YESAYA 1 - BUKI SUSI Wahasa ngu Taghul᷊andang l᷊ou-l᷊ou

¹ Tahoe buki i'i manga tatanata hal᷊i u Yehuda l᷊au Yerusalem ko nipakal᷊ahe u Mawu Ruata si Yesaya, ana i Amos, su tempo ngi Uzia, i Yotam, i Ahas, l᷊au i Hizkia namarenta su Yehuda.

Mawu Ruata nanughu umati-E

² Pundaringihiko ei l᷊angi, sumpikeko ei dunia! Mawu nuhengetang, “Manga ana ko Daku nihiking namarontaki si Sia.

³ Sapi nakakil᷊al᷊a mawunge, keledai nakakil᷊al᷊a tampa u kang ko nisadia ngu mawunge. Arawe umati-Ku Israel ta; i sire ta nakahingang u e'e.”

⁴ Kasasilaka si kumu bangsa ko bardosa, manga taumata ko ral᷊ughi l᷊au ko dal᷊ai! I kumu seng nanawo ual᷊ingu manga dosa ngi kumu. I kumu seng nanolaki Mawu dang nutumal᷊ikuri Mawu Ruata Ko Kasusinge ko mambeng isumba ngi kumu.

⁵ Nakurawe i kumu mangkate turusi kapundendehi? Apa i kumu mo ihukung lebe mabuha l᷊ai? Timbo i kumu seng napene u hene, naung l᷊au sipirang i kumu maturu.

⁶ Bou timbo sarang pal᷊eri u l᷊aeri kaul᷊ie masaki. I kumu napene u sahunu, nawal᷊ighi l᷊au nal᷊al᷊esi. Manga l᷊esi i kumu e'e mborong tangkeng nil᷊epo arako niwukisi, ta l᷊ai niundangeng dingang u l᷊ana.

⁷ Wanua ngi kumu seng nipakawinasa; manga soa ngi kumu seng nasue nitutung. Su tingo ngu mata ngi kumu tau raghi nangal᷊a tana ngi kumu dang nundusa kaul᷊ie.

⁸ Kitang Yerusalem nal᷊umbei, kateho kere soa ko nal᷊iwung dang ta makakoa manga apa, kere selo su awuhi anggori arako raseng su awuhi u katimu.

⁹ Boko Mawu Ko Makawasa ta nul᷊iwiri pirangkatau guna ngi kite, i kite seng nawinasa kahingang, kere Sodom l᷊au Gomora.

¹⁰ Yerusalem, manga pangaha l᷊au bangsa ngi kumu seng nakoa kere taumata ngu Sodom l᷊au Gomora. Pundaringihiko apa ko nipuhengetang u Mawu si kumu, sumpikeko apang ko nitintiro ngu Mawu Ruata ngi kite.

¹¹ Mawu nuhengetang, “Su naung i kumu Ia mo su kaul᷊i u korbang ko sintinia isumba ngi kumu si Sia? Ia seng nasahe dingang u manga domba korbang tongkateng i kumu l᷊au tawa ngu ana u sapi ngi kumu. Daha ngu sapi ko ese, domba l᷊au kambing ta Daku ikao.

¹² I sai nangoro si kumu pumbawa apang sasumba e'e su tempo ngu i kumu nusumongo nanumba si Sia? I sai nangoro si kumu tarai namai su Wal᷊e-Ku ko Susi?

^13-14 Takoae mangal᷊enge i kumu numbawa sasumba e'e. Ia musumuka dingang u rarurue. Ia mabunsing dang ta makatahang mutuhung si kumu mamantughi Wul᷊ang ko Wuhu, l᷊ou-l᷊ou ngu Sabati l᷊au manga l᷊ou ko l᷊al᷊abo dingang manga pukakomol᷊i u agama. Kaul᷊i u e'e nil᷊amuhukang i kumu dingang u manga dosa ngi kumu dang kere wawaneng si Sia; Ia seng nawau namikul᷊i e'e.

