SASANGI 1 - BUKI SUSI Wahasa ngu Taghul᷊andang l᷊ou-l᷊ou

Kasasingsara ngu Yerusalem

¹ Kere'e karumasie Yerusalem orasi i'i, soa ko horo marame kahingang. Horo nakoa ko kapiange bou tal᷊oara u manga bangsa, orasi i'i nakoa kere kowawine ko wal᷊u. Horo soa ko tumaniu ihengke-hengke, orasi i'i seng nikoa l᷊ang.

² Su kanandu u huwi i sie kasangi u susa ngu naung, ake u mata nutumudo su pipi. Takoae sarang singkatau bou manga sintie ko mo muhibori si sie. I sie nipusingking u manga ghawe ko seng nusasul᷊e nakoa roka.

³ I sire ko natana su Yehuda nanintang u wanuange, ual᷊ingu niputahul᷊ang dang tumaniu masingsara. Orasi i'i i sire natana su tal᷊oara u manga bangsa takoae tampa ko makaonggo u purarame. Roka nul᷊iwung si sire su tempo ngu i sire masingsara.

⁴ Su l᷊ou-l᷊ou ko l᷊al᷊abo takoae sarang singkatau nusumongo sarang Wal᷊e ngu Mawu Ruata. Manga ko mal᷊ahua musasamperi pai se'e kaputatahang u singsara, dang manga imam kaputatahang u susa su naung. Takoae taumata su manga tukari u soa, Soa ngu Sion nil᷊ikutang u kasasusa.

⁵ Manga rokae nakauntung ual᷊ingu nakapangawasa si sie. Mawu nukoa si sie nasingsara, ual᷊ingu tumaniu maul᷊i dosange. I sire ko natana su se'e seng nitaweng, dang nihengke sarang pundandumekang.

⁶ Katatoghasi soa ngu Yerusalem kitang wuke ngu tempo horo. Manga mangangahae seng nakoa ko l᷊ome kere rusa ko nal᷊unusi. I sire ta makakoa manga apa su tingo ngu roka ko manahusu.

⁷ Suapang naopehi dang nasingsara, Yerusalem nakatinaung tempo horo, su tempo ngi sie mborong maul᷊i rarotonge; kirapa i sire ko natana su se'e nanawo su l᷊ima ngu roka, dang takoae sarang singkatau ko nusumbala. Manga rokae kitang kal᷊igheinge nakawua kal᷊aopehie.

⁸ Yerusalem nupakal᷊amuhu watangenge sisane dingang nukoa maul᷊i dosa ko makararinting. Kaul᷊ie ko horo mangadati si sie, orasi i'i nuhinakang si sie ual᷊ingu nakawua katatintal᷊ange. I sie nasusa, ual᷊ingu seng namea.

⁹ L᷊amuhue nikawua mal᷊ahe kateho i sie ta nupandung apang ko sarung mariadi su watangenge. Tumaniu ko l᷊abo kal᷊aopehie, kateho takoae sarang singkatau nuhibori si sie. Kuteu i sie nukahioro kakindaghi bou Mawu, ual᷊ingu manga rokae seng nakauntung.

¹⁰ Apang rarotonge seng niaho ngu manga rokae. I sie sarang l᷊ai mumbawua si sire musumu Wal᷊e ngu Mawu Ruata, simbau kakanoa ko ta ipakawala ngu Mawu su taumata ko wal᷊inge umati-E.

¹¹ Dingang mukakahioro i sire ko natana su se'e mundea puwawiahi; rarotong ko mal᷊ighari nitukari sire dingang u boroti, kitang tadeau i sire tatapi wiahi dang ta mate. Yerusalem nunggo, “O Mawu, tuhungeko ia, tuhungeko apang singsaraku.”

Yerusalem nukahioro

¹² “Ei manga taumata ko kasahenge su l᷊al᷊eng, putuhungko dang pusumpiko! Apa pia papahang kere kal᷊intihi ko daku nipundangeng orasi i'i, papahang ko nitimbo ngu Mawu si sia, ual᷊ingu wawal᷊uang-E ko tumaniu l᷊abo e'e?

¹³ Bou l᷊angi nipal᷊intu-E putung ko nanutung sarang l᷊al᷊ung u naungku. Nitaing-E sasaung su tingoku ko nakanawo si sia. Bou e'e niwala-E ia sisaneku nutatahang u singsara su kanandu u l᷊ou.

¹⁴ Nial᷊a-E kaul᷊i u dosaku, bou e'e niiki nakoa simbau, dang nil᷊oho-E su l᷊ehiku, hakiu buhae nakal᷊ome si sia. Mawu nanarakang u ia su roka; ia ta nakakoa manga apa nundoka si sire e'e.

¹⁵ Mawu nupakasana kaul᷊i u pahlawanku ko masasidada. Nikomol᷊i-E sordado tadeau kaul᷊i u taumataku ko makakuda mawinasa. I Sie nul᷊inda-l᷊inda bangsaku sarang naghaghoro, kere taumata ko kapamuhue wua ngu anggori.

¹⁶ E'e sabapie ake u mataku tutudo, takoae ko mangonggo u wawahansang l᷊au l᷊ahibori. Bangsaku seng nikailangeng u kaul᷊i u patiku, ual᷊ingu roka lebe makawasa.

¹⁷ Ia nuhengke u l᷊ima mundo bantuang, kateho takoae ko nangonggo u l᷊ahibori. Bou kaul᷊i u tampa, Mawu nundoho ngu roka; i sire nusumongo mundoka si sia. Ia nikoa kere onasi, barang ko makararinting su tal᷊oara i sire.

¹⁸ Kateho ko Mawu nuhino, ual᷊ingu parenta-E seng daku nil᷊awangeng. Pundaringihiko si sia, ei manga bangsa, putuhungko si sia su l᷊al᷊ung u singsara. Manga anaku ko makakuda ko ese l᷊au kowawine nitaweng, dang nihengke sarang pundandumekang.

¹⁹ Ia nukui manga ghaweku ko mapapia kateho i sire nusingking si sia. Manga imam l᷊au pangaha u bangsa kaul᷊ie seng nate su manga l᷊al᷊eng ngu soa. Su tempo ngu kapundeae kang guna ngu manumpu puwawiahi.

²⁰ O Mawu! Sumpikeko ia, naungku maghagha dang balisa, naghaghoro ual᷊ingu durhakaku horo. Su manga l᷊al᷊eng pia pamamate, su l᷊al᷊ung u wal᷊e pia papate.

²¹ O, Mawu Pundaringihiko kakahioroku, takoae ko nuhibori si sia. Manga rokaku kal᷊iaghi, ual᷊ing I Kau nukoa si sia nasilaka. Pasongoko l᷊ou ko seng nipudiandi-U e'e; koako i sire putatahang u singsara kere ia.

²² Putuhungko kaul᷊i u kal᷊al᷊ai i sire e'e, dang pukoako si sire kere I Kau marea u ia, ual᷊ingu kaul᷊i u dosa ko seng daku nikoa su saruang-U. Ia susahindoro su l᷊al᷊ung u singsara, naungku nasusa l᷊au nal᷊ul᷊e.”