MARKUS 1 - BUKI SUSI Wahasa ngu Taghul᷊andang l᷊ou-l᷊ou

Nasi i Yohanes Mananahani

¹ Ko i'i habari Mapia bou hal᷊i I Yesus Kristus, Ahusi Mawu Ruata.

² Habari Mapia i'i nanita bou kere ko niwohe i Nabi Yesaya; kiri'i: “ ‘I'i raroi-Ku’, angkung u Mawu Ruata, ‘Ia nundoi si sie puhoro si Kau, tadeau i sie pamuka l᷊al᷊eng guna-Ngu.’

³ Pia taumata kapunggonge su tana ko l᷊inggi, ‘Sadiaiko l᷊al᷊eng guna ngu Mawu, pakateneko apang l᷊al᷊eng ko sarung il᷊al᷊engang-E.’ ”

⁴ Musul᷊ung kere ko mawawohe e'e, kere'e l᷊ai i Yohanes nasongo su tana ko l᷊inggi. I sie nanahani taumata l᷊au nangul᷊i u habari bou Mawu Ruata. “I kumu mambeng putobati bou kaul᷊i u dosa ngi kumu dang mambeng isahani, tadeau Mawu Ruata mangonggo u ampunge si kumu,” kere'e angkung i Yohanes.

⁵ Kaul᷊i u taumata bou Yudea l᷊au bou soa ngu Yerusalem natamai mundaringihi si Yohanes. I sire nangaku ngu kaul᷊i u patiku dosa ngi sire, dang i Yohanes nanahani si sire su sal᷊uhi Yordan.

⁶ I Yohanes nul᷊oho l᷊aku bou ruku u onta. L᷊aiki u kal᷊uwaenge bou kul᷊i, kange wua ngu kumbati l᷊au ghul᷊a ngu katiupang.

⁷ I sie nangul᷊i u habari i'i, “Samuri ngu ia, sarung sumongo taumata ko mborong lebe l᷊abo bou ia. Sarang kumakurung mamuka tal᷊i ngu sapatu-E, ia ta hinonge.

⁸ Ia manahani si kumu dingang u ake, arawe I Sie sarung manahani si kumu dingang u Roh u Mawu Ruata.”

I Yohanes Nanahani si Yesus

⁹ Su tempo e'e I Yesus nasongo bou Nazaret su Galilea, bou e'e I Sie nisahani ngi Yohanes su sal᷊uhi Yordan.

¹⁰ Suapang I Yesus naawi bou sal᷊uhi e'e, I Sie nakawua l᷊angi nawuka dang pia Roh u Mawu Ruata nul᷊umintu kere paluma nurumoro si Sie.

¹¹ Bou e'e nikaringihi tingihi u Mawu Ruata nangul᷊i, “I Kau Ana-Ku ko Daku ikukindaghi. I Kau makal᷊uasi naung-Ku.”

I Yesus nisal᷊ukateng u setang

¹² Bou e'e Roh u Mawu Ruata turusi numbawa si Yesus nakoa sarang tana ko l᷊inggi.

¹³ Paupul᷊o su l᷊ounge I Sie pai se'e, nisal᷊ukateng u setang. Manga binatang ko maghila ene l᷊ai dingang-E pai se'e, dang manga malaikati nutal᷊ung si Sie.

I Yesus nukumui si sire pa mukakisaghe

¹⁴ Suapang i Yohanes nihukung, I Yesus natamai sarang Galilea dang nangul᷊i u Habari Mapia bou Mawu Ruata.

¹⁵ Angkung-E, “Mawu Ruata seng maehong manita mamarenta. Putobati i kumu bou kaul᷊i u dosa ngu, dang pangimangte su Habari Mapia bou Mawu Ruata!”

¹⁶ Su tempo I Yesus kal᷊al᷊enge su apeng u Rano Galilea, I Sie nakawua mukakisaghe dua ngkatau, e'e ko i Simon dang tuaringe i Andreas. I sire kapanomae su rano e'e.

¹⁷ I Yesus nangul᷊i si sire rua, “Maite tuhu si Sia. Ia sarung manintiro si rua manoma taumata.”

¹⁸ I sire rua dingang nanintang u soma, bou e'e nutumuhu si Yesus.

¹⁹ I Yesus turusi nul᷊umal᷊eng, bou e'e nakawua l᷊ai sire rua tamahuari, i Yakobus sire rua ngi Yohanes, ko manga ana i Zebedeus. I sire rua su l᷊al᷊ung u sakaeng, kapanambinge soma.

²⁰ I Yesus dingang nukumui si sire rua. I sire rua nanintang iyamang i sire rua su sakaeng dingang u manga taumata ngi sire. Bou e'e i sire rua natamai nutumuhu si Yesus.

Taumata ko nikasukang u roh ko dal᷊ai

²¹ I Yesus dingang u manga tumatuhu-E nahumpa su soa ngu Kapernaum. Su l᷊ou ngu Sabati tuhue, I Yesus nusumu su wal᷊e pukakal᷊iomanengang dang nanita nanintiro.

²² Manga taumata ko nakaringihi si Sie naherang u kakakoa I Sie manintiro, ual᷊ing I Sie nanintiro dingang u kawasa, wal᷊ingewe kere manga meteri agama.

