Markus 15 - Uhokri Gahegbetawni Nukune akak Sawmus

Jesus ay givetun Pilatus

¹ Hewke nikwe hawkanawa neras muwveg kiyatyevwi gikakkis neras judeyenevwi giwewkistenkis gikakkis neras kannuhekevutnevwi amin amekene Moís gikumadukan igkis kehe givahdukawnikis. Ayge igkis ahegbete ginetnikis kabayntiwa. Ayteke nikwe igkis wanakminase Kiyavwiye Jesus. Igkis waxwevgi ta gimkanit ner hiyaptigi romayene ig Pilatus. Igkis danuh atere, igkis ikevgi ta giwakuwit.

² Ayge nikwe ig Pilatus ayavgi: — Mmah pis hiyeg judeyenevwi gikivarakis? Igme Kiyavwiye Jesus kaytwa giwn: — Henewa ku samah pis awna.

³ Ayteke neras muwveg kiyatyevwi igkis kamiyevgi ku ig keh mbayka ka aynsima.

⁴ Ig Pilatus hiyapni hene, ig ayavgi: — Ka ba pis timap ku samah igkis kamiyep ku pis keh mbayka ka aynsima? Mmah pis yumahwatma pikaytwanwatma?

⁵ Kameki ig Kiyavwiye Jesus kaytwame giwnkis. Igme Pilatus hiyapni hene, ig wakaymni ka aynsima.

Jesus daddahkiswika

⁶ Avim ini ahawkanavrik danuh adahan hiyeg judeyenevwi gifetrakis. Abet ini gifetrakis ig hiyaptigi gibetki isahkis pahavwi awayg ku pariye paraksepkare ayge. Mpuse kamukri ig isahkiswiye pahavwi ku pariye hiyeg fetyavu isahkiskere.

⁷ Ayge pahavwi awayg ariku parakseket payak gikakkis nawenyevwi ku pariye hahayruke gikak ikivarat. Ig umehe pahavwi. Giw Bahabas.

⁸ Ayge nikwe ka aynsima hiyeg fetyavu pahadguhwa atere git Pilatus. Igkis aya git: — Uya isahkis udahan pahavwi paraksepkatinene ku samah inpawa pis keh avim inin.

⁹ Igme Pilatus kaytwa giwnkis: — Ba yis muwaka nah isahkis yidahan ner ikawvarinene yikivara judeyenevwi?

¹⁰ Ig awna inakni mmanawa ig hiyak kabayntiwa ku neras muwvegviyene ike Kiyavwiye Jesus ta giwakuwit he avatranen ku samah igkis atihapnig. Givewkankam ku igkisme hiyeg fetyavu muwaka adahan gamnihten.

¹¹ Heneme neras muwveg kiyatyevwi wagese neras fetyavu gihiyekemnikis kahadbe igkis isahkisase Bahabas mpinekata igkis isahkisase Kiyavwiye Jesus. Nikwe igkis hiyeg awna git Pilatus: — Isahkis udahan Bahabas.

¹² Igme Pilatus ayavgikis akiw: — Mmah nah keh nikwe gikak ner awayg ku pariye yis kanum judeyenevwi gikivarakis?

¹³ Igkisme madikte kabimanave. Igkis awna: — Uya daddahkiswinig udahan!

¹⁴ Igme timapni hene, ig ayavgikis: — Mmahki? Pariye mbayka gikehni? Igkisme kabiman pi kihawnate akiw: — Daddahkiswinig!

¹⁵ Igme Pilatus hiyapni hene, ig kehpiye neras hiyeg gibetkikis. Ayteke nikwe ig isahkisase Bahabas gidahankis. Igme Kiyavwiye Jesus ig biwhkisevgi akak tigay. Ayteke ig ikevgi ta giwakuritkis gisuwtatavu adahan igkisme gideddehpitni.

Jesus mahivwihka gavitkis suwtat

¹⁶ Ayge nikwe igkis gisuwtatavu waxwe Kiyavwiye Jesus ta givinbukut hiyaptigi. Ini iwetrit giwnavrikkis romayenevwi kewye “Piretóriyu”. Ayge igkis pahadguhe madikte suwtat ta ganwat adahan gimahivwihpitni. Igkis awna gitkis: — Uyay arehwa gikak. Uyay kawihkis gikawihni givitit kewa pahavwi ikivaratbe ku samah ig kawih dagam wagageboye akak gisuwvren karukri wahano.

