Yoël 1 - BUKI SUSI Wahasa ngu Taghul᷊andang l᷊ou-l᷊ou

¹ Ko i'i tatanata ngu Mawu si Yoel, ana i Petuel.

Umati Israel nasusa naung ual᷊ingu suke ngu anseri nasue nikang u kumbati

² Pundaringihiko, ei manga ko maghaghurang; Putuhungko, kaul᷊i u taumata su Yehuda. Apa hal᷊i ko kiri'i seng mbuae nariadi su tempo ngi kumu, arako su tempo ngu manga i upung i kumu?

³ Wukeko karariadi e'e su manga ana u; tadeau i sire muhabari su manga ana i sire wuke e'e. Hintou tuhue mambeng pundaringihi l᷊ai, dang panupasi su hintou tuhue.

⁴ Ghapang u kumbati ko ta ikarekeng ul᷊ie, nurumoro su manga anseri dang nukumang manga wuange. Apang ko nil᷊umbei ngu ghapang simbau, nipakasue u ghapang ko wal᷊inge.

⁵ Ei manga ko babukang, puwangungko! Ei manga tahainung, pumpal᷊eheko! Watu'u anggori ko wuhu seng niaho bou mohong i kumu.

⁶ Ghapang u kumbati nangalo wanua ngi kite; i sire matoghasi dang ta ikahabari ul᷊ie, isie mal᷊ahoro kere isi ngu singa kowawine.

⁷ I sire nakapate kau anggori kite, dang kau ara ngi kite kate ko nal᷊umbei tuiri. Manga l᷊aese niwuni i sire, hakiu manga lelange nawira.

⁸ Pumpal᷊eheko, ei umati, kere mahua ko nasusa ko numpal᷊ehe ngu papate ngu tunangange ko ikukindaghi.

⁹ Gandung l᷊au anggori seng nailang bou Wal᷊e ngu Mawu. Kuteu nul᷊al᷊utute manga imam, ko masatia mutangkiang Mawu.

¹⁰ Manga anseri orasi i'i seng nararusa. Tana nul᷊al᷊utu; watu'u seng nasue apang gandung, seng nukumoho wua ngu anggori, dang seng nasue l᷊ana zaitung.

¹¹ Ei manga musasuang, pukahuangko! Ei mangangawuhi anggori, pumpal᷊eheko! Watu'u gandung, jelai l᷊au kaul᷊i u pananipong seng nasue narusa.

¹² Manga kau bua-bua su anseri nasue nahango kaul᷊ie; kau anggori, apel, ara, korma l᷊au delima. Kuteu ana u kawanua seng ta nul᷊umiaghi.

¹³ Ei manga imam ko nutangkiang su mesba, pul᷊ohoko wal᷊i karong, dang pumpal᷊eheko. Suko su Wal᷊e ngu Mawu guna ngu pukahuang sihuwi matiwatu, watu'u seng takoae korbang anggori l᷊au gandung guna ngu Mawu Ruata ngi kumu.

¹⁴ Parentaiko umati kumu tadeau pupuasa, pamohangko pukakomol᷊i ko l᷊abo! Notiko manga pangaha l᷊au ko maghaghurang l᷊au kaul᷊i u taumata ngu Yehuda, tadeau pasongo sarang Wal᷊e ngu Mawu Ruata, guna ngu pukahioro pundo tul᷊ung si Sie.

¹⁵ L᷊ou ngu Mawu seng masandighi, l᷊ou ko makatataku; tempo ngu Ko Makawasa mupasongo ngu kaghaghoghahi.

¹⁶ L᷊aidopi nasue nawinasa su tingo ngu mata ngi kite su Wal᷊e ngu Mawu Ruata ngi kite seng takoae l᷊ai kal᷊al᷊iaghi.

¹⁷ Sasuang nate su tana ko mahusu. Takoae gandung guna ngu ireso, kuteu manga pundandesonang takoae tahoe dang nakoa tuiri.

¹⁸ Binatang papal᷊iharang kapunggue dang nisal᷊iabae; seng takoae nguda u rindulu guna ngi sire. Ghapang u domba tuhungang seng masandighi mate.

¹⁹ Ia mundo tul᷊ung si Kau, o Mawu watu'u manga nguda u rindulu nasue nahango manga kau l᷊ai nal᷊obe dang nate kere ko nikang u putung.

²⁰ Sarangwe manga binatang u l᷊ul᷊u su kuhunge kapukahioroe si Kau makiontol᷊i. I sire ta nakawatu kao manginung, watu'u manga sal᷊uhi namara kaul᷊ie.