PĚLAL᷊AHẸ 1 - BUKI SUSI Wahasa ngu Taghul᷊andang l᷊ou-l᷊ou

¹ Tataho u buki i'i muhabari apang ko seng nil᷊ahe I Yesus Kristus su manga apang hal᷊i ko sarung mariadi. Mawu Ruata muhabari si Kristus tadeau I Sie mupakal᷊ahe su manga l᷊ang u Mawu Ruata apang ko sarung mariadi. I Kristus nundoi u malaikati-E si Yohanes, L᷊ang-E, guna ngu muhabari manga hal᷊i e'e si sie.

² Kuteu i Yohanes nuwuke ngu kaul᷊i u ko nikawua nge e'e, dang i'i habari bou hal᷊i u tatanata ngu Mawu Ruata ko nitoghaseng I Yesus Kristus dingang u kasaksiang-E.

³ Pahul᷊iaghite taumata ko mubasa dingang mundaringihi habari tataho u buki i'i, l᷊au u tumuhu apang ko kawawohe su l᷊al᷊unge. Watu'u ta mal᷊iwue l᷊ai kaul᷊ie i'i sarung mariadi.

Adati su pitu jamaati

⁴ Manga ana u simbau ko ene su pitu jamaati su wanua ngu Asia! Ia i Yohanes, muharapi i kumu nionggol᷊ang u al᷊amati dang kapapia bou Mawu Ruata – I Sie ko ene, ko seng ene, dang tatapi ene turusi dang l᷊ai bou kapitunge roh ko ene su saruang u kakangianeng kararatuang u Mawu Ruata,

⁵ dang bo I Yesus Kristus saksi ko satia. Ko I Sie kahorokange sau nipuwiahi bou papate dang ko I Sie mangangawasa su manga ratu ngu dunia. I Yesus kumindaghi si kite, dang dingang u papate-Nge I Sie nul᷊iu ngi kite bou manga dosa ngi kite,

⁶ dang mukoa si kite simbau umati ko nipile makoa manga imam, ko mutangkiang Mawu Ruata, Yamang-E. I Yesus Kristus e'e ko kal᷊abokange dingang mangawasa sarang kal᷊iwuenge. Aming!

⁷ Putuhung, I sie nusumongo nipikung u winawa! Kaul᷊i u taumata sarung makawua si Sie, su l᷊al᷊unge l᷊ai i sire ko nanika si Sie. Kaul᷊i u bangsa su dunia sarung sumangi watu I sie. Ore, nal᷊ahe! Aming!

⁸ Ia i'i ko kahimotongange dingang ko panginsuenge angkung u Mawu Ruata, ko ene, ko seng tuwei ene, dang ko tatapi ene turusi, Ko Makawasa.

Kawawua hal᷊i I Kristus

⁹ Ia i Yohanes ana u simbau ko musul᷊ung i kumu su l᷊al᷊ung u singsara ko nikapundangeng u apang tumatuhu I Kristus. I kite masabari mutatahang u singsara kere umati koa-E. Ia nirume su toade u Patmos, watu'u ia nangeke habari u Mawu Ruata, ko nipakatoghasi Yesus dingang u kasaksiang-E.

¹⁰ Su l᷊ou ngu Mawu, ia nikawasa ngu Roh u Mawu Ruata, bou e'e ia nakaringihi tingihi ko mauha – kere tingihi u tarompeti – nudidato su l᷊ikuriku.

¹¹ Tingihi e'e nangul᷊i, “Woheko apang ko ikawua ngu, dang rohoko buki e'e sarang pitu jamaati ko i'i: su Efesus, Smirna, Pergamus, Tiatira, Sardis, Filadelfia, dang Laodikia.”

¹² Ia nuwihu sarang l᷊ikuri nutuhung ko i sai kapudidato nge si sia. Bou e'e ia nakawua rihi ngu sol᷊o pitu ko niriadi bou wul᷊aeng.

¹³ Su tal᷊oara u manga rihi ngu sol᷊o e'e kararisi singkatau ko ikawua kere taumata. I sie nupake juba ko manandu sarang l᷊aeri. Su roko-Nge I Sie nupake u tatakae wul᷊aeng.

¹⁴ Uta-E mawira kere ruku u domba, kere kawirang u kapesi. Mata-Nge kahenange musul᷊ung u putung;

¹⁵ L᷊aer-E mul᷊uha kere witu ko nitongka. Tingih-E kere ruhung u tatumpang u ake ko l᷊abo.

¹⁶ L᷊ima-Nge kuaneng kapuhinggoe wituing pitu, dang bou mohong-E nusumuwang simbau pera ko mahoro ko horonge darua. Pahesi-E nusuminang kere matangutiti kal᷊ihae.

¹⁷ Su tempo ia nakawua si Sie, ia nansu su saruang-E musul᷊ung kere taumata ko nate. Arawe I Sie nanimbo ngu l᷊ima-Nge kuaneng si sia dang nangul᷊i, “Kumbahang mataku! Ia i'i ko kahimotongange dang ko panginsuenge.

¹⁸ Ia i'i I Sie ko wiahi! Ia seng mbuae nate, kateho tuhungete, Ia nuwiahi sarang kal᷊iwuenge. Ia pia kawasa su l᷊al᷊ung u papate, dang su dunia ngu taumata ko nate.

¹⁹ Watu'u e'e, wohete manga hal᷊i ko nikawua ngu, e'e manga hal᷊i ko ene orasi i'i, dang manga hal᷊i ko sarung mariadi.

²⁰ I'i rahasia ngu bou pitu wituing ko ikawua su l᷊ima kuaneng-Ku, dang bou pitu rihi ngu sol᷊o wul᷊aeng e'e: Pitu wituing e'e ko malaikati u ko pitu jamaati, dang pitu rihi ngu sol᷊o e'e ko pitu jamaati e'e.”