YUDAS 1 - BUKI SUSI Wahasa ngu Taghul᷊andang l᷊ou-l᷊ou

¹ Manga ana u simbau ko seng nikuiang dang ko nangilembo ikukindaghi u Mawu Ruata Yamang, l᷊au u nidiagateng guna ngi Yesus Kristus. Kere l᷊ang I Yesus Kristus, ia – i Yudas – ana u simbau bo i Yakobus,

² muharapi: Mal᷊umbako Mawu Ruata mangonggo u al᷊amati, kakindaghi l᷊au u purarame si kumu maul᷊i-ul᷊i.

Manga sihing u meteri

³ Manga ana u simbau ko ikukindaghi! Ia tinga-tingari pia pandungku mamohe surati si kumu nangiral᷊ing kasasal᷊amati ko seng nikapundangeng i kite. Kateho orasi i'i ia pia pundangku guna ngu mangonggo sasasa si kumu dingang u surati i'i tadeau i kumu turusi muhal᷊i guna ngu pangangimang ko seng nionggo u Mawu Ruata paghisa su manga umati guna ngu sarang panginsuenge.

⁴ Watu'u su wugha ngi kite pia manga pusingkatau ko nusumu nutingkal᷊au su manga tal᷊oara i kite. I sire manga taumata ral᷊ughi ko mangal᷊imputari habari al᷊amati u Mawu Ruata ngi kite, tadeau makarea wulae mupasuwang u kao i sire. Dang i sire ta manarima I Yesus Kristus kere simbau Mangangawasa dang Mawu ngi kite. Mangki ndahuwite hukumang si sire seng kal᷊ahabari su l᷊al᷊ung u buki susi.

⁵ Kaul᷊i u e'e i kumu seng matitong. Kateho ia mang mo tumanata si kumu bou hal᷊i kirapa Mawu nangal᷊amati tau Israel bou soa ngu Mesir, kateho bou e'e nupakawinasa ngu manga taumata ko ta mangimang su tal᷊oara i sire.

⁶ Tinaungete l᷊ai manga malaikati ko namal᷊iu bou kawasa ngi sire, hakiu i sire nanintang u tampa i sire. Mawu Ruata nuhapusi manga malaikati dingang u hante sarang kakal, su l᷊al᷊ung u tampa ko marundung su wal᷊ang u dunia. Pai se'e i sire nitahangeng turusi sarang hukumang si sire ipakanawo su L᷊ou ko kabuhakenge e'e.

⁷ Tinaungeko l᷊ai soa ngu Sodom l᷊au Gomora dingang u manga soa su sindihange, ko taumatange nukoa manga hal᷊i kere ko nikoa u manga malaikati e'e. I sire nukoa manga hal᷊i ko l᷊amuhu l᷊au ral᷊ughi, hakiu i sire niwaukang dingang u putung ko kakal, tadeau makoa putinaungang su kaul᷊i u taumata.

⁸ Kere'e l᷊ai manga taumata e'e kapusipiri sarang i sire nukoa dosa su watangeng i sire. I sire nupakasana kawasa ngu Mawu Ruata dang nuhinakang kaul᷊i u niriadi ko mawantughi su sorga.

⁹ Mikhael sisane, ko tumbonang u manga malaikati, mborong ta paghisa nukoa ko kere'e. Su tempo ngi sie nurarendehi dingang u setang su l᷊al᷊ung u purarendehi i sai ko sarung makarea bangke ngi Musa, Mikhael ta wahani mamonesi su setang dingang u manga didato l᷊ahinakang. Mikhael kitang nangul᷊i, “Mawu sarung muheang si kau!”

¹⁰ Kateho dingang u manga l᷊ahinakang, manga taumata e'e mundoka kaul᷊i u patiku ko ta nikahinganeng i sire. I sire musul᷊ung kere manga binatang ko takoae sipirange, ko matitong manga hal᷊i dingang u pundang i sire. Kateho bou manga hal᷊i e'e ko makakoa kawawinasa si sire.

¹¹ Silaka si sire! I sire seng nutumuhu l᷊al᷊eng ko nil᷊al᷊engang i Kain. Tadeau makahombang doi, i sire nupakasilaka watangeng i sire su kuwa ngu kapapal᷊iri, musul᷊ung kere i Bileam. Dang i sire nipakawinasa watu'u namarontaki kere i Korah.