¹⁷ Ayteke nikwe igkis kadagmanevgi akak pahak dagam wagageboye, igkis imeve puduku, igkis kehe gisuwvren nikak.

¹⁸ Ayteke igkis mahivwihpig. Igkis awna git: — Aa, Kiyavwiyad, kibeyne pis ay kuri. Pis judeyenevwi gikivarakis.

¹⁹ Ayteke igkis biwhpig gitewha akak pahat yakot akat, igkis tuvestevgi. Igkis paberetusew gitivut ke wotbe igkis gikiythetnibe.

²⁰ Pisenwa gimiythankis igkis wiwhe ini dagam givititak, igkis kawihkise git gisimsa ku pariye gikawhan. Ayteke nikwe igkis tivikevgi avititak paytwempu adahan gideddehpitni.

Simawh ayava Jesus hiyuh giyakni

²¹ Ku aysaw igkis avigku ahin igkis patipteke gikak pahavwi awayg sireneyene kewye Simawh. Ignewa gigkis Alixandre gikak Rufu. Ig gaytni powketeke. Igkisme neras suwtat mpiksaptihpig adahan ig gayavetni Kiyavwiye Jesus hiyuhne giyakni. Igme ihe giwnkis.

Jesus deddehpika aminat giyakni

²² Ayteke igkis waxwe Kiyavwiye Jesus ta avitit paha waxri imuhgivitnene kewye Gowgota. Inakni wownavrikwiy “Waxri Hiyeg Gaptiwvitwiye”.

²³ Ayge igkis suwtat akeke win git Kiyavwiye Jesus. In wageska akak iveyti tagetrene gih kewye “miha”. Igme hiyapni hene, ig ka higapni.

²⁴ Ayteke igkis deddehpig ta aminat giyakni. Pisenwa gidaddahnikis, igkis arehwa akak tip adahan hiyap ku pariye kabunuganen adahan ig darihpiye Kiyavwiye Jesus gikawihni. Hene igkis ibekhevyes gikawihni pawtak.

²⁵ Igkis daddehpig inute kamuw.

²⁶ Ayge amin giyakni avitmin gitew pahak kagta daddahka atere adahan areketni ku pariye gikehnitnene ta gitkis hiyeg. Amadga ini kagta awna: “Judeyenevwi Gikivarakis.”

²⁷ Hawata akiw igkis deddehe piyana gikebikis amevwavye ta aminat giyaknikiswa payak gikak Kiyavwiye Jesus. Pahavwi daddahka kihehaptak pahavwime patuwanaptak.

²⁸ Henewa in danuh ku samah Uhokri gannasan awna. In awna: “Ig ikakanek ke wotbe ig kakehniyebe.”

Jesus mahivwihka ayge amin giyakni

²⁹ Ka aynsima hiyeg mpiya awvre. Ayge igkis mahivwihpig. Igkis sassah gitewkis adahan areketni ku samah igkis ka batek gikak. Igkis awna git: — Kineykap kuri ku samah pis awna: “Nah mehbete Uhokri Givin. Ayteke abet amamnampiye hawkri nah kannikasin akiw.”

³⁰ Asa amnih pivit kuri. Ku pis igyewa Kiyavwiye Uhokri gikamkayh, nikwe muhuk ayteke kuri aminatak piyakni.

³¹ Neras muwveg kiyatyevwi gikakkis neras kannuhekevutnevwi amin amekene Moís gikumadukan hawata igkis mahivwihpig. Igkis kinetihwa pawtak. Igkis awna: — Kuwis ig amnihe nawenyevwi hiyeg, kuri givitme ig ka hiya aramnihka.

³² Ku ig Cristo, ku ig Uhokri gikanyan adahan ukumaduketniwiy, ku igyewa hiyeg izhaewyenevwi gikivarakis, hiyawa ig muhuk ayteke aminatak giyakni. Ku wixwiy hiyap ig muhuk ayteke, nikwe wixwiy iha giwn. Hawata akiw neras amevwavye ku pariye daddahka ayge gihumwa Kiyavwiye Jesus igkis hawata mahivwihpig.

Jesus miyap

³³ Ayteke puwipka danuh. Pahaye adahan kamuw abutni ka kabutni akiw. Hawkri misanpi muwapuw he daraka kamuw in kavusa kabutni akiw.

