NEHEMIA 1 - BUKI SUSI Wahasa ngu Taghul᷊andang l᷊ou-l᷊ou

¹ Ko i'i laporang i Nehemia ana i Hakhalya bou manga hal᷊i ko nikoae. Su l᷊al᷊ung u wul᷊ang Kislew su taung kaduampul᷊onge su pamarentahang i Artahsasta kere ratu su Persia, ia, i Nehemia, ene su Susan, pusati u kararatuang.

I Nehemia masusa nusipiri u Yerusalem

² Su tempo e'e ana u simbauku i Hanani, nusumongo bou Yehuda singkahindo dingang u pirangkatau ringange. Bou e'e i sire daku nipakinateng hal᷊i u kakakoa su Yerusalem l᷊au manga tau Yahudi ko seng nusul᷊e bou pundandumekang su Babel.

³ I sire nuwuke himoneu manga taumata l᷊inau mbuae nirume ko seng nusul᷊e su wanua e'e, orasi i'i kapuwiahi su l᷊al᷊ung u singsara dang nihinakaneng u manga bangsa raghi ko ene su sindihange. Nangilembo l᷊ai manga meseli soa ngu Yerusalem mborong naghaghoro dang manga tukari u soa mborong tangkeng sau nikoa mangki bou nitutung su tempo nal᷊iu.

⁴ Nakaringihi habari e'e, ia nukumangiang dang numpal᷊ehe. Pira-pira l᷊ou l᷊iwuenge ia nasusa naung. Ia turusi nupuasa apiru nukal᷊iomaneng su Mawu Ruata.

⁵ “O Mawu Ruata mangangawasa su sorga. I Kau Mawu Ruata ko L᷊abo dang i kami mupasaruang I Kau dingang napene u katataku. I Kau tatapi masatia dang muhinggo pudadiandi-U su taumata ko makindaghi si Kau dang matuhu su parenta-Ngu.

⁶ Putuhungko si sia o Mawu, dang raringihiko kakal᷊iomaneng ko daku ihengke sarang saruang-U l᷊ou huwi guna ngu umati Israel, manga l᷊ang-U e'e. Ia mangaku himoneu i kami, umati Israel, seng nubardosa; ia l᷊au manga i upungku seng nubardosa l᷊ai.

⁷ I kami seng nudurhaka si Kau dang nul᷊umawang manga parenta-Ngu. I kami ta nutuhu manga tita ko seng nionggo-U si kami bo i Musa l᷊ang-U e'e.

⁸ 0 Mawu, putinaungko manga hengetang-U ko seng nihabari Musa su parenta-Ngu, himoneu boko i kami, umati Israel ta masatia si Kau, i kami sarung ipukaesi-U su tal᷊oara u manga bangsa ko wal᷊inge.

⁹ Kateho boko i kami sau musul᷊e sarang koa-U dang mutuhu apang parenta-Ngu, kuteu i kami ko seng nipukaesi-U e'e sarung sau ikomol᷊i-U maneng i kami ene su manga pondol᷊i dunia. Bou e'e i kami sarung ipusul᷊e-U sarang tampa ko seng nipile-U tadeau makoa tampa punggaweting si Kau.

¹⁰ Mawu, i kami i'i manga l᷊ang-U, umati-U sisane ko seng nipakasal᷊amati-U dingang kawasa l᷊au katatoghasi-U ko hebati.

¹¹ Raringihiko kakal᷊iomanengku dang kakal᷊iomaneng kaul᷊i l᷊ang-U ko wal᷊inge, ko mo mangadati si Kau. Onggol᷊eko tul᷊umang-U tadeau su sil᷊ou i'i l᷊ang-U i'i makarea kakindaghi u ratu.” Su tempo e'e ia ko mutatangkiang inung u ratu.