YUNUS 1 - BUKI SUSI Wahasa ngu Taghul᷊andang l᷊ou-l᷊ou

I Yunus nul᷊umawang parenta ngu Mawu

¹ Pia su silou, Mawu nuhengetang si Yunus, ana i Amitai.

² Hengetang-E, “Dakoe tamai sarang Niniwe, soa ko l᷊abo e'e, guna ngu pamataku, ual᷊ingu Ia matitong himoneu taumata ngu soa e'e ko dal᷊ai kahingang.”

³ Arawe i Yunus katewe namundal᷊i sarang tampa ko wal᷊inge nutingkaghea bou Mawu. I sie nakoa sarang Yopa, dang nutapari nakarea kapal᷊i ko muwua sarang Spanyol. Suapang bou namaehi tikete, i sie naawi su kapal᷊i, bou e'e namundal᷊i singkahindo dingang u taumata ngu kapal᷊i nakoa sarang Spanyol guna ngu mutingkaghea bou Mawu.

^4-5 I Yunus nul᷊umintu sarang l᷊al᷊ung u kapal᷊i dang nul᷊umal᷊oka su se'e, bou e'e nikapatikilang mal᷊uma. Bou e'e Mawu nupasongo ngu anging mauha su l᷊auri, turusi nariadi suwu-suwu ko l᷊abo kahingang, ko namungkusi kapal᷊i e'e hakiu masandighi mahose. Manga taumata ngu kapal᷊i nataku kahingang dang kapuhungkihae makitul᷊ung su dewange simbau-simbau. Tadeau mal᷊iwiri bou silaka masilari, i sire nundume l᷊urang u kapal᷊i e'e sarang sasi.

⁶ Su tempo ngu kapiteng u kapal᷊i e'e nul᷊umintu sarang l᷊al᷊ung u kapal᷊i, i sie nakawua si Yunus su se'e katikie. Bou e'e i sie nangul᷊i, “Seng tumaniewe i kau nakatiki wanua ko kiri'i! Kaehongte, puwangung! Pukal᷊iomanengko su dewangu pundo tul᷊ung. I sai matitong, i sie sarung mukumindaghi si kite hakiu i kite ta mawinasa.”

⁷ Suapang i Yunus dang kapiteng e'e naawi sarang wawoe, manga taumata ngu kapal᷊i e'e nangul᷊i simbau su ko wal᷊inge, “Maite i kite manawu undi tadeau i kite makatitong i sai ko nunsal᷊a hakiu i kite nikahinomang u silaka i'i!” I sire nanawu undi dang areng i Yunus nikasawu.

⁸ Bou e'e i sire nangul᷊i si Yunus, “Tingari i kau nakakoa silaka i'i? I kau bou apa? Apa bangsangu? Nakurawe i kau ene su si'i?”

⁹ Nisimbahi Yunus, “Ia tau Ibrani. Ia manumba Mawu Ruata su sorga, ko nundiadi l᷊auri l᷊au l᷊ul᷊unge.”

¹⁰ Bou e'e niwuke'e kirapa i sie nutawakal᷊i nutumal᷊ang bou Mawu. Nakaringihi e'e manga taumata ngu kapal᷊i nanamba nataku l᷊ai, dang nangul᷊i si sie, “Wal᷊inge gampang kakanoau e'e!”

¹¹ Tintal᷊a e'e suwu-suwu sauneng kapanambange uhae, bou e'e manga taumata ngu kapal᷊i nakina si sie, “Apa ko mambeng koateng i kami si kau tadeau suwu-suwu i'i mangiro?”

¹² Nisimbahi Yunus, “Wahungte ia sarang l᷊al᷊ung u l᷊auri, nal᷊ahe suwu-suwu i'i sarung mangiro. Watu'u orasi i'i ia matitong, himoneu ko ia nakakoa suwu-suwu ko mauha i'i nahino si kumu.”

¹³ Kateho manga taumata ngu kapal᷊i mborong kaputawakal᷊inge singapang botonge kapundalunge kapal᷊i e'e sarang l᷊ul᷊unge. Kateho suwu-suwu mang katatambange uhae, hakiu tawakal᷊i ngi sire takoae mangal᷊enge.

¹⁴ Watu'u e'e i sire nukui su Mawu, “O Mawu, i kami mukahioro, ariwe wala i kami mawinasa ual᷊ingu mangal᷊a sinangou taumata ko ta nukoa sal᷊a manga apa si kami. O Mawu, I Kau seng nukoa apang ko nikao-U.”

¹⁵ Bou e'e i sire nundume si Yunus sarang l᷊al᷊ung u l᷊auri. Kuteu suwu-suwu e'e nangiro nutumiu.

¹⁶ Manga taumata ngu kapal᷊i e'e nataku kahingang su Mawu, dang suapang natul᷊i, i sire nanumba ngu korbang l᷊au nudiandi manga haghi su Mawu.

¹⁷ Tintal᷊a e'e Mawu nupasongo ngu kina ko l᷊abo simbua ko namelohi si Yunus. Kuteu i Yunus natana su l᷊al᷊ung u tiang u kina e'e tilu l᷊ou tilu huwi l᷊iwuenge.