RUTẸ̌ 1 - BUKI SUSI Wahasa ngu Taghul᷊andang l᷊ou-l᷊ou

I Elimelekh dingang u walaghenge nangal᷊ing sarang Moab

^1-2 Su tempo horo su horo u Israel mborong takoae sarang singkatau ratu, tana Kanaan nihombangeng u silaka kal᷊ahutung. Su tempo e'e pia singkatau ko ese arenge i Elimelekh. I sie bou hintou ngi Efrata, dang natana su Betlehem su bahageang u Yehuda. Watu'u silaka kal᷊ahutung e'e, kuteu i sie natamai sarang wanua ngu Moab singkahindo u kawinge, i Naomi, dang i sire rua anae kol᷊aese: i Mahlon l᷊au i Kilyon. Bou e'e i sire natana pai se'e. Su tempo ngi sire mborong pai se'e,

³ i Elimelekh napul᷊e asal᷊ie. Kuteu natintang i Naomi dingang anae rarua.

⁴ Ana rarua e'e nukawing dingang u manga mahua ngu Moab, ko arenge i Orpa dang i Rut. Mapul᷊o taung tuhue,

⁵ ana ko ese i Naomi rarua e'e, nate l᷊ai, hakiu i Naomi nikailangeng u kawinge dingang l᷊ai anae rarua.

I Naomi l᷊au i Rut nusul᷊e sarang Betlehem

⁶ Pira ngkatempo tuhue i Naomi nakaringihi himoneu Mawu seng nangal᷊amati umati Israel dingang suke ngu panipong ko makal᷊uasi. Ual᷊ingu e'e i Naomi dingang ana manuhange darua nusasadia guna ngu manintang u Moab.

⁷ I sire singkahindo nuwua napul᷊e sarang Yehuda. Su tal᷊oara u l᷊al᷊eng

⁸ i Naomi nangul᷊i si sire rua manuhange e'e, “I kumu mapiang kapul᷊e sarang wal᷊e ngi mama ngi kumu. Mal᷊umbako Mawu mapia si kumu kere l᷊ai i kumu seng mapia si sia dang si sire ko nate e'e.

⁹ Mal᷊umbako Mawu mupakawala mangonggo u tunangang i kumu tadeau i kumu sau mukawing.” Saritau niul᷊ikang kere'e, i Naomi nangilei si sire dang nangimbu si sire. Kateho i Orpa l᷊au i Rut nusumangi mauha-uha,

¹⁰ dang nangul᷊i si Naomi, “Ta, Ma! I kami tumuhu singkahindo i mama matamai sarang bangsa ngi mama.”

¹¹ “Kumbahang, ndio!” angkung i Naomi, “I kumu mapiang kapul᷊e'e, apa gunange i kumu tumuhu dingangku? Ia seng ta makahinding u ana guna ngu makoa kawing i kumu.

¹² Kapul᷊ete, ndio, watu'u ia seng tumaniu maghurang sau mukawing. Dang boko mborong pia pul᷊aharapi si sia guna ngu mukawing huwi i'i l᷊ai dang makahombang ana ko ese,

¹³ apa i kumu mo mangampal᷊i sarang i sire mal᷊abo? Tumaniewe watu'u hal᷊i e'e i kumu ta mukawing dingang u taumata ko wal᷊inge? Ta, anaku, kumbahang kere'e! Ia nakapundang nasusa apang ko nikapundangeng i kumu ual᷊ingu hukumang u Mawu si sia.”

¹⁴ I Rut l᷊au i Orpa nusumangi l᷊ai mauha-uha bou e'e i Orpa nangilei apiru nangimbu si emponge bou e'e i sie napul᷊e. Kateho i Rut tawe mo mutal᷊ei ngi emponge e'e.

¹⁵ Nangul᷊iete i Naomi si sie, “Rut, tuhungete! I huengu seng napul᷊e sarang bangsange dang manga mahang mawunge. Tamaite i kau l᷊ai, ndio, tuhukeko i sie mapul᷊e!”

¹⁶ Kateho i Rut nusumimbahi, “Mama, kumbahangwe i Mama mundoi sia mapul᷊e dang manintang i Mama! Ia mang tumuhu singkahindo i Mama. Sarang apa l᷊ai i Mama l᷊umal᷊eng, ia l᷊ai tamai. Suapang i Mama matana, su se'e l᷊ai ia matana. Bangsa i Mama e'e bangsaku. Mawu Ruata ko isumba i Mama, sarung daku isumba l᷊ai.

¹⁷ Su apa l᷊ai i Mama mate, su se'e l᷊ai ia mate dang il᷊uwing. Mawu sarung muhukung sia pakabuha-buha, kamangkeng ia manintang i Mama. Kitang papate makaputal᷊ei si karua!”

¹⁸ I Naomi nakawua himoneu i Rut mang ko l᷊abo naunge mutumuhu, inau i sie ta nakaul᷊i manga apa l᷊ai.

¹⁹ Kuteu i sire nanupasi l᷊al᷊al᷊eng sarang nahumpa su Betlehem kere i sire nahumpa pai se'e, kaul᷊i u soa e'e nughigho. Manga kowawine pai se'e nangul᷊i, “Ko tingari i sie e'e i Naomi?”

²⁰ “Kumbahang mukui sia i Naomi,” angkung i Naomi, “Kuiete ia i Mara, watu'u Mawu Ruata ko makawasa seng nupakawala ngu ia nuwiahi napene u sungkal᷊ange.

²¹ Su tempo ngu ia l᷊umal᷊eng bou i'i wiahiku nasuku, kateho orasi i'i Mawu numbawa sia nusul᷊e dingang u l᷊ima mapul᷊o. Watu'u e'e kumbahang i kumu musigho sia i Naomi l᷊ai, watu'u Mawu ko makawasa seng nuhukung sia dingang maul᷊i kasasusa!”

²² Ko kere'e wukenge kirapa i Naomi nusul᷊e bou Moab singkahindo i Rut manuhange tau Moab e'e. I sire nasongo su Betlehem su tempo ngu manita manipo gandung.