɨ̀ntàʼà ɨ̀sàʼa. Pobə pa ndzùŋə̀ pə ànwùə̀ nɨ ɨ̀kwàŋə̀ tɨ̀pòŋə̀ ɨ̀pobə tàʼnə, mmə nshwəŋnə̀ ɨ̀shwəŋnə̀ àsàa mbɨ̀ŋmə̀, mmə ndòo ɨ̀shwəŋnə̀ ɨ̀fɨ̀kə̀ nfɨ̀kə̀ pànə̀ ghu mbə̀ʼə chyə̂ a ghobə aŋunə pobə.

¹⁷ La nɨ pɨ̀swùə ɨ̀pâ pɨ̀shìʼnə̀, nɨ̀ kẅempə̀ ànwùə̀ nɨ ngàŋə ntwuumə̀ Ndòʼnə̀mbyə̂ ɨ̀wə̀ənə̀ Yěsû Kristù lə̀ shwəŋə̀nə.

¹⁸ Pobə lə̀ shwəŋə̀ ambo pɨghə lo, “A ghǎ pə aŋunə mɨ̀njyə̂ mɨ ndẅùutə, pànə̀ nɨ pobə pa ngẅìi pə̀ənə̀ tô, ndzùŋə̀ pə mɨ̀nwùə̀ ɨ̀mobə nɨ pobə ghɨ̀rə̀nə tɨ àkẅàrə̀ Nẅùə̀.”

¹⁹ Lə̌ pànə̀ nɨ pobə pa ntô nɨ àghàpə̀ a tɨ̀tɨ̀rə̀ pɨghə, ndzùŋə̀ pə ànwùə̀ nɨ a kùʼnə̀nə ambo pobə, ka kɨ pə a ghobə nɨ àzhwùə̀ Nẅùə̀

²⁰ La ngə̀ aŋunə pɨghə nɨ pɨ̀swùə ɨ̀pâ pɨ̀shìʼnə̀, nɨ̀ kẅuə̀ amwuə àpyiimə̀ ntɨŋmə̀ àzɨghə yè laanə̀nə za, nchàʼtə̀ a Nẅùə̀ nɨ ntɨ̀ŋnə̀ àzhwùə̀ Nẅùə̀.

²¹ Nɨ̀ ghoŋə̀ amwuə ɨ̀kòŋnə̀ Nẅùə̀ tsaʼnə nɨ̀ wə̀ mbyabə̀ lo Ndòʼnə̀mbyə̂ ɨ̀wə̀ənə̀ Yěsû Kristù â làŋə̀ a ndzùmə̀ àkoorə̀ mɨ̀liŋə̀ e ŋŋâ a wɨghə nɨ nɨ̀chyə̂mbyə̂ nɨ à ghoŋə̀nə nɨ nkuŋə̀

²² Nɨ̀ mə nkoorə̀ mɨ̀liŋə̀ mɨ pànə̀ pa nɨ pobə pənə nɨ mɨnkə;

²³ nsàʼà pànə̀ pa nɨ pɨ kunə̀ mə amwuə ɨ̀mǔ ghu la, nchwarə̀ a ghobə nkɨ nnèrə̀ àkoorə̀ mɨ̀liŋə̀ pobə àkẅàrə̀ Nẅùə̀ ambo pɨ̀tse pə̀ənə̀. La mbàanə̀ ɨ̀kwàŋə̀ tɨ̀pòŋə̀ pobə pa nɨ pobə tàʼnə zùŋə̀, pèrə tyiʼə̀ mbə tsaʼa ɨtsəʼə nɨ pobə màʼnə.

Àchàʼtə̀ Nẅùə̀ a nɨ yetə̀ a Nẅùə̀

²⁴ Ambo ze wa nɨ mbə̀ʼə à pyabə̀ a wɨghə lo kò nɨ̀ kunə̀ amwuə tɨ̀pòŋə̀, ngɨ̀rə̀ nɨ tô amwuə alyiʼə nɨ ntsɨ̀ŋnə ɨ̀tse.

²⁵ Ndàʼà ndàʼà Nẅùə̀ nɨ à wa nchwarə̀ a wə̀ənə̀ ndàŋə̀ a ndzùmə̀ Yěsû Kristù Ndòʼnə̀mbyə̂ ɨ̀wə̀ənə̀ â pə nɨ àghuʼtə̀, mbə nɨ nɨ̀faŋə̀ pobə mɨ̀tɨ̀ŋnə̀, nɨ ɨ̀tɨ̀ŋnə̀ a nɨ furə̀ aŋunə mɨ̀waanə̀ mɨ̀tsùmə̀ nɨ mɨ lə̀ làŋə̀nə tô pyàa tɨ̀tsòŋə̀, ngoŋə̀ nɨ nkuŋə̀ nɨ nkuŋə̀. Amen.