¹⁵ Boko i kumu muhengke l᷊ima ngi kumu mukal᷊iomaneng, Ia mandi mupandung. Ta mundia kirapa kaul᷊ie kakal᷊iomaneng i kumu, Ia mandi mundaringihi e'e, watu'u dingang u l᷊ima ngi kumu e'e i kumu seng masau mamate.

¹⁶ Uhasiko watangeng i kumu sarang pakabursi. Pangiroko kaul᷊i u kal᷊al᷊ai ko nikoa i kumu e'e. Ore, kumbahang sau mukoa ko dal᷊ai,

¹⁷ pangundungko pukoa ko mapia. Pakateiko kal᷊aadili dang pangiroko pananira; onggoko haki u tau kasisi dang tatawangeko parkara ngu manga ko wawal᷊u.”

¹⁸ Mawu nuhengetang, “Maite ipakasue i kite parkara i'i. Manengwe i kumu mahamu ko bung ual᷊ingu manga dosa ngi kumu, i kumu sarung Daku iuhasi makoa ko mawira mabursi kere kapesi. Manengwe manga dosa ngi kumu maul᷊i dang mabuha, i kumu sarung Daku ampungang pakasue.

¹⁹ Boko i kumu mo matuhu si Sia, i kumu sarung munteng u kaul᷊ie ko mapia bou hasili u wanua ngi kumu.

²⁰ Kateho boko i kumu mundoka si Sia, i kumu sarung mate su l᷊al᷊ung u parang. Ia, Mawu, seng nuhengetang.”

Soa ko durhaka

²¹ Soa ko ndahuwite masatia, orasi i'i seng kere singkatau kowawine ko dal᷊ai! Ndahuwite kaul᷊i u taumata ko natana su soa e'e maadili l᷊au matul᷊iri, arawe orasi i'i nikatanakeng u manga tahapate.

²² Yerusalem, ndahuwite i kau kere sal᷊aka, arawe orasi i'i i kau seng takoae harigange l᷊ai. Ndahuwite i kau kere anggori ko matemang, arawe orasi i'i kitang ake sisane.

²³ Manga pangahau tahapundongka dang paparentang u tahatako, i sire mo manarima paraseng l᷊au doi sasoroki. I sire mandi manatawang manga ana ko kasisi su pangadilang; mandi mundaringihi kakalaki u manga ko wawal᷊u.

²⁴ Watu'u e'e Mawu Ko Makawasa, Mawu Ruata ngu Israel nuhengetang, “Ei manga roka-Ku, Ia sarung mamal᷊isi saki u naung si kumu, hakiu i kumu seng ta mupakasusa ngu Ia l᷊ai.

²⁵ Ia sarung mukumanoa su tingo ngi kumu. Kere taumata mamowori logam, i kumu sarung Daku isahi; apang ko mal᷊amuhu sarung daku irume bo i kumu.

²⁶ I kumu sarung Daku nggilenang u manga mamamonesi l᷊au mananughu kere ndahuwite. Kuteu Yerusalem sarung isigho soa ko maadili l᷊au masatia.”

²⁷ Mawu ko maadili, kuteu I Sie sarung mangambang Yerusalem dang manga taumatange ko nusisili.

²⁸ Arawe manga taumata ko bardosa ko nundongka si Sie sarung ipakawinasa-E dang kaul᷊ie ko nanintang I Sie sarung ipakailang.

²⁹ I sire sarung mamea ual᷊ingu manumba manga kau l᷊au nupakahae ngu manga awuhi guna ngu manga dewa.

³⁰ I sire sarung makoa kere kau ko l᷊abo ko nahango raunge, dang kere awuhi ko ta nil᷊al᷊engang u ake.

³¹ Kere watang u mei ko nahango natutung u hena u putung, kere'e l᷊ai manga taumata ko mangangawasa sarung ipakawinasa ngu manga kakanoa i sire sisane ko dal᷊ai, dang takoae ko mupangiro ngu kaghaghoghahi e'e.