SASASA 1 - BUKI SUSI Wahasa ngu Taghul᷊andang l᷊ou-l᷊ou

Hariga ngu manga tatughu ngi Salomo

¹ Ko i'i manga tatughu ngi Salomo ahusi Daud, ratu ngu Israel.

² Ol᷊ange e'e ko mutul᷊ung taumata tadeau matitong kirapa makoa ko mapilesa, dang matitong atorang u puwawiahi dang botonge makahingang manga didato ko mal᷊al᷊al᷊ung mangal᷊enge.

³ Manga tatughu i'i manintiro kirapa taumata botonge muwiahi mapilesa, matul᷊iri, maadili, l᷊au mutatahino.

⁴ Taumata ko takoae titonge nitintiroe hakiu pia sipirang ko mal᷊oahi, dang taumata ko makakuda nitintiroe makoa taumata ko pande dang botonge musipiri matilang.

⁵ Dingang u manga tatughu i'i taumata ko mapilesa l᷊ai sarung matamba titonge, dang taumata ko seng pia sikol᷊ange sarung makarea l᷊aaha.

⁶ Dingang kere'e i sire botonge makahingang mangal᷊enge ko kawawuni su l᷊al᷊ung u tatughu dang makahingang manga didato ngu taumata ko mapilesa dingang u manga soali ko ipakinateng i sire.

Sasasa su manga ko makakuda

⁷ Tadeau makahombang titong ko kahingang, kahimo-himotongange taumata mambeng matitong mangadati l᷊au mataku u Mawu. Taumata ko l᷊ongong ta muhariga ngu kapapilesa dang mandi tintirong.

⁸ Raringihiko anaku, apang ko niul᷊i i papa l᷊au i mamangu si kau,

⁹ watu'u manga tintiro ngi sire makapia naungu kere l᷊al᷊ighahi u timbo l᷊au hante ko makasidada watangengu.

¹⁰ Boko taumata ko bardosa mul᷊ana si kau, anaku, kumbahang mutumuhu l᷊al᷊ana ngi sire.

¹¹ Andenge i sire mangul᷊i, “Kate, intate i kite mundea taumata dang mul᷊iwung si sie. Apiru kapunanakali, intate i kite mangalo taumata ko takoae sal᷊ae.

¹² Orasi i'i i sire kapuwiahi ko sanang l᷊au ko sehati, kateho mai-mai i sire sarung makoa kere taumata ko masandighi mate.

¹³ I kite mangal᷊a manga rarotong i sire ko mal᷊al᷊ighari, tadeau wal᷊e ngi kite mapene u rarotong ko nihampasi.

¹⁴ Maite tuhu! Apang ko nitako hindo ipahia i kite pusul᷊ung!”

¹⁵ Kumbahang mutumuhu dingang u taumata ko kere'e, anaku! Pakarauko bo i sire.

¹⁶ I sire ta makatahang marumasi boko tangkeng nukoa ko dal᷊ai. I sire mo maehong-ehong mamate.

¹⁷ Mbuhue burung l᷊ai mang sarung ta musumu su soma ko nitaing su tingo ngu matange,

¹⁸ kateho manga taumata ko dal᷊ai e'e katewe nutaing u seri guna ngu watangenge sisane – seri ko sarung makasilaka si sire.

¹⁹ Tingari taumata ko muhambaki dingang mupake u kal᷊ahasa sarung mamaehi dingang u sinangonge sisane.

Tingihi u kapapilesa

²⁰ Pundaringihiko! Kapapilesa mukui su manga l᷊al᷊eng dang mukumiha su manga peleng!

²¹ I sie munggo su manga tukari u soa dang su manga tampa ko marame:

²² “Ei manga taumata ko makakul᷊i! Sarang kangereng i kumu tatapi kere'e? Kangereng murating temponge i kumu mangiro mupakasana u titong dang manolaki tatintiro?

²³ Pundaringihiko si sia boko ia manughu si kumu, kuteu si kumu sarung daku ilahe tataho u naungku dang daku itintiro titongku.

²⁴ I kumu seng daku nikuiang, kateho i kumu ta nundaringihi dang mandi mupandung.

²⁵ Kaul᷊i u sasasaku ta nipandungang i kumu dang tatughuku ta niraringihang i kumu.

²⁶ Ual᷊ingu e'e, boko i kumu masilaka, ia sarung mul᷊umighei ngi kumu. Boko i kumu mataku, ia sarung muheghesi si kumu.

²⁷ Ore, ia sarung muheghesi si kumu boko i kumu maghagha l᷊au mutatahang u singsara ual᷊ingu nikahino ngu silaka ko nusumongo kere suwu-suwu.

²⁸ Su tempo e'e i kumu sarung mukui si sia, kateho ia sarung ta musumimbahi. I kumu sarung mundea si sia sarang manga tampa kateho sarung ta musombang u ia.

²⁹ I kumu kere taumata ko mborong mandi makarea titong dang mabuha mutumuhu Mawu.

³⁰ I kumu mborong mandi manarima manga sasasaku arako mupandung manga tatughuku.

³¹ Ual᷊ingu e'e, i kumu sarung makapundang suwu u manga kakanoa i kumu l᷊au manga kirou ngi kumu ko dal᷊ai.

³² Taumata ko takoae titonge sarung mate ual᷊ingu ta musumpi si sia, dang taumata ko bodoki sarung maghaghoro ual᷊ingu ta mupandung si sia.

³³ Arawe taumata ko mundaringihi si sia sarung mapal᷊ihara. I sie muwiahi mapia dang ta wahal᷊uasu mataku.”