MARKUS 5 - BUKI SUSI Wahasa ngu Taghul᷊andang l᷊ou-l᷊ou

I Yesus nupakaul᷊e ngu taumata ko nikasukang u roh ko dal᷊ai

¹ Bou e'e I Yesus l᷊au manga tumatuhu-E nurating u simbuka ngu rano Galilea, su wanua ngu tau Gerasa.

² Kere'e suapang I Yesus nal᷊intu bou sakaeng, I Sie nisongong u ko ese singkatau ko nusumuwang bou manga l᷊ohang u kubul᷊i.

³ Tau e'e niwanting u roh ko dal᷊ai dang natana su manga kubul᷊i. I sie seng ta ikaiki maneng l᷊ai hanteng.

⁴ Seng masau kahingang l᷊aeri l᷊au l᷊imange hapusang, kateho hante e'e sintinia ibusue, dang uase su l᷊aeri ibabarenge. I sie kere'e katoghasi, hakiu takoae sarang singkatau ko makatahang si sie.

⁵ L᷊ou huwi i sie kal᷊uhunge apang kubul᷊i dang su manga wul᷊uri, dang ghumaesi turusi l᷊au u mupakal᷊esi badange dingang u watu.

⁶ Su tempo bou raunge i sie nakawua si Yesus kasongonge, i sie nutumal᷊ang mbuhue nusuba su saruang I Yesus.

⁷ Dingang u tingihi mauha i sie nughumaesi, “Yesus, Ahusi Mawu Ruata Ko Karangetange! I Kau mukoa apa si sia? Su areng u Mawu Ruata, ia mukal᷊iomaneng ariwe singsarai ia.”

⁸ (Tau e'e nangul᷊i kere'e watu'u I Yesus nangul᷊i si sie, “Roh ko dal᷊ai, suwangte bou taumata i'i!”)

⁹ Bou e'e I Yesus nukina si sie, “I sai arengu?” Tau e'e nusumimbahi, “Arengku i ‘Legion’ – watu'u i kami i'i maul᷊i kahingang.”

¹⁰ Mangkate masau i sie mundo singapang botonge I Yesus kumbahang mupasuwang manga roh ko dal᷊ai bou tampa e'e.

¹¹ Masandighi u tampa e'e pia wawi maul᷊i kapundeae kang, su l᷊engehi.

¹² Manga roh ko dal᷊ai e'e nundo si Yesus, “Roiko i kami pangal᷊ing su manga wawi tarai e'e.”

¹³ Ndo i sire nituhukang I Yesus. Inau apang roh ko dal᷊ai e'e nusumuwang bou tau e'e mbuhue nanumbou su manga wawi e'e. Kaul᷊i u ghapang u wawi e'e nahuntal᷊ang nutumumpa bou wiwihi u towae sarang l᷊al᷊ung u rano bou e'e nawontol᷊i – kaul᷊i u wawi e'e patehang manga duahiwu

¹⁴ Manga mundadiaga wawi e'e kaul᷊ie nutumal᷊ang, dang nuwawuke ngu habari e'e su kanandu u soa l᷊au kampong masandighi. Bou e'e manga taumata nusumuwang nutuhung apa ko seng nariadi.

¹⁵ I sire nusumongo sarang koa I Yesus, bou e'e nakawua tau ko l᷊inau bou nisukang u roh ko dal᷊ai e'e, kakangiang su se'e. I sie seng pia l᷊akue, dang naunge seng natilang. Kateho i sire kaul᷊ie nataku.

¹⁶ Kaul᷊ie apang ko nakawua hal᷊i ko seng nariadi su taumata e'e dang su manga wawi, nuwawuke ngu hal᷊i e'e.

¹⁷ Bou e'e tataho tampa e'e nundo tadeau I Yesus panintang u tampa e'e.

¹⁸ Su tempo ngi Yesus naawi su sakaeng, tau ko l᷊inau niwanting u roh ko dal᷊ai e'e nundo si Yesus, tadeau i sie mutumuhu dingang.

¹⁹ Kateho I Yesus ta nupakawala, angkung-E, “Kapul᷊e'e dang puhabari su manga ana u simbau'u apang ko nikoa u Mawu si kau dang wal᷊inge gampang piange si kau.”

²⁰ Tau e'e tamai nul᷊umal᷊eng, dang nanita nuwuke su kanandu Soa Mapul᷊o apang ko seng nikoa I Yesus si sie. Manga taumata kaul᷊ie naherang nakaringihi.

Ana i Yairus – Tau kowawine ko nanuhung juba ngi Yesus

²¹ I Yesus sau nusul᷊e sarang simbuka ngu rano. Su wiwihi u rano e'e napene u taumata nusumongo nul᷊ahumbung su sindihang I Yesus.

