YOSUA 1 - BUKI SUSI Wahasa ngu Taghul᷊andang l᷊ou-l᷊ou

Mawu Ruata nundoi si Yosua pangaho Kanaan

¹ Samuri ngu papateng i Musa, l᷊ang u Mawu e'e, Mawu nuhengetang si Yosua ana i Nun tumataking i Musa.

² Mawu nuhengetang, “L᷊ang-Ku i Musa seng nate. Inau orasi i'i mapiang i kau dang kaul᷊i u umati Israel pusasadia guna ngu mul᷊umiu Sal᷊uhi Yordan, dang sumu su tana ko Daku nionggo si sire.

³ Mawu seng nuhengetang si Musa uare apang tampa ko nil᷊al᷊engang i kumu seng Daku nionggo si kau, Yosua, dang su kaul᷊i u umati-Ku.

⁴ Tampa u sarung mawal᷊andang bou tana l᷊inggi simbuka ngu timuhi sarang manga wul᷊uri u Libanon su simbuka ngu sawunahi dang bou sal᷊uhi Efrat ko l᷊abo e'e su simbuka ngu raki turusi mahaki u tana ngu bangsa Het sarang L᷊auri Tal᷊oarae su simbuka ngu wahe.

⁵ Takoae sarang singkatau l᷊ai sarang makatanggong mamata si kau, Yosua, su kanandu u puwawiahiu. Watu'u Ia sintinia sarung mahundingang si kau kere horo Ia mahundingang si Musa. Ia ta sarung manintang si kau.

⁶ Kenangko i kau pangaking dang pakawahani, watu'u i kau sarung mangaha bangsa i'i su tempo ngi sire mukumangiang su tana ko Daku nipudiandi si i upung i kumu.

⁷ Kitang, mambengwe i kau tinga-tingari mangaking dang pakawahani. I kau mambeng mundiaga tadeau i kau mundaringihi kaul᷊i u atorang ko nionggo si Musa l᷊ang-Ku e'e si kau, kumbahang i kau mul᷊enga sarang singkodo, kuteu i kau sarung ial᷊amateng.

⁸ Buki u tita e'e mambeng ibasa ngu sintinia su tingo ngu umati-Ku. Ndungeko buki e'e l᷊ou dang huwi, tadeau sintinia i kau mukoa kaul᷊i u ko kawawohe su l᷊al᷊unge. Boko i kau mukoa kaul᷊i u e'e, wiahiu sarung mapia dang ial᷊amateng.

⁹ Tinaunge, Ia seng nuparenta si kau tadeau i kau tinga-tingari mangaking dang wahani! Kumbahang i kau mataku arako mal᷊ome, watu'u Ia Mawu Ruata ngu mahundingang si kau sarang apa l᷊ai l᷊al᷊engang u.”

I Yosua nangonggo parenta dang tatul᷊ara su umati Israel

¹⁰ Kuteu i Yosua nuparenta manga pangaha u umati Israel

¹¹ tadeau pul᷊iku su kaul᷊i u pukakemang u umati Israel dang pangonggo u parenta i'i, “Panadiako sinasa watu'u tilu l᷊ou l᷊ai i kumu mambeng mul᷊umiu Sal᷊uhi Yordan guna ngu kumangiang su wanua ko nionggo Mawu Ruata ngu si kumu.”

¹² Su suku ngi Ruben, suku ngi Gad, dang stenga suku ngi Manasye, i Yosua nangul᷊i,

¹³ “Tinaunge! I Musa l᷊ang u Mawu e'e seng nangul᷊i si kumu himoneu tana su simbuka ngu raki Sal᷊uhi Yordan i'i nionggo u Mawu Ruatangu si kumu guna ngu mariadi wanua ngi kumu.

¹⁴ Kaul᷊i u ana kawing i kumu dang binatang papal᷊iharang i kumu botonge matana su si'i, kateho manga sordado ngi kumu mambeng muparang dang mangihoro manga taumata ngu Israel ko wal᷊inge mul᷊umiu Sal᷊uhi Yordan.

¹⁵ I kumu mambeng mutul᷊ung i sire sarang i sire kumangiang su tana su simbuka ngu wahe u Sal᷊uhi Yordan i'i ko nionggo u Mawu Ruata ngu si sire. Samuri ngu Mawu mangonggo u kapapia su kaul᷊i u bangsa Israel mbuhue we i kumu botonge musul᷊e sarang tana ngi kumu sisane su simbuka ngu raki Yordan i'i, ko nionggo i Musa l᷊ang u Mawu e'e si kumu.”

¹⁶ Kuteu suku ngi Ruben, I Gad, dang stenga suku ngi Manasye e'e nusumimbahi, “Maneng apa ko iparenta ngu si kami, sarung koateng i kami, dang aneng sarang apa l᷊ai i kau mundoi i kami pal᷊al᷊eng, i kami sarung l᷊umal᷊eng.

¹⁷ I kami mang tumuhu si kau, musul᷊ung kere i kami l᷊ai sintinia tutuhu si Musa. Mal᷊umbako Mawu Ruatangu mahundingangu kere I Sie seng nahundingang i Musa!

¹⁸ Apang taumata ko mandi sumulung su kawasangu, arako ta tumuhu parentau, sarung ihukung pateng. Kenangko i kau pangaking dang pakawahani!”