YOHANES 1 - BUKI SUSI Wahasa ngu Taghul᷊andang l᷊ou-l᷊ou

Wisara ko mangonggo u puwawiahi

¹ Su panitakenge, suhoro u dunia niriadi; seng tuwei pia Wisara. Wisara e'e ene dingang u Mawu Ruata Dang Wisara e'e l᷊ai musul᷊ung u Mawu Ruata.

² Borong bou titae I Sie seng nuhundingang u Mawu Ruata

³ Kaul᷊ie nariadi bo I Sie, dang bou patiku ko ene, takoae sarang simbau ko nikoa su l᷊ikuri Sie.

⁴ Wisara e'e ko wanggili u puwawiahi, dang puwawiahi ko makaonggo u kasasua su taumata.

⁵ Kasasua e'e suminang su l᷊al᷊ung u kararundung, dang kararundung e'e ta makapate kasasua.

⁶ Pia taumata ko nusumongo ko niroi u Mawu Ruata, arenge i Yohanes.

⁷ I sie nusumongo nuhabari kasasua e'e, tadeau apang taumata mangimang.

⁸ I sie sisane wal᷊inge kasasua e'e, i sie kitang mul᷊ahabari u kasasua e'e.

⁹ Kasasua kahingang ko mupakasua apang taumata, seng nasongo su dunia.

¹⁰ Wisara seng ene su dunia, dunia nariadi bo I Sie, kitang dunia wugha ngi Sie

¹¹ I Sie nusumongo su wanua-E sisane kateho bangsa-E ta nanarima I Sie.

¹² Kitang pia l᷊ai taumata ko nanarima I Sie dang mangimang si Sie; i sire e'e ninggilenang-E haki makoa ana u Mawu Ruata,

¹³ Ko nipahinding wal᷊inge bou taumata, watu'u puwawiahi ko wuhu e'e asal᷊i ko bou Mawu Ruata.

¹⁴ Wisara seng nariadi taumata, I Sie natana su tal᷊oara i kite, dang i kite seng nakawua kawawantughi-E. Kawawantughi e'e nitarima-E kere Ana I Yamang mang simbau. Bo I Sie i kite makawua Mawu Ruata dang kakindaghi-E si kite.

¹⁵ I Yohanes nusumongo kere saksi-E, I sie nuhabari: “Ko i'i I Sie daku nihabari: I Sie sarung sumongo samuri ngu ia, kateho I Sie nangilembo l᷊abo bou ia, watu'u suhoro ia ene, I Sie seng tuwei ene.”

¹⁶ I Sie napene u kakindaghi; takoae suenge I Sie nangal᷊amati si kite.

¹⁷ Tita ngu Mawu nitarima i kite bo i Musa. Arawe kakindaghi dang kasasatia ngu Mawu Ruata nil᷊ahe bou l᷊al᷊ung I Yesus Kristus.

¹⁸ Takoae ko seng bou nakawua Mawu Ruata, su l᷊ikuri Ahusi Yamang ko mang simbau, ko musul᷊ung I Yamang dang marike kahingang si Sie. Ko I Sie seng nupakal᷊ahe I Yamang si kite.

Kasaksiang i Yohanes

¹⁹ Manga mangangawasa ngu tau Yahudi su Yerusalem nundoi u manga imam l᷊au manga tau Lewi tamai sarang koa i Yohanes dang pukina si sie, “I Kau i'i ko i sai?”

²⁰ I Yohanes nangaku mal᷊ahe, “Ia wal᷊inge ratu mananal᷊amati.”

²¹ I sire nukina, “Boko kere'e i kau ko i sai? I kau i Elia?” “Wal᷊inge” sasimbahi Yohanes. “Apa i kau Nabi?” i sire nukina l᷊ai. “Wal᷊inge” sasimbahie.

²² “Boko kere'e, habariete si kami ko i sai i kau i'i,” Angkung i sire, “tadeau i kami makasimbahi si sire ko nundoi i kami. Apa didato ngu hal᷊i u watangengu?”

²³ I Yohanes nusumimbahi, “Ia i'i i sie ko seng niul᷊i i nabi Yesaya: ‘Taumata ko nunggo su tana l᷊inggi: Pakateneko l᷊al᷊eng guna ngu Mawu.’ ”

²⁴ Manga taumata ko niroi u tau Farisi

²⁵ nukina, “Boko i kau wal᷊ingewe Ratu Mananal᷊amati, wal᷊inge i Elia, wal᷊inge l᷊ai nabi, nakurawe i kau nanahani?”

²⁶ I Yohanes nusumimbahi, “Ia nanahani dingang u ake. Kateho su tal᷊oara i kumu pia taumata ko i kumu wugha

²⁷ I Sie nusumongo samuri ngu ia; kateho sarang mamuka tal᷊i ngu sapatu-E ia ta hinonge.”

²⁸ Kaul᷊i e'e nariadi su Betania, su simbuka ngu raki bou sal᷊uhi Yordan tampa i Yohanes nanahani.

Ahusi Domba ngu Mawu Ruata

²⁹ Ndai mal᷊ou, i Yohanes nakawua si Yesus nasongo sarang koae, bou e'e i Yohanes nangul᷊i, “Tuhungete Ahusi Domba ngu Mawu Ruata, ko mangumu dosa ngu dunia.

