NAHUM 1 - BUKI SUSI Wahasa ngu Taghul᷊andang l᷊ou-l᷊ou

¹ Ko i'i tatanata ngu Mawu Ruata hal᷊i u Niniwe. Tatanata i'i nil᷊ahe dingang u kawawua ko nionggo si Nahum, singkatau nabi ko asal᷊ie bou Elkos.

Wawal᷊uang u Mawu su Niniwe

² Mawu Ruata mandi pia ko mangal᷊ung, taumata ko mundoka si Sie, nal᷊ahe makarea hukumang. Dingang u wawal᷊uang kahingang, I Sie mamal᷊isi saki u naung si sire.

³ Tingari Mawu, ta maehong muwawal᷊uang; kateho I Sie l᷊ai makawasa kahingang hakiu i sai-sai ko mukoa pusansal᷊a sarung ta ipakal᷊iwiri bou hukumang. Su apa Mawu mul᷊umal᷊eng, su se'e tumimbul᷊i suwu-suwu; su tampa u l᷊aeri-E mutumoto, su se'e awu makoa winawa.

⁴ I Sie mudada l᷊auri dang mupakamara, apang sal᷊uhi ipakal᷊isa. Wul᷊uri u Karmel l᷊au manga ngudae su Basan makoa mahango dang apang bungang su Libanon mal᷊obe.

⁵ Manga wul᷊uri mukumende su saruang-E; dang bongkonge matuno kaul᷊ie. BokoMawu mutingkaandaghi, dunia maghio, dunia l᷊au kaul᷊i u taumatange mukumende.

⁶ I sai makataeri boko Mawu muwawal᷊uang? Takoae ko botonge mal᷊iwiri bou wawal᷊uang-E? I Sie mangukahi u wawal᷊uang-E ko kahenange watu maghaghoro dang makoa awu su saruang-E.

⁷ Mawu e'e ko mapia, I Sie manirung umati-E su tempo ngi sire masusa, I Sie mundiaga taumata ko musirung si Sie.

⁸ Kere l᷊uwa ko l᷊abo naansehi, nipakaghaghoro-E manga roka-E. I sire ko wahani mundoka si Sie nipahangeng-E dingang u papate hakiu nawinasa.

⁹ Kirou manga apa ko ikoau mundoka Mawu, nal᷊ahe sarung ta mariadi. I Sie sarung ta mamal᷊isi saki u naung-E sarang pakarua su manga roka-E.

¹⁰ I kau sarung itutung kere rahami ko nahango kere ghal᷊umue ko pia sasusue ko nukal᷊untawiri.

¹¹ Bo i kau, ei Niniwe, seng nasupu singkatau ko napene u kirou ko dal᷊ai. I sie nukoa kirou guna ngu mundoka Mawu.

¹² Kuteu hengetang u Mawu su Israel, umati-E, “Manengwe manga taumata ngu Asyur e'e matoghasi dang maul᷊i rekenange, kateho i sire sarung ipakaghaghoro bou e'e mailang. Ei bangsa-Ku, Ia seng nukoa si kumu nutatahang u singsara, kateho Ia seng ta sau mukoa e'e.

¹³ Orasi i'i kawasa ngu Asyur si kumu sarung Daku ipakasue, dang Daku ibusu hante ko nangiki si kumu.”

¹⁴ Ko i'i putusang u Mawu hal᷊i u bangsa Asyur, “I sire sarung ta makahombang hintou guna ngu panurusi bangsange. Manga patong barhala ko ene su manga kuil u dewange, sarung Daku ipakaghaghoro. Kubul᷊i guna ngu bangsa Asyur seng kahi Daku sadiang, watu'u i sire ta hinonge muwiahi!”

¹⁵ Tuhungeko, singkatau raroi nusumongo bou manga wul᷊uri, numbawa habari mapia, habari kal᷊auntung. Ei bangsa Yehuda, wantughiko l᷊ou ko l᷊abo i kumu dang waehiko diandi ngi kumu su Mawu Ruata. Wanua ngi kumu sarung ta ikawasa ngu taumata ko l᷊al᷊ai. I sire seng nipakaghaghoro.