KOLOSE 1 - BUKI SUSI Wahasa ngu Taghul᷊andang l᷊ou-l᷊ou

^1-2 Manga ana u simbau umati Mawu Ruata, su Kolose ko masatia nasimbau dingang I Kristus! Kere rasuli I Kristus Yesus, – Ko nihengke u Mawu Ruata – ia, i Paulus, singkahindo dingang ana u simbau i kite i Timotius, muharapi mal᷊umbako Mawu Ruata Yamang i kite mangonggo u al᷊amati l᷊au kapapia si kumu.

Kal᷊iomaneng tatarima kase

^3-4 I kami seng nakaringihi himoneu i kumu mangimang si Yesus Kristus dang i kumu kumindaghi kaul᷊i u umati Mawu Ruata. E'e sabapie su tempo i kami nukal᷊iomaneng guna ngi kumu, i kami sintinia mutarimakase su Mawu Ruata, Yamang Mawu ngi kite Yesus Kristus.

⁵ I kumu mangimang dang i kumu kumindaghi, watu'u i kumu muharapi apa ko nisadia ngu Mawu Ruata si kumu su sorga. I kumu seng nakaringihi hal᷊i e'e, su tempo ngu Habari Mapia ko nuhino nihabari si kumu.

⁶ Habari bou Mawu Ruata e'e nawombeng su kaul᷊i u dunia, dang wiahi u taumata turusi nial᷊amateng u habari e'e, musul᷊ung kere puwawiahi kumu seng nial᷊amateng bou tempo i kumu nakaringihi kere al᷊amatiu Mawu Ruata dang tinga-tingari nikapundangeng.

⁷ Hal᷊i e'e nitupasi i Epafras, ringang ko ikukindaghi i kami, si kumu. I sie ko mul᷊ahal᷊i I Kristus ko masatia muhal᷊i guna ngu hal᷊i i kite.

⁸ Bou i sie i kami nakaringihi uare dingang u kawasa bou Roh Mawu Ruata i kumu botonge mukakindaghi.

⁹ E'e sabapie i kami sintinia mukal᷊iomaneng guna ngi kumu su tempo i kami nakaringihi hal᷊i i kumu. I kami mundo su Mawu Ruata tadeau Roh u Mawu Ruata mangonggo si kumu kapapilesa dang pangangina tadeau i kumu matitong mapia apa kao u Mawu Ruata.

¹⁰ Dingang kere'e i kumu botonge muwiahi tumuhu kao u Mawu Ruata, dang sintinia makal᷊uasi naung-E, hakiu su l᷊al᷊ung u patiku hal᷊i i kumu botonge munggile u manga hal᷊i ko mapia. Dang titong i kumu su Mawu Ruata l᷊ai sarung matamba l᷊ai.

¹¹ Mal᷊umbako dingang u kawasa, bou Mawu Ruata ko mawantughi, i kumu nipakatoghasi hakiu i kumu makatahang kaul᷊i u patiku kasasusa dingang masabari dang naung mal᷊uasi

¹² dang dingang u tarima kase si Yamang. Watu'u I Yamang e'e ko nukoa si kumu botonge manarima apa ko nisadia ngu Mawu Ruata su umati-E su l᷊al᷊ung u Kararatuang-E ko masua