³⁰ Seng I Sie ko daku nihabari sarung sumongo samuri ngu ia, kateho nangilebe l᷊abo bou ia, watu'u suhoro u ia nipahinding, I Sie seng tuwei ene.

³¹ Horo ia wugha ngi Sie, sumbal᷊i ia nusumongo manahani dingang u ake tadeau komol᷊ang u Israel matitong I Sie.”

³² I Yohanes l᷊ai nangonggo u kasaksiang i'i, “Ia nakawua Roh u Mawu Ruata nul᷊umintu bou l᷊angi kere paluma bou e'e natana si Sie.

³³ Su tempo e'e ia mborong wugha ngi Sie. Kateho Mawu Ruata ko nuparenta si sia panahani dingang u ake seng nangul᷊i si sia, ‘Boko i kau makawua Roh u Mawu Ruata l᷊umintu, bou e'e natana su singkatau, ko I Sie e'e sarung manahani dingang u Roh u Mawu Ruata.’

³⁴ Ia sisaneku seng mbuae nakawua si Sie,” Angkung i Yohanes, “dang ia nangonggo u kasaksiang himoneu ko I Sie Ahusi Mawu Ruata.”

Manga Tumatuhu I Yesus ko kahimotongange

³⁵ Ndai nal᷊ou i Yohanes sau ene su tampa e'e dingang u tumatuhu-E sire rua.

³⁶ Su tempo i sie nakawua si Yesus nusumahe, i sie nangul᷊i, “Tuhungete seng e'e! Ahusi Domba ngu Mawu Ruata.”

³⁷ Tumatuhu i Yohanes rarua e'e nakaringihi e'e, turusi tamai nutumuhu si Yesus

³⁸ I Yesus nuwihu sarang l᷊ikuri, dang nakawua si sire rua katuhue si Sie. I Sie nukina, “Apa reakeng i rua?” Sasimbahi i sire rua, “Rabi, su apa i Rabi natana?” (Rabi mangal᷊enge meteri.)

³⁹ I Yesus nangul᷊i, “Maite tuhunge ngi rua.” I sire rua tamai dingang I Sie dang nakawua su apa i Sie natana. Tempo e'e pukul᷊i pa wawul᷊aeng. L᷊ou e'e i sire natana singkahindo dingang-E

⁴⁰ Singkatau bou i sire rua ko seng mbuae nakaringihi apang ko niul᷊i i Yohanes bou e'e natamai nutumuhu si Yesus, I sie e'e ko i Andreas ana u singkatau ngi Simon Petrus.

⁴¹ Masahawu-sahawu i Andreas nundea si Simon, ana u singkataunge, dang nuhabari si sie, “I kami seng nusuma dingang I Mesias!” (Mesias musul᷊ung I Kristus: Ratu Mananal᷊amati.)

⁴² I Andreas nangunturi si Simon sarang koa I Yesus. I Yesus nutaeri si Simon, wuhue nangul᷊i, “I kau Simon ana i Yona. I kau sarung isigho si Kefas.” (Kefas musul᷊ung i Petrus, mangal᷊enge: wul᷊uri watu.)

I Yesus nukui si Filipus l᷊au i Natanael

⁴³ Ndai nal᷊ou I Yesus namutusi makoa sarang Galilea. I Sie nusombang i Filipus, dang nangul᷊i si sie, “Maite tuhu si Sia!”

⁴⁴ I Filipus asal᷊ie bou Betsaida, tampa katanakeng i Andreas l᷊au i Petrus.

⁴⁵ I Filipus nusuma i Natanael dang nangul᷊i si sie, “I kami seng nusuma u taumata ko nisigho ngi Musa su l᷊al᷊ung u Buki Tita ngu Mawu Ruata, dang ko nihabari u manga nabi. I Sie e'e I Yesus bou Nazaret, ana i Yusuf.”

⁴⁶ Kateho i Natanael nusumimbahi, “Apa botonge pia simbau ko mapia nusumongo bou Nazaret?” Sasimbahi Filipus, “Maite i kau sisane ngu putuhung”

⁴⁷ I Yesus nakawua si Natanael nusumongo, wuhue nangul᷊i u hal᷊i i sie, “Tuhungete, e'e tau Israel tutunge. Takoae manga hal᷊i l᷊eo si sie.”

⁴⁸ I Natanael nukina si Yesus, “Kirapa I Tuang nakakil᷊al᷊a si sia? I Yesus nusumimbahi; su horo i Filipus nukui si kau, Ia seng nakawua si kau su pung u kau ara e'e.”

⁴⁹ I Natanael nangul᷊i, “Tuang Guru, i Tuang ko Ahusi Mawu Ruata! Ko I Tuang Ratu ngu tau Israel!”

⁵⁰ I Yesus nangul᷊i, “I kau mangimang; kitang ual᷊ingu Ia nangul᷊i Ia seng nakawua si kau su pung u kau ara e'e? I kau sarung makawua kaul᷊i hal᷊i ko mborong nangilembo l᷊abo bou e'e!”

⁵¹ “Tingari, pangimangte i kau sarung makawua l᷊angi mawuka, dang apang malaikati u Mawu Ruata lintu awi su tingo ngu Ahusi Taumata.”