Matews 1 - Uhokri Gahegbetawni Nukune akak Sawmus

Jesus Cristo gihawkrivwi

¹ Ay giwkis Kiyavwiye Jesus Cristo gihawkrivwi. Ig Kiyavwiye Jesus ig amekene Davi gihiwhi, igme amekene Davi ig amekene Abraawh gihiwhi.

² Igme amekene Abraawh gikamkayh amekene Izaki, igme amekene Izaki gikamkayh amekene Jakó, igme amekene Jakó gikamkayh amekene Judá gikakkis gisamwivwi.

³ Igme amekene Judá gikamkayh amekene Peres gikak amekene Zera, ginagkis guw Tamar. Igme amekene Peres gikamkayh amekene Esroh, igme amekene Esroh gikamkayh amekene Arawh.

⁴ Igme amekene Arawh gikamkayh amekene Aminadabi, igme amekene Aminadabi gikamkayh amekene Nasoh, igme amekene Nasoh gikamkayh amekene Sawmuh.

⁵ Igme amekene Sawmuh gikamkayh amekene Boaz, ginag guw Rabi. Igme amekene Boaz gikamkayh amekene Obedi, ginag guw Ruti. Igme amekene Obedi gikamkayh amekene Jessé.

⁶ Igme amekene Jessé gikamkayh ikivarat amekene Davi. Igme amekene Davi gikamkayh amekene Salomão ku pariye gukak gixiwhan amekene Uriyas gihayo.

⁷ Igme amekene Salomão gikamkayh amekene Roboawh, igme amekene Roboawh gikamkayh amekene Abiyas, igme amekene Abiyas gikamkayh amekene Asa.

⁸ Igme amekene Asa gikamkayh amekene Josafá, igme amekene Josafá gikamkayh amekene Jorawh, igme amekene Jorawh gikamkayh amekene Uziyas.

⁹ Igme amekene Uziyas gikamkayh amekene Jotawh, igme amekene Jotawh gikamkayh amekene Akaz, igme amekene Akaz gikamkayh amekene Ezekiyas.

¹⁰ Igme amekene Ezekiyas gikamkayh amekene Manassés, igme amekene Manassés gikamkayh amekene Amoh, igme amekene Amoh gikamkayh amekene Josiyas.

¹¹ Igme amekene Josiyas gikamkayh amekene Jekoniyas gikakkis gisamwivwi. Igkis amadga wayk avim ini hawkri ku aysaw hiyeg izhaewyenevwi tivikepka avitit Babiloniyamnaw.

¹² Ayteke ariwnteke ini ku samah igkis tivikepka avitit Babiloniyamnaw, igme amekene Jekoniyas kakamkayh amekene Salatiyew, igme amekene Salatiyew gikamkayh amekene Zorobabew.

¹³ Igme amekene Zorobabew gikamkayh amekene Abiwdi, igme amekene Abiwdi gikamkayh amekene Eliyakih, igme amekene Eliyakih gikamkayh amekene Azor.

¹⁴ Igme amekene Azor gikamkayh amekene Sadoki, igme amekene Sadoki gikamkayh amekene Akih, igme amekene Akih gikamkayh amekene Eliyudi.

¹⁵ Igme amekene Eliyudi gikamkayh amekene Eleazar, igme amekene Eleazar gikamkayh amekene Matah, igme amekene Matah gikamkayh amekene Jakó.

¹⁶ Igme amekene Jakó gikamkayh José, ku pariye kiyavuno Mahi gugihgi. Egme Kiyavwiye Jesus ginag. Igme Kiyavwiye Jesus igi Cristo, ig Uhokri gikanyan adahan ukumaduketniwiy.

¹⁷ Hene, ku samah giwenketeke amekene Abraawh he danuhe git amekene Davi, wis pukuh ku ig Kiyavwiye Cristo kadahan madikawku gikebikis gihawkrivwi akak paxnika gawnakis (14). Hawata madikawku akak paxnika gawnakis (14) akiw ku samah giwenketeke amekene Davi he igkis amekenegben tivikepka avitit Babiloniyamnaw. Ayteke ariwnteke ini he danuhe arit igwa Kiyavwiye Cristo giwayvuka, hawata wis pukuh madikawku gikebikis gihawkrivwi akak paxnika gawnakis (14) akiw.

Jesus Cristo giwayvuka

¹⁸ Ig Kiyavwiye Jesus Cristo giwayvuka in han: Ginag, kiyavuno Mahi, eg kuwis ahegbet gunetni gikak José. Heneme avit egkis hamah, eg kuwis biwhkisno giwntak Uhokri Gitip.

¹⁹ Igme José, ku kakak Mahi hamehpiyo, ig waditye awayg. Nikwe ig awna abet gihiyekemni: — Eg Mahi biwhkisno. Ke nutuhbe eg mehe gumun. Ku hene nikwe amawka nah maytevgu. Heneme nah ka muwaka marakwig giwtrikkis hiyeg. Ka sam. Nah maytevgute mownye kahadbe hiyeg ka hiyak.

²⁰ Ig ivegminene gihiyekemni hene, pahaye adahan pahavwi ahj Uhokri giwatni hiyapkiswe git garisunawak. Ig ahj awna git: — Kiyavwiye José, pis ku pariye amekene Davi gihiwhi, ka muwaka avis maripkaw gukak kiyavuno Mahi, mmanawa eg biwhkisno giwntak Uhokri Gitip.

²¹ Eg pamakutaknek pahavwi bakimni, pisme sarayhnek gukamkayh giw Jesus, inakni giw “Uhokri ig amnihkevutne”, mmanawa ig amnihnek madikte gihiyegavu. Ig kehnek igkis isahptaw ariw givathawnikis.

²² In madikte danuh hene kahadbe in kahayak ku samah minikwak Kiyavwiye Uhokri awna givitimpi gawneve. Igme gawneve awna:

²³ “Aysawnemenek pahavu himano egu biwhkisnek eg sarayh gukamkayh awayg, ig kanumkanek Emanuel.” Inakni giw wownavrikwiy, “Uhokri ay ukakwiy”.

²⁴ Ayteke ig José wadise, ig ihe inakni ahj giwn. Ig maripkew gukak kiyavuno Mahi.

²⁵ Heneme ig ka meh gimun gukak he eg pamakuteke gukamkayh. Eg pamakuteke, eg sarayh gukamkayh, igme José sarayh bakimni giw Jesus.