²³ Su tempo e'e pia taumata singkatau ko nikasukang u roh ko dal᷊ai nusumu sarang l᷊al᷊ung u wal᷊e pukakal᷊iomanengang, dang nukumiha,

²⁴ “Oh Yesus, tau Nazaret, apa ikoa-U si kami? I Kau nusumongo tadeau mupakasilaka i kami? Ia matitong i sai i Kau, I Kau ko raroi ko Susi bou Mawu Ruata.”

²⁵ “Karumasi!” I Yesus nuheang roh ko dal᷊ai e'e, “suwangte i kau bou taumata i'i!”

²⁶ Kuteu roh e'e mangkatewe nangingko-ngingko taumata e'e numbatu uhae, bou e'e nusumuwang bou taumata e'e dingang kakihae.

²⁷ Kaul᷊i u taumata naherang, hakiu i sire mangkate nukakina, “Ko hal᷊i apa i'i? Simbau tatintiro ko wuhu! Dingang mahuntimari dang makawasa I Sie nuparenta manga roh ko dal᷊ai nipasuwang, dang roh ko dal᷊ai e'e nundaringihi si Sie!”

²⁸ Inau habari hal᷊i I Yesus, nawombeng kere kasahawue su kaul᷊i u tampa su Galilea.

I Yesus nupakaul᷊e ngu taumata maul᷊i

²⁹ I Yesus dingang u manga tumatuhu-E nanintang u wal᷊e pukakal᷊iomanengang e'e dang natamai nakoa sarang wal᷊e ngi Simon sire rua ngi Andreas. I Yakobus sire rua ngi Yohanes natamai l᷊ai dingang i sire.

³⁰ I empo ngi Simon kowawine kal᷊ahange su l᷊al᷊okang. Inau su tempo ngi Yesus l᷊au manga tumatuhu-E nusumu su wal᷊e e'e, I Yesus nihabareng u hal᷊i e'e.

³¹ Kuteu I Yesus natamai nusumandighi si empo ngi Simon e'e l᷊au nuhinggo l᷊imange, bou e'e nupuwangung si sie. L᷊ahange dingang nailang dang i sie l᷊ai nanita nutal᷊ung si sire.

³² Nawawul᷊aeng, suapang matangutiti nusumira, manga taumata natamai nakoa sarang koa I Yesus numbawa taumata ko masasaki dingang ko nisukang u roh ko dal᷊ai.

³³ Kaul᷊i u taumata su soa e'e nul᷊ahumbung su tingo ngu wal᷊e e'e.

³⁴ Bou e'e I Sie nupakaul᷊e ngu taumata maul᷊i ko kaputatahang haghi ngu saki, l᷊au nanguseri l᷊ai maul᷊i roh ko dal᷊ai. I Sie ta namala ngu manga roh ko dal᷊ai e'e nudidato, watu'u i sire matitong ko i sai I Sie.

I Yesus nunasi su Galilea

³⁵ Ndai mal᷊ou neng kalonge I Yesus nuwangung, bou e'e nul᷊umal᷊eng nanintang u wal᷊e. I Sie nakoa sarang tampa ko dio mal᷊umpi su l᷊ikuru soa, dang nukal᷊iomaneng pai se'e.

³⁶ Arawe i Simon dingang u manga dingange natamai nundea si Sie.

³⁷ Dang suapang i sire nusombang I Sie, i sire nangul᷊i, “Taumata kaul᷊ie kapundeae si Tuang.”

³⁸ Arawe I Yesus nusumimbahi, “Intae i kite turusi tamai l᷊umal᷊eng sarang soa ko wal᷊inge, ko tamai masasandighi i'i. Ia mang mambeng munasi pai se'e l᷊ai, watu'u ko e'e pandung-Ku namai.”

³⁹ Ual᷊ingu e'e I Yesus nakoa sarang apang tampa su kaul᷊i u Galilea, l᷊au nunasi su apang wal᷊e pukakal᷊iomanengang dang nanguseri apang roh ko dal᷊ai.

I Yesus nupakaul᷊e ngu singkatau ko pia saki pisi

⁴⁰ Pia singkatau ko pia saki pisi ko makatataku nusumongo sarang koa I Yesus. Tau e'e nusuba l᷊au nudidato, “Boko i Tuang mo, kere botonge i Tuang mupakaul᷊e ngu ia.”

⁴¹ I Yesus nukumindaghi u tau e'e. Inau I Sie namundang tau e'e dingang nangul᷊i, “Ia mo, kaul᷊ete!”

⁴² Singkatempo e'e l᷊ai sakie nailang dang i sie naul᷊e.

⁴³ Bou e'e I Yesus nundoi si sie pakapul᷊e dingang u tatanata i'i,

⁴⁴ “Awase, kumbahang muwuke manga si sai-sai, dakoe tamai sarang koa u imam, l᷊au pundo si sie pupakal᷊ahe i kau seng naul᷊e. Bou e'e su kal᷊aul᷊eu i kau punggileko sasumbau kere ko niparenta ngi Musa, makoa tatia su manga taumata himoneu i kau seng tinga-tingari naul᷊e.”

⁴⁵ Arawe tau e'e natamai, dang nuwawuke ngu hal᷊i ko seng nariadi e'e su apang tampa sarang I Yesus seng ta makasu mapia su soa e'e. I Sie kitang natatana su l᷊ikuru soa su tampa ko mal᷊umpi. Arawe taumata mangkate mang kasongonge sarang koa-E bou apang tampa.