¹² Su tempo i kumu nukoa sal᷊iwang, lulu'u manga taumata e'e makasuka su tal᷊oara i kumu. Watu'u i sire kumang maanggang takoae manga meange, dang kitang mutinaung watangeng i sire sisane. I sire l᷊ai kere winawa ko tiukang u anging, kateho tawe mutahiti. I sire l᷊ai kere kau ko ta muwawua maning l᷊ai su tempo muwua; manga kau ko seng nisawu hamue ko seng nahango kahingang.

¹³ Musul᷊ung kere suwu ngu l᷊ua su sasi, kere l᷊ai i sire mupasuwu ngu manga kakanoa ko makamea. I sire ko musul᷊ung u manga wituing ko kaputaunge dang ko seng pia tampae nisadia u Mawu Ruata su l᷊al᷊ung u tampa kararundung ko sarang kal᷊iwuenge.

¹⁴ I Henokh, hintou kapitunge bo i Adam, horo seng mbuae nihabareng u manga taumata. I Henokh nangul᷊i, “Tuhunge, Mawu sarung sumongo dingang u manga hiwu nge malaikati-E ko susi

¹⁵ guna ngu mamonesi kaul᷊i u taumata. Mawu sarung muhukung apang taumata ko dal᷊ai watu'u manga kakanoa i sire ko l᷊amuhu. Dang I sie sarung muhukung u taumata bardosa dang durhaka watu'u kaul᷊i u didato l᷊ahinakang ko niul᷊i i sire.”

¹⁶ Manga taumata e'e sintinia l᷊ai mukal᷊ibubu dang mumpunsal᷊a ngu taumata ko wal᷊inge. I sire muwiahi tumuhu manga kao i sire ko bardosa. I sire muwuke ngu ta mutatahino hal᷊i watangenge sisane, dang mul᷊ewa taumata tadeau makahombang kal᷊auntung.

L᷊aingati l᷊au sasasa

¹⁷ Kateho ana u simbauku ko ikukindaghi, tinaungeko apang ko horo nihabari u manga rasuli u Mawu ngi kite I Yesus Kristus.

¹⁸ I sire lebe horo nupakatitong si kumu uare masandighi u panginsuenge dunia sarung l᷊umitou manga taumata ko sarung muheghesi si kumu, e'e manga taumata ko muwiahi tumuhu manga kao i sire ko bardosa.

¹⁹ I sire i'i apang taumata ko mukoa putatal᷊ei. I sire ta nikawasa ngu Roh u Mawu Ruata, kateho wambingang u manga kao u dunia.

²⁰ Kateho i kumu, manga ana u simbauku, atoriko turusi puwawiahi kumu su l᷊al᷊ung pangangimang si Yesus Kristus. Pangangimang i kumu e'e tumaniu susi. Su tempo e'e, pukal᷊iomanengte dingang u kawasa Roh u Mawu Ruata,

²¹ dang puwiahiko sintinia su l᷊al᷊ung u tintanuri kakindaghi u Mawu Ruata su kanandu i kumu kapangampal᷊i tul᷊umang I Yesus Kristus Mawu ngi kite, ko sarung mangonggo u puwawiahi nasuku dang kakal si kumu.

²² Su manga taumata ko ta natantu naunge, harusi we i kumu mupatode u kakindaghi.

²³ Wol᷊engko taumata pasuwang bou l᷊al᷊ung u putung tadeau mupakasal᷊amati sire. Su taumata ko wal᷊inge i kumu pangandaghi ko kakindaghi dingang u pundang u katataku, kateho pubunsite sarang pakeang i sire ko seng nal᷊amuhu dingang u kao i sire ko bardosa.

Kal᷊iomaneng daralo

²⁴ Mawu Ruata, ko makatahang mundiaga tadeau i kumu ta manawo, dang ko makatahang mumbawa si kumu sarang saruang-E ko mawantughi dingang u l᷊al᷊uasi dang takoae kurange,

²⁵ kitang I sie sisane Mawu Ruata, Mananal᷊amati kite su l᷊al᷊ung I Yesus Kristus Mawu ngi kite. Ko I Sie Mawu Ruata ko mawantughi, kal᷊abokange, makawasa, dang makal᷊ahungge bou horo pai sarang tempo i'i dang sarang kal᷊iwuenge! Aming