MARKUS 3 - BUKI SUSI Wahasa ngu Taghul᷊andang l᷊ou-l᷊ou

Taumata l᷊ima nge ko pepa simbuka

¹ I Yesus sau nusul᷊e sarang wal᷊e pukakal᷊iomanengang. Su se'e pia singkatau ko l᷊imange ko pepa simbuka.

² Su se'e pia manga taumata ko mo mundea sal᷊a ngi Yesus, tadeau botonge mangalaki I Sie. Inau i sire mangkate kaputuhunge si Sie, minsang I Sie mupakaul᷊e ngu taumata su l᷊ou Sabati.

³ I Yesus nangul᷊i su taumata l᷊imange ko pepa simbuka e'e, “Maite rarisi su si'i, su saruang”

⁴ Bou e'e I Sie nukina su manga taumata ko ene su se'e, “Tumuhu agama, ko apawe hinonge koateng i kite su l᷊ou ngu Sabati? Mukoa ko mapia arako mukoa ko dal᷊ai? Mangambang taumata arako mamate?” I sire mangkate kitang narumasi.

⁵ I Yesus nuwawal᷊uang katuhunge tamai namai su sindihang-E, arawe I Sie mang l᷊ai nasusa naunge, ual᷊ing i sire tumaniu makitihi. Bou e'e I Sie nangul᷊i su tau e'e, “Ul᷊uhi ko l᷊imau.” Tau e'e nangul᷊uhi l᷊imange, dang l᷊imange e'e turusi naul᷊e.

⁶ Kuteu manga tau Farisi e'e nanintang u wal᷊e pukakal᷊iomanengang e'e, bou e'e turusi nughaghighili dingang u pirangkatau taumata ngi Herodes, tadeau mamate si Yesus.

Taumata maul᷊i su wiwihi u rano

⁷ I Yesus tamai nusumoho dingang u manga tumatuhu-E, sarang Rano ngu Galilea. Kuteu napene taumata bou Galilea natamai nutumuhu si Yesus. Maul᷊i l᷊ai ko nusumongo bou Yudea,

⁸ bou Yerusalem, bou wanua ngu Idumea, l᷊au bou wanua simbuka ngu raki u Yordan, l᷊au bou kaul᷊i u soa su Tirus l᷊au Sidon. I sire kaul᷊ie nusumongo sarang koa I Yesus, watu'u i sire nakaringihi hal᷊i ko seng nikoa-E.

⁹ Taumata kere'e kaul᷊ie, hakiu I Yesus nuparenta manga tumatuhu-E panadia sakaeng guna ngi Sie, kumbahang sarang I Sie masise kere u manga taumata e'e.

¹⁰ I Sie nupakaul᷊e ngu taumata kere'e kaul᷊ie, hakiu manga taumata masaki nusasise manandighi tadeau muhinggo si Sie.

¹¹ L᷊au manga taumata ko nikasukang u roh ko dal᷊ai, sintinia makawua si Sie, mangkate dingang nusuba su saruang-E l᷊au nukumiha, “I Kau ko Ahusi u Mawu Ruata!”

¹² Arawe I Yesus nularang singapang botonge su kaul᷊i u roh ko dal᷊ai e'e mupakatitong i sai I Sie.

I Yesus namile tumatuhu-E mapul᷊odua

¹³ Bou e'e I Yesus nusumaka sarang wul᷊uri simbau, l᷊au nukumui manga taumata ko ikao-E. Manga taumata e'e kaul᷊ie nusumongo.

¹⁴ Bou e'e I Sie namile bou tal᷊oara i sire mapul᷊odua su kataunge. I Sie nangul᷊i, “Ia namile si kumu, tadeau i kumu puhundingang u Ia, tadeau i kumu Daku iroi pamohang Habari Mapia bou Mawu Ruata,

¹⁵ dang i kumu sarung makarea kawasa manguseri manga roh ko dal᷊ai.”

