TITUS 1 - BUKI SUSI Wahasa ngu Taghul᷊andang l᷊ou-l᷊ou

¹ I Titus, anaku! Ia, i Paulus, namohe surati i'i kere l᷊ang u Mawu Ruata l᷊au rasuli I Yesus Kristus. Ia napile l᷊au niroi putul᷊ung apang taumata ko seng nipile-U Mawu Ruata tadeau mupakatoghasi pangangimang i sire. Ia l᷊ai mambeng mangaha si sire tadeau makakil᷊al᷊a tintiro ko nuhino ko nitintiro ngu agama ngi kite.

² Tintiro e'e nuwua bou pul᷊aharapi himoneu i kite sarung manarima puwawiahi ko kahingang l᷊au ko kakal. Puwawiahi e'e seng nipudiandi ngu Mawu Ruata suhoro tita u dunia – dang Mawu Ruata ta nutul᷊ong.

³ Su tempo ko nuhino, Mawu Ruata nupakal᷊ahe diandi-Nge e'e su l᷊al᷊ung u tanata-Nge. Tanata e'e seng nisarakang-E si sia, dang ia nuhabari e'e bou parenta-Ngu Mawu Ruata mananal᷊amati kite.

⁴ I Titus, i kau ko tinga-tingari anaku, watu'u i karua l᷊awo mangimang si Kristus. Ia muharapi mal᷊umbako Mawu Ruata Yamang l᷊au I Kristus Yesus Ratu Mananal᷊amati kite, mangonggo u al᷊amati l᷊au kapapia si kau.

Pul᷊ahal᷊i i Titus su Kreta

⁵ Ia nanintang i kau su Kreta tadeau i kau botonge makapangurusi apang hal᷊i ko mborong hinong iatori. Dingang l᷊ai, tadeau makapuhengke manga pangaha u jamaati su apang soa. Dang tinaungete apang tintiroku i'i:

⁶ Singkatau pangaha u jamaati mambeng singkatau ko takoae kurange; i sie mambeng kitang pia singkatau kawinge; manga anae mambeng seng mangimang si Kristus dang wal᷊inge ko nawombeng kere manga ana ko begali l᷊au ko ta kaatori.

⁷ Mutatuhung jamaati e'e ko taumata ko mutal᷊ung hal᷊i u Mawu Ruata, i sie kumbahang pia kurange. I sie tawe wotonge maoboti arako mawawal᷊uang, arako mabukang, arako mo mukakoka, arako maanggang su doi.

⁸ I sie mambeng mal᷊uasi manarima taumata su wal᷊enge, makihaghi apang hal᷊i ko mapia, makapukuhirang u watangenge, matul᷊iri muwiahi, susi l᷊au maudupi.

⁹ I sie mambeng puhinggo kahingang su tintiro ko botonge ipangimaneng, musul᷊ung ko seng nitintiro si sie. Dingang kere'e i sie botonge mangonggo sasasa su taumata dingang u tintiro ko nuhino, l᷊au manibo pusansal᷊a ngu manga taumata ko mundoka si sie.

¹⁰ Watu'u maul᷊i taumata ko mo mundongka, nangilembo manga taumata ko horo mborong agama ngu Yahudi; i sire nangakal᷊i taumata ko wal᷊inge dingang u l᷊eo i sire.

¹¹ Apang taumata ko kere'e hino ngu singsingang mohong i sire, watu'u i sire kitang mupubingo u apang walagheng dingang u manga tintiro ko ta mutatahino. I sire nukoa e'e kitang tadeau makarea kal᷊auntung ko wal᷊inge su tampae.

¹² Pia l᷊inau singkatau nabi ngi sire, ko asal᷊i l᷊ai mang bou Kreta, nangul᷊i, “Apang tau Kreta ko mal᷊al᷊eo, l᷊au musul᷊ung u binatang l᷊ul᷊u ko maanggang l᷊au ko maalasi.”

¹³ Apang ko niul᷊i u nabi e'e mang tingari. E'e sabapie i kau mambeng panungkul᷊i si sire pakatumang; tadeau i sire tatapi muhinggo su tintiro ko nuhino

¹⁴ dang seng ta l᷊ai muhinggo su apang wuke ngu tau Yahudi arako su manga atorang ko nikoa u manga taumata ko mandi manarima tintiro ko nuhino e'e.

¹⁵ Kaul᷊i u hal᷊i e'e ko susi suapang taumata ko susi. Arawe su apang taumata ko sipirange mal᷊amuhu l᷊au ko takoae pangangimange, takoae sarang simbau hal᷊i ko susi, watu'u sipirang naung i sire seng mal᷊amuhu!

¹⁶ I sire nangul᷊i uare i sire matitong Mawu Ruata, kateho kakanoa i sire nusunial᷊i u Mawu Ruata. Kakanoa i sire makararinting, l᷊au i sire mandi mundaringihi; i sire manga taumata ko ta makakoa hal᷊i ko mapia.