MUNANASI 1 - BUKI SUSI Wahasa ngu Taghul᷊andang l᷊ou-l᷊ou

¹ Manga didato su l᷊al᷊ung u buki i'i ko bo i Mananipiri, ahusi Daud ko ese, ko nundol᷊osi si Daud nakoa ratu su Yerusalem.

² I Mananipiri nangul᷊i: Kaul᷊ie takoae kitihie dang takoae gunange! Wiahi e'e ko parcuma, kaul᷊ie takoae mangal᷊enge.

³ Su kanandu u wiahi i kite muhal᷊i, mupasuwang u l᷊iagha. Kateho, su apawe kitihie ko botonge makal᷊iaghi si kite?

⁴ Hintou simbau l᷊umitou dang hintou ko wal᷊inge mailang, arawe dunia mangkate tatapi kere'e.

⁵ Matangutiti mborong kasuwange dang mborong l᷊ai kasirae. Dingang nasagheri i sie musul᷊e sarang tampae ko horo, bou e'e sau musumuwang.

⁶ Anging tumiu sarang simbuka ngu timuhi, bou e'e tumiu sarang simbuka ngu sawunahi; i sie mutumbihing, bou e'e sau musul᷊e.

⁷ Kaul᷊i u sal᷊uhi maansehi sarang l᷊auri, kateho l᷊auri ta mapapene. Ake'e musul᷊e sarang punge, bou e'e manita maansehi sau.

⁸ Kaul᷊ie makasahe dang kasasahe e'e ta ikahabari. Mata ngi kite ta masasahe mutuhung; tul᷊i ngi kite ta mawawau mundaringihi.

⁹ Apa ko seng mbuae nariadi, sarung sau mariadi. Apa ko seng mbuae nikoa, sarung sau ikoa. Takoae manga barang ko wuhu su dunia i'i.

¹⁰ Pia taumata ko mangul᷊i, “Putuhungko, i'i ko wuhu!” Kateho, e'e ko seng pia suhoro u i kite nipahinding.

¹¹ Taumata ta sarung makatinaung hal᷊i su tempo horo. Kere'e l᷊ai hal᷊i su orasi i'i dang su saruang, ta sarung itinaungang u taumata su l᷊ou simai.

Apang ko seng nikapundangeng I Mananipiri

¹² Ia, I Manananipiri, namarenta su Yerusalem kere ratu su Israel.

¹³ Ia dingang kal᷊abo u naung mutal᷊induru dang mangundung dingang u kapapilesa apang ko nariadi su dunia i'i. Sisipi ko nisadia ngu Mawu Ruata si kite tumaniu makasusa naung.

¹⁴ Ia seng nakawua apang kakanoa u taumata su dunia i'i. Pangimangte, kaul᷊i u e'e ko takoae kitihie, kere manahusu anging.

¹⁵ Ko bengko ta ikatul᷊iri, dang ko takoae ta ikarekeng.

¹⁶ Su sipirangku, “Ia i'i seng nakoa taumata ko mahariga dang ko mapilesa, marau lebe mapilesa bou kaul᷊i u taumata ko namarenta su Yerusalem suhoro u ia. Ia nangomol᷊i maul᷊i titong l᷊au ndung.”

¹⁷ Kuteu ia dingang u naung ko l᷊abo mundea tadeau matitong putatintangeng u titong l᷊au kababodoki, kapapilesa l᷊au kal᷊al᷊ongong. Kateho nal᷊ahe ia i'i kitang kere manahusu anging.

¹⁸ Watu'u kal᷊aul᷊ie kapapilesa ngi kite, kal᷊aul᷊ie l᷊ai kaghaghagha ngi kite. Kal᷊aul᷊ie titong i kite, kal᷊aul᷊ie l᷊ai kasasusa ngi kite.