²² Pia taumata singkatau arenge i Yairus nusumongo. I sie singkatau pangaha su wal᷊e pukakal᷊iomanengang su soa e'e. Suapang i sie nakawua si Yesus, i sie dingang nusuba su saruang-E,

²³ dang nundo singapang botonge, “Tuang, anaku kowawine masaki maturu. Kere wotonge songoko maning kitang panuhung si sie, tadeau i sie maul᷊e dang kumbahang sarang i sie mate!”

²⁴ Bou e'e I Yesus natamai dingang i Yairus. Maul᷊i taumata tamai nutumuhu dang nanise si Sie, bou apang tampa.

²⁵ Su tal᷊oara i sire pia l᷊ai singkatau kowawine ko seng mapul᷊odua su taunge nil᷊al᷊engang u kotori.

²⁶ Rarotonge seng nasue nipake, nipamaehi manga dokter, kateho mang takoae ko nakaul᷊e, katewe sakie nanamba.

²⁷ Tau kowawine e'e seng nakaringihi maul᷊i wuke ngi Yesus, inau su komol᷊ang u taumata maul᷊i e'e i sie nusumandighi si Yesus bou l᷊ikuri,

²⁸ Watu'u su naunge, “Asal᷊i seng nakasuhung juba-Nge, ia seng maul᷊e!”

²⁹ I sie nanuhung juba ngi Yesus, dang su tempo e'e l᷊ai kotori napoto. I sie nakapundang sakie naul᷊e.

³⁰ Su tempo e'e l᷊ai I Yesus nakapundang musul᷊ung u pia uha nasawu bou badang-E. Inau I Sie nuwihu su taumata maul᷊i e'e dang nukina, “I sai nanuhung juba-Ku?”

³¹ Manga tumatuhu-E nangul᷊i, “I Tuang sisane seng nakawua kere'e kaul᷊ie taumata nusasise. I Tuang mang mborong l᷊ai makina, ko i sai nanuhung si Tuang?”

³² Kateho I Yesus mang katuhunge tamai namai mundea taumata ko nakasuhung si Sie.

³³ Tau kowawine e'e matitong apa ko nariadi si sie, kakendenge nataku nusuba nangaku patiku hal᷊i e'e su saruang I Yesus.

³⁴ Bou e'e I Yesus nangul᷊i su tau kowawine e'e, “I kau ana-Ku watu'u i kau mangimang si Sia, i kau maul᷊e! Tamaite dingang u sal᷊amati, i kau tinga-tingari seng naul᷊e.”

³⁵ Su tempo I Yesus mborong kapudidatonge, pia pirangkatau raroi bou wal᷊e ngi Yairus nasongo, i sire nangul᷊i si Yairus. “Ana i tuang mahua seng nate,” kuhaete i tuang mborong l᷊ai mupakasusa ngi Tuang i kite.

³⁶ I Yesus ta nundia apang ko niul᷊i u manga taumata e'e, I Sie nangul᷊i si Yairus, “Ari kataku, pangimangte!”

³⁷ I Yesus turusi nul᷊umal᷊eng, kateho I Sie ta nupakawala ngu singkatau tumuhu dingang-E, su l᷊ikuri Petrus dingang i Yakobus l᷊au i Yohanes sire rua tamahuari.

³⁸ Suapang i sire nurating u wal᷊e ngi Yairus, I Yesus nakawua su se'e tumaniu magara, l᷊au nakaringihi tingihi u sangi dang l᷊al᷊ungkang mauha.

³⁹ I Yesus turusi nangul᷊i si sire, “Ko apa nakagara dang nakasangi si kumu? Rario e'e ko ta nate, i sie kitang katikie!”

⁴⁰ I sire kaul᷊ie nul᷊umighei ngi Yesus, inau I Sie nuparenta si sire pasuwang kaul᷊ie. Bou e'e I Sie namadingang ghaghurang u ana e'e l᷊au tumatuhu-E tatilu nusumu sarang l᷊al᷊ung u kamari u ana e'e.

⁴¹ I Yesus nuhinggo l᷊ima ngu ana e'e mbuhue nangul᷊i si sie, “Talita kum,” mangal᷊enge, “Ndio, Ia mangul᷊i si kau wangungte!”

⁴² Ana mahua e'e dingang nuwangung dang nul᷊umal᷊eng. (Umurie seng mapul᷊odua su taunge). Kaul᷊ie ko nakawua hal᷊i e'e naherang!

⁴³ Arawe I Yesus nularang kumbahang i sire mul᷊ahabari u hal᷊i e'e si sai-sai. Bou e'e I Yesus nangul᷊i, “Pakang ko ana e'e.”