³⁴ Avim ini daraka kamuw, ig Kiyavwiye Jesus kabiman akak gihawna giwnavrik. Ig awna: — Eloí, Eloí, lemá sabaktâni? Inakni wownavrikwiy: “Nuwohkiga, nuwohkiga mmahki pis ikiswen?”

³⁵ Gaytakis hiyeg ku pariye tabirbetnene ayge igkis timapni hene, igkis timap tarakise. Igkis awna: — Atabiswanay. Ner awayg ig humekne amekene Eliyas.

³⁶ Pahavwime gaytakis ig timapni gabiman hene, ig muwaka adahan gamnihten. Ig sigise kibehtenwa ig iwe paha arikna ku pariye mitibetnene. Ig subukwin ahakwat win suwiyweye adahan anugasene. Ig ike akisurik pahat yakot akat. Ig tarekwin ta gimkat Kiyavwiye Jesus kahadbe givewkan ig susni. Heneme nawenyevwi hiyeg ayge igkis hiyapni hene, igkis awna git: — Miniw giw. Uyay hiyap ba ig amekene Eliyas danuhwatma adahan giwiwhpitni aytakihan.

³⁷ Igme Kiyavwiye Jesus kabiman akak gihawna akiw. Giyakek madike. Ig miyap.

³⁸ Nikwenewa avim ini, ini kamis amaptenten Kiyavwiye Uhokri giwskeki pi kiyatenene ku pariye arikunene Uhokri Givin, in sigke pabakak. Nikwenewa ku aysaw ig miyap, amun ini in sigka ayta inutak danuhte ta warikwit. In woke ahin ta arikut Kiyavwiye Uhokri giwskeki.

³⁹ Ig Kiyavwiye Jesus miyavi, pahavwi romayene suwtat gikivarakis ig tabir ayge givetuna. Ig hiyapni hene ku samah gimiremni, ig awna: — Inyewa ner awayg Kiyavwiye Uhokri gikamkayh.

⁴⁰ Aygwata kiyavunogben egkis hawata ivegbet atere. Ayge eg kiyavuno Mahi Madalena eg pahavu gaytakis, hawata pahavuwa Mahi akiw eg pahavu gaytakis. Eg ginagkis Tiyagu gikak José. Hawata kiyavuno Salome pahavu gaytakis.

⁴¹ Egkis noras ku pariye danuhpanovwi payak gikak Kiyavwiye Jesus avititak Galileyamnaw. Egkis ku pariye hiyaknovwi gikak. Hawata akiw ka aynsima nawenyovwi kiyavunogben ayge ku pariye danuhpanovwi payak gikak arimkanit paytwempu Jerusalém.

Jesus avuhpika

⁴² Aygete pahavwi awayg kewye José arimateyene danuh atere. Ig pahavwi gaytakis neras judeyenevwi giwewkistenkis. Ig kiyatye hiyeg. Ig wahepnenekwa Uhokri gikumadukan ku aysaw in danuh.

⁴³ Ig hiyapni hene ku samah takuwa samdi, kuwis ahawkanavrik danuh adahan ahegbetaw adahan mayekne samdi, ig kibokahwe ig tivik ta gimkat Pilatus. Ig danuh atere git, ig awna git: — Kiyavwiye, uya amnihun isaksan adahan nah iweviye amekene Jesusmin givit.

⁴⁴ Ig Pilatus timapni hene, ig wakaymni adahan ku samah ig Kiyavwiye Jesus ayipa gimiremni. Ig watihe ner suwtat gikivarakis, ig ayavgi: — Mmah ayipte Jesus gimiremni?

⁴⁵ Igme suwtat gikivarakis kaytwa giwn: — Ihi. Ayipa gimiremni. Igme Pilatus timapni hene, ig awna ta git: — Wani ig ikepka ta git kiyavwiye José.

⁴⁶ Igme José timapni hene, ig tivik. Ig isime pahak dagam seyne barewbetye. Ayteke ig tivik wiwhe Kiyavwiye Jesus givit aminatak giyakni. Ayteke ig awasminevgi akak ini dagam. Pisenwa ig sarayhe givit ta arikut pahayku imewti ku pariye atikka ariku tip amiyokni. Ayteke ig wagesmine pohow tip adahan gisabwatip.

⁴⁷ Egme Mahi Madalena gukak nor Mahi ku pariye José ginag, egkis hiyap ku kiney givit sarayhpika.