SASĚBANG 1 - BUKI SUSI Wahasa ngu Taghul᷊andang l᷊ou-l᷊ou

Manga taumata ngu Israel nisira su Mesir

¹ I Yakub ko isigho l᷊ai i Israel, tamai nakoa sarang Mesir dingang u manga anae l᷊au u wal᷊agheng i sire simbau-simbau. Manga ana i Yakub e'e ko:

² I Ruben I Simeon I Lewi I Yehuda

³ I Isakhar I Zebulon I Benyamin

⁴ I Dan I Naftali I Gad I Asyer.

⁵ Hintou ngi Yakub e'e kaul᷊ie pitumpul᷊o su kataunge. I Yusuf seng lebe horo ene su Mesir.

⁶ Pira ngkatempo tuhue i Yusuf l᷊au u manga ana u simbaue napul᷊e asal᷊ie, kere'e l᷊ai manga taumata singkahindo dingange.

⁷ Kateho hintou ngi sire, ko manga tau Israel, nuhana nupung tumaniu maul᷊i dang ul᷊i i sire natamba dingang maehong kahingang, hakiu wanua Mesir napene kere i sire.

⁸ Kasamuriange singkatau ratu ko wuhu ko wugha ngi Yusuf nanita nuparenta su Mesir.

⁹ I sie nangul᷊i su kawanuange, “Manga taumata ngu Israel e'e sal᷊a makatataku si kite, watu i sire tumaniu maul᷊i l᷊au lebe matoghasi bo i kite.

¹⁰ Boko mariadi parang, pia sarung mariadi i sire mutatamba dingang u roka i kite tadeau mundoka si kite, bou e'e tumal᷊ang manintang u soa i'i. I kite mambeng mudea l᷊al᷊eng tadeau i sire kumbahang makoa maul᷊i.”

¹¹ Kuteu manga taumata ngu Mesir nuhengke manga mudadiaga su bangsa Israel guna ngu mupakabuha u wiahi sire dingang u hal᷊i ko mabuha. I sire nisihasa nupararisi guna ngu ratu Mesir, manga soa ngu Pitom l᷊au Raamses guna ngu tampa pundesonang u sal᷊iumpuhi.

¹² Kateho manamba umpisang u tau Mesir, kasaunge natamba ul᷊ie taumata ngu Israel dang kasaunge nakeke i sire su patiku soa e'e, hakiu tau Mesir i sire nakapundang pia katataku.

¹³ Bou e'e kere kahasange i sire nangumpisi taumata ngu Israel,

¹⁴ dang nukoa wiahi sire nasingsara. Takoae kakindaghie i sire nisihasa puhal᷊i mababuha su manga hal᷊i u pul᷊ahal᷊ikang dang su manga anseri.

¹⁵ Bou e'e ratu ngu Mesir nangonggo parenta si Sifra l᷊au si Pua, dua ngkatau biang ko mutul᷊ung manga kowawine ngu Ibrani mahinding.

¹⁶ Angkung i ratu ngu Mesir, “Su tempo ngu i kumu mutul᷊ung manga kowawine ngu Ibrani mahinding, tinaungeko i'i: bou anae ko nipahinding ko ese; pateko i sire! Bou anae ko nipahinding e'e kowawine walate i sie wiahi.”

¹⁷ Kateho biang darua e'e taumata ko mataku su Mawu Ruata. I sire tawe mo mundaringihi parenta ngu ratu dang nupakawala ngu kaul᷊i u rario manga ko ese wiahi.

¹⁸ Inau ratu nukui si sire rua biang e'e l᷊au nukina, “Nakurawe i kumu nupakawala manga ana ko ese e'e wiahi?”

¹⁹ I sire nusumimbahi, “Ko wawine ngu Ibrani tawe kere kowawine ngu Mesir. I sire kere'e kapiange mahinding. Su horo biang sumongo, anae seng mbuae nipahinding.”

^20-21 Inau Mawu Ruata nangal᷊amati manga biang e'e dang nangonggo hintou si sire, watu'u i sire nangadati Mawu Ruata. Dang taumata ngu Israel natamba maul᷊i l᷊au matoghasi.

²² Bou e'e ratu nangonggo parenta e'e su kaul᷊i u kawanuange, “Apang ana ko ese tau Ibrani ko wuhue nipahinding mambeng irume sarang l᷊al᷊ung u sal᷊uhi Nil, kateho kaul᷊i u ana kowawine walate i sire wiahi.”