YAKOBUS 1 - BUKI SUSI Wahasa ngu Taghul᷊andang l᷊ou-l᷊ou

¹ Ana u simbau umati Mawu Ruata kaul᷊i u ko nukaesi su kaul᷊i u dunia! Adati bou ia, i Yakobus, L᷊ang u Mawu Ruata dang l᷊ang u Mawu Yesus Kristus.

Pangangimang dang kapapilesa

² Manga ana u simbau! Boko i kumu makahombang apang haghi ngu sasal᷊uka, i kumu mambeng pia pundang kal᷊auntung.

³ Watu'u i kumu matitong, uare bo i kumu tatapi mangimang su Mawu su tempo musombang u sasal᷊uka, suenge e'e i kumu makoa matatapi.

⁴ Diagatete tadeau katatapi naung u e'e turusi tumuwo sarang i kumu makoa tinga-tingari masuku l᷊au u takoae kurange su l᷊al᷊ung u patiku hal᷊i.

⁵ Boko pia singkatau su tal᷊oara i kumu ko ta tumaniu mapilesa, kenangko i sie pundo bou Mawu Ruata, kuteu Mawu Ruata sarung mangonggo u kapapilesa si sie; watu'u apang taumata, Mawu Ruata mangonggo dingang u kal᷊al᷊ondo ngu naung dang dingang u pundang u kakindaghi.

⁶ Kateho taumata ko mundo, mambeng pangimang, i sie ta wotonge magho. Watu'u taumata ko magho e'e musul᷊ung u bulari su l᷊auri ko nitiu anging tamai-namai.

^7-8 Taumata ko kere'e ta matatapi sipirange; i sie ta makaal᷊a kaputusang apa-apa su l᷊al᷊ung u kaul᷊i u ko nikoae. Watu'u e'e, tawahal᷊uasi l᷊ai i sie muharapi sarung makarea manga apa bou Mawu.

Kasasusa dang kakala

⁹ Taumata Sahani ko susa kenangko mupundang mal᷊uasi boko Mawu Ruata mupakarange i sie.

¹⁰ Dang taumata Sahani ko kala kenangko i sie mupundang mal᷊uasi l᷊ai, boko Mawu Ruata mupakasana i sie. Watu'u taumata kala sarung mailang kere bungang u onasi.

¹¹ Su tempo ngu matangutiti sumuwang dingang matiti kahingang, kuteu onasi e'e sarung mal᷊obe hakiu marondosi bungange dang mailang l᷊ai sidadae. Kere'e l᷊ai taumata ko kala, i sie sarung maghaghoro su tempo i sie kapupal᷊al᷊eng u hambakie.

Hombang dang sasal᷊uka

¹² Kal᷊al᷊uasi su taumata ko matatapi su tempo ngi sie makahombang sasal᷊uka. Watu'u bo i sie makatahang su l᷊al᷊ung u sasal᷊uka e'e, i sie sarung makatarima wawaehi, e'e puwawiahi ko seng nipudiandi ngu Mawu Ruata suapang taumata ko kumindaghi u Mawu Ruata.

¹³ Boko pia singkatau kasal᷊ukateng u ko kere'e, kumbahang i sie mangul᷊i “Sasal᷊uka i'i nasongo bou Mawu Ruata,” watu'u Mawu Ruata ta kasal᷊ukateng u ko l᷊al᷊ai dang l᷊ai manal᷊uka sarang singkatau.

¹⁴ Arawe taumata kasal᷊ukateng boko i sie niwol᷊eng dang kaakal᷊eng u kaoe sisane ko dal᷊ai.

¹⁵ Tuhue boko kaoe ko dal᷊ai e'e nituhukang, Inau sarung muhana u dosa; dang boko dosa e'e seng naghurang, inau suenge e'e papate.

¹⁶ Kumbahang we i kumu kal᷊eokang, manga ana u simbau ko ikukindaghi.

¹⁷ Apang l᷊aonggo ko mapia dang kakindaghi ko masuku asal᷊ie bou sorga nipal᷊intu u Mawu Ruata, ko nukoa patiku kasasua su l᷊angi. I sie e'e Mawu Ruata ko ta nuwal᷊u, dang ta l᷊ai mukoa pia kararundung sarang singkodo.

¹⁸ Bou kao-E sisane I Sie nukoa si kite apang ana-E bou didato-Nge ko nuhino. I Sie nukoa e'e tadeau i kite makahombang tampa ko kahimotongange su tal᷊oara u apang ko nikoa-E

Mundaringihi dingang mukoa

¹⁹ Putuhungko i'i pakapia-pia, manga ana u simbau ko ikukindaghi! Apang taumata mambeng masahawu mundaringihi, kateho mal᷊ongge mudidato dang mal᷊ongge muwawal᷊uang.

²⁰ Taumata ko mawawal᷊uang ta makakoa ko mapia, ko makal᷊uasi naung Mawu Ruata.

²¹ Watu'u e'e rumeko apang narang ko mal᷊amuhu dang ko dal᷊ai. Tarimako dingang kasasana naung didato ko nisuang u Mawu Ruata su l᷊al᷊ung u naung i kumu, watu'u didato e'e pia katatoghasi guna ngu mupakasal᷊amati si kumu.

²² Kenangko i kumu mukoa apang ko nihabariu u Mawu Ruata; kumbahang kitang mundaringihi hakiu dingang kere'e i kumu mangakal᷊i watangeng i kumu sisane.

²³ Taumata ko mundaringihi didato ngu Mawu Ruata, kateho ta mukoa e'e musul᷊ung taumata ko kaputuhunge pahesie sisane su tingo ngu sahuming.

²⁴ Suapang i sie nutuhung pakapia-pia, i sie natamai dang turusi ta nakatinaung kirapa ghahiu pahesi e'e.

²⁵ Atorang u Mawu Ruata masuku dang pia katatoghasi guna ngu mul᷊iu ngu taumata. Dang taumata ko mamariksa dang mutuhung mapia-pia l᷊au u mupal᷊al᷊eng u manga atorang e'e, dang wal᷊inge kitang mundaringihi bou e'e mul᷊iwuhi, taumata e'e sarung al᷊amating u Mawu Ruata su l᷊al᷊ung u patiku hal᷊i ko ikoae.

²⁶ Boko pia singkatau ko mupundang watangenge singkatau ko satia mangagama, kateho i sie ta mundiaga lilange, kuteu i sie mangakal᷊i watangenge sisane; agamae e'e takoae mangal᷊enge.

²⁷ Tatuhu mangagama ko mapia dang masidada su mata ngu Mawu Ruata Yamang e'e ko: mutul᷊ung u manga rario kasisi dang manga kowawine wal᷊u ko kaputatahang u singsara, dang mundiaga watangenge sisane tadeau kumbahang i rusa ngu dunia i'i.