MAMAMONESI 1 - BUKI SUSI Wahasa ngu Taghul᷊andang l᷊ou-l᷊ou

Suku ngi Yehuda l᷊au suku ngi Simeon naname si Adoni-Bezek

¹ Suapang i Yosua nate, umati Israel nakina su Mawu, “Mawu, suku sude'e bo i kami mambeng kahimotongange matamai mangalo tau Kanaan?”

² Mawu nusumimbahi, “Suku ngi Yehuda. I sire seng Daku nionggol᷊ang u kawasa guna ngu mangaho wanua e'e.”

³ Bou e'e suku ngi Yehuda nangul᷊i su suku ngi Simeon, “Sumbalaiko i kami mundoka tau Kanaan dang mangaho tampa ko seng nitantu u Mawu guna ngi kami. Hindo i kami l᷊ai sarung musumbala si kumu mangaho tampa ko seng nitantu u Mawu guna ngi kumu.” Kuteu suku ngi Simeon

⁴ l᷊au suku ngi Yehuda natamai singkahindo nuparang. Dang Mawu nangonggo kal᷊auntung si sire su tingo ngu tau Kanaan l᷊au tau Feris. Mapul᷊ohiwu su kataunge sordado ngu roka nate su Bezek.

⁵ I sire nakarea si Adoni-Bezek, ratu ngu wanua e'e, dang nundoka si sie.

⁶ I sie nutumal᷊ang, kateho i sire nanahusu dang naname si sie bou e'e namoto i ma u tal᷊imboro ngu l᷊ima l᷊au l᷊aeri.

⁷ I Adoni-Bezek nangul᷊i, “Ndahuwite pitumpul᷊o ratu seng daku nipoto i ma u tal᷊imboro ngu l᷊ima l᷊au l᷊aeri sire, bou e'e daku nipakawala i sire pakang manga l᷊umbei ngu kang ko nanawo bou medaku. Orasi i'i Mawu Ruata nukoa si sia musul᷊ung kere ko daku nikoa si sire.” I Adoni-Bezek bou e'e niwawa sarang Yerusalem, dang pai se'e i sie napul᷊e asal᷊ie.

Suku ngi Yehuda namata Yerusalem l᷊au Hebron

⁸ Tau Yehuda nangalo Yerusalem, bou e'e nangaho dang nanutung soa e'e l᷊au namate kawanuange.

⁹ Saritau e'e i sire natamai sau nangalo tau Kanaan ko natana su manga wul᷊uri, dang su manga l᷊engehi u bongkonge; l᷊ai ko natana su tampa ko mamara su bahageang timuhi,

¹⁰ dang su soa ngu Hebron, e'e ko soa ko ndahuwite nisigho Kiryat-Arba. Su se'e tau Yehuda namata tau Sesai, Ahiman l᷊au Tamai.

I Otniel namata soa ngu Debir

¹¹ Bou Hebron, tau Yehuda natamai nangalo soa ngu Debir, ko su tempo e'e arenge Kiryat-Sefer.

¹² Singkatau bou suku ngi Yehuda e'e, arenge i Kaleb nangul᷊i, “I sai-sai ko makapangaho Kiryat-Sefer, i sie botonge mukawing dingang anaku kowawine i Akhsa.”

¹³ I Otniel, ana u tuari ngi Kaleb arenge ko i Kenas, nakapangaho soa e'e. Kuteu i Kaleb nangonggo si Akhsa, anae, makoa kawing i Otniel.

¹⁴ Su l᷊ou pukakawing i sire, i Otniel nangosa si Akhsa tadeau pundo tana simpalang si papange. Kuteu i Akhsa nul᷊umintu bou keledainge, bou e'e i Kaleb nakina si sie apa ko ikaoe?

¹⁵ I Akhsa nusumimbahi, “Ia mo pira mbau pung u ake, watu'u tana ko nionggo i papa si sia e'e kapapilo su tampa ko mamara.” Kuteu i Kaleb nangonggo si sie pung u ake su bahageang punge l᷊au pung u ake su bahageang tol᷊e'e.

Kal᷊auntung suku ngi Yehuda l᷊au suku ngi Benyamin

¹⁶ Hintou ngi empo ngi Musa ko ese, e'e ko manga tau Keni, nutumuhu tau Yehuda nusumuwang bou Yerikho, soa ngu korma, dang nakoa sarang tampa ko mahusu su bahageang timuhi u Arad su Yehuda. Pai se'e i sire natana su tal᷊oara u bangsa Amalek.