¹⁶ I'i areng i sire mapul᷊odua e'e: I Simon (ko nisigho-E l᷊ai i Petrus),

¹⁷ i Yakobus l᷊au ana u simbaue i Yohanes, manga ana i Zebedeus (i sire i'i nisigho-E Boanerges mangal᷊enge “Ana u l᷊ul᷊u”),

¹⁸ i Andreas, i Filipus, i Bartolomeus, i Matius, i Tomas, i Yakobus ana i Alfeus, i Tadeus, i Simon si Patriot,

¹⁹ l᷊au i Yudas Iskariot ko nusingking I Yesus.

I Yesus l᷊au i Beelzebul

²⁰ Bou e'e I Yesus napul᷊e sarang wal᷊e, kuteu taumata maul᷊i sau nusumongo nukomol᷊i, hakiu I Yesus l᷊au manga tumatuhu-E ta nakakang.

²¹ Manga taumata nangul᷊i, “I Sie seng ko dong!” Dang suapang ghe-E nakaringihi hal᷊i e'e, i sire tamai tadeau mangal᷊a si Sie.

²² Manga meteri agama ko nusumongo bou Yerusalem nangul᷊i, “I Sie nikasuka ngu Beelzebul! Tumbonang u roh ko dal᷊ai nangonggo kawasa si Sie guna ngu manguseri roh ko dal᷊ai.”

²³ Kuteu I Yesus nukumui taumata maul᷊i e'e l᷊au nuwuke ngu pira mbau papinintu si sire. “Ta makoa roh ko dal᷊ai manguseri roh ko dal᷊ai,” angkung I Yesus.

²⁴ “Boko simbau negara mapahia pirang kamonang ko kapurarokae, negara e'e tawe matahang mal᷊iwue.

²⁵ Dang boko su l᷊al᷊ung u wal᷊e simbau takoae purarame l᷊au pusinggetang mangkate kapurarendehi pusinggetang e'e sarung mutal᷊ei.

²⁶ Boko su kararatuang u setang pia putatal᷊ei l᷊au purararendehi, kararatuang e'e ta maumuri dang seng nal᷊ahe mang sarung mailang.

²⁷ Takoae ko sarang singkatau makasu su l᷊al᷊ung u wal᷊e ngu singkatau ko matoghasi dang mamal᷊aho rarotonge boko i sie ta ihapusi horo taumata ko matoghasi e'e. Bou e'e mbuhuewe i sie botonge makapamal᷊aho rarotonge.

²⁸ Katitongte! Boko taumata mukoa dosa l᷊au mudidato ngu l᷊ahinakang, i sie botonge ampungang.

²⁹ Arawe boko i sie muhinakang Roh u Mawu Ruata, i sie seng ta makahombang ampunge. Ual᷊ingu l᷊ahinakang e'e ko dosa takoae panginsuenge.” (

³⁰ I Yesus nudidato kere'e, watu'u pia taumata ko nudidato I Yesus nikasukang u roh ko dal᷊ai.)

I Mama ngi Yesus l᷊au manga ana u singkatau-E

³¹ Bou e'e i mama ngi Yesus l᷊au manga ana u singkatau-E nusumongo. I sire nangampal᷊i su l᷊ikuri l᷊au nundoi taumata pukui si Yesus.

³² Tempo e'e maul᷊i taumata kakangiang su sindihang I Yesus. I sire nangul᷊i si Sie, “Tuang i mama ngi Tuang l᷊au manga ana u singkatau I Tuang ene su l᷊ikuri. I sire ko mundea si Tuang.”

³³ I Yesus nusumimbahi, “Ko i sai i mama-Ku? I sai manga ana u singkatau-Ku?”

³⁴ Bou e'e I Sie nutuhung su manga taumata ko kakangiang su sindihange dingang nangul᷊i, “Ko i'i i mama l᷊au manga ana u singkatau-Ku!

³⁵ Taumata ko mukoa kao u Mawu Ruata, ko i sie e'e ana u singkatau-Ku koese, anau singkatau-Ku kowawine, l᷊au i mama-Ku.”