PẸ̌TATIẠ 1 - BUKI SUSI Wahasa ngu Taghul᷊andang l᷊ou-l᷊ou

Taumata ngu Israel nukoa pundarekenang ko kahimotongange

¹ Su l᷊ou kahimotongange wul᷊ang karuange su taung karuange suapang bangsa Israel nanintang u Mesir, Mawu nuhengetang si Musa su l᷊al᷊ung u Kema ngu Mawu su tana l᷊inggi ngu Sinai. Angkung-E,

² “I kau l᷊au i Harun mambeng pukoa pundarekenang kaul᷊i u umati Israel, tumuhu walagheng u simbau-simbau. Koako hunsuri u kaul᷊i u areng u manga taumata ko ese

³ ko umurie duampul᷊o su taunge sintarai ko botonge makoa sordado. I sire mambeng iwohe tumuhu apang komol᷊ang i sire.

⁴ Bou apang suku, pundoko singkatau pangaha u walagheng guna ngu pusumbala si kumu.”

^5-16 Ko i'i areng u manga taumata ko nipile bou umati guna ngu musumbala si Musa l᷊au si Harun dang nakoa pangaha u suku: Suku Pangaha i Ruben i Elizur ana i Syedeur i Simeon i Selumiel ana i Zurisyadai i Yehuda i Nahason ana i Aminadab i Isakhar i Netaneel ana i Zuar i Zebulon i Eliab ana i Helon i Efraim i Elisama ana i Amihud i Manasye i Gamaliel ana i Pedazur i Benyamin i Abidan ana i Gideoni i Dan i Ahiezer ana i Amisyadai i Asyer i Pagiel ana i Okhran i Gad i Elyasaf ana i Rehuel i Naftali i Ahira ana i Enan

Suku Pangaha

¹⁷ Dingang u sumbala ngu taumata mapul᷊odua e'e, i Musa l᷊au i Harun

¹⁸ nundoi kaul᷊i u umati pukomol᷊i su l᷊ou kahimotongange su wul᷊ang karuange, bou e'e wuke hintou ngi sire niwohe tumuhu manga walagheng su l᷊al᷊ung u apang suku ngi sire. Areng u kaul᷊i u manga ko ese ko umurie duampul᷊o su taunge sintarai niwohe dang nirekeng,

¹⁹ kere ko niparenta ngu Mawu. Kaul᷊i u e'e nikoa i Musa su tana l᷊inggi ngu Sinai.

^20-46 Manga taumata ko ese ko umurie duampul᷊o su taunge sintarai ko botonge makoa sordado, niwohe arenge tumuhu hintou l᷊au walaghenge nanita bo i Ruben, ana i Yakub ko iyakang sarang dingang i Naftali, kaul᷊i i sire e'e ko: Suku Ul᷊i u taumata i Ruben 46.500 i Simeon 59.300 i Gad 45.650 i Yehuda 74.600 i Isakhar 54.400 i Zebulon 57.400 i Efraim 40.500 i Manasye 32.200 i Benyamin 35.400 i Dan 62.700 i Asyer 41.500 i Naftali 53.400 Kaul᷊ie: 603.550

Suku Ul᷊i u taumata

⁴⁷ Manga taumata ngu Lewi ta niwohe dingang u manga suku ko wal᷊inge,

⁴⁸ watu'u Mawu seng nuhengetang si Musa,

⁴⁹ “Su tempo ngi kau mamohe areng u manga taumata ko botonge makoa sordado, suku Lewi ta botonge iwohe.

⁵⁰ Roiko i sire pangurusi Kema-Ku dingang u patiku sal᷊iumpuhi. Hal᷊i i sire ko mamikul᷊i Kema-Ku dingang u sal᷊iumpuhi l᷊au u mangurusi. I sire mambeng mukema su kaul᷊i u sindihange.

⁵¹ Kamangkeng i kumu mangal᷊ing, manga taumata ngu Lewi e'e mambeng mamongkari Kema-Ku, bou e'e sau pakipasi suapang pukakemang ko wuhu. Su l᷊ikuri i sire, maning i sai-sai ko humaung Kema e'e mambeng ihukung pateng.

⁵² Manga taumata Israel ko wal᷊inge mambeng mupararisi u kema ngi sire mahia u manga komol᷊ange, apang taumata su l᷊al᷊ung u manga komol᷊ange simbau-simbau su kaul᷊i u sindihang u pandeli u simbau-simbau.

⁵³ Kateho manga taumata ngu Lewi mambeng mukema su kaul᷊i u sindihang u Kema-Ku. I sire mambeng mundiaga tadeau takoae taumata ko humaung, hakiu makawawal᷊uang si Sia dang muhukung umati Israel.”

⁵⁴ Kuteu taumata ngu Israel nukoa kaul᷊i u apang ko niparenta ngu Mawu si Musa.