¹⁷ Bou e'e singkahindo dingang u suku ngi Simeon, suku ngi Yehuda e'e natamai nangalo dang namata tau Kanaan ko natana su soa ngu Zefat. I sire nangane soa e'e, bou e'e nupakailang dang nusigho soa e'e Horma.

^18-19 Mawu nutul᷊ung tau Yehuda hakiu i sire botonge nangaho bahageang u wul᷊uri. Kateho, i sire ta nakaaho Gaza, Askelon arako l᷊ai Ekron dingang u manga tampa su sindihange, ual᷊ingu manga bangsa ko natana su kanandu u raruruhange pia manga kereta ngu parang nikoa bou uase; ual᷊ingu e'e tau Yehuda ta nakauseri si sire.

²⁰ Kere ko seng niparenta ngi Musa, Hebron nionggo si Kaleb, watu'u ndahuwite tatilu walagheng hintou ngi Enak seng niuseri Kaleb bou soa e'e.

²¹ Suku ngi Benyamin ta nakauseri tau Yebus pasuwang bou soa ngu Yerusalem. E'e sabapie tau Yebus mborong natana su se'e singkahindo dingang u tau Benyamin.

Manga suku hintou ngi Yusuf namata Betel

^22-23 Suku ngi Efraim l᷊au i Manasye hintou ngi Yusuf, natamai nangalo soa ngu Betel, ko su tempo e'e arenge Lus. Dang Mawu nutul᷊ung si sire. Su tempo ngu manga mundandahiri niroi sarang soa e'e,

²⁴ i sire nusugha dingang u singkatau ko ese ko nasongo bou soa. I sire nangul᷊i si sie, “Boko i kau mo mutul᷊ung si kami tadeau i kami botonge musumu su soa i'i, i kami sarung mukoa pakapia si kau.”

²⁵ Kuteu taumata e'e nanibo si sire l᷊al᷊eng musumu sarang soa e'e. Bou e'e manga tau Efraim l᷊au Manasye nusumu su soa e'e dang namate kaul᷊i u kawanuange, su l᷊ikuru tau e'e dingang u manga ghe'e.

²⁶ I sie bou e'e nangal᷊ing sarang wanua ngu tau Het, bou e'e nupararisi soa simbau su se'e dang nisighonge Lus. Soa e'e mborong tatapi arenge kere'e.

Manga bangsa ko ta niuseri tau Israel

²⁷ Suku ngi Manasye ta nanguseri kawanua ngu soa ngu Bet-Sean, Taanakh, Dor, Yibleam l᷊au Megido dingang u manga kampong su sindihange. Inau tau Kanaan tatapi natana su se'e.

²⁸ Tingari suapang tau Israel natamba natoghasi, i sire nanihasa tau Kanaan puhal᷊i guna ngi sire, kateho i sire l᷊ai ta nanguseri kahingang manga tau Kanaan bou tampa e'e.

²⁹ Su soa ngu Gezer, suku ngi Efraim ta nanguseri tau Kanaan, kawanua ngu soa e'e. Inau tau Kanaan mborong tatapi natana su se'e singkahindo dingang i sire.

³⁰ Kawanua ngu tau Kitron l᷊au Nahalol ta l᷊ai niuseri u suku ngi Zebulon. E'e sabapie bangsa ngu Kanaan mborong tatapi natana singkahindo dingang i sire, Kateho manga tau Kanaan e'e nisihasa puhal᷊i guna ngi sire.

³¹ Kawanua ngu soa ngu Ako, Sidon, Ahlab, Akhzib, Helba, Afek, l᷊au Rehob l᷊ai ta niuseri u suku ngi Asyer.

³² E'e sabapie tau Kanaan, taumata ngu wanua e'e tutunge mborong natana su se'e singkahindo dingang u tau Asyer.

³³ Kawanua ngu soa Bet-Semes l᷊au Bet-Anat l᷊ai ta niuseri u suku ngi Naftali. E'e sabapie tau Kanaan, taumata ngu wanua e'e tutunge mborong natana su se'e singkahindo dingang u tau Naftali. Kateho i sire nisihasa puhal᷊i guna ngu tau Naftali.

^34-35 Bangsa Amori mborong tatapi natana su Ayalon, Saalbim l᷊au su wul᷊uri u Heres, watu'u suku ngi Dan nisisekang i sire sarang manga wul᷊uri, dang ta niwala pal᷊intu sarang tenenge. Kateho bangsa Amori e'e sintinia isira u suku ngi Efraim l᷊au Manasye dang nisihasa puhal᷊i guna ngu suku darua e'e.

³⁶ Su simbuka ngu sawunahi u Sela, pusarang u tampa u tau Amori mul᷊umiu Sasakang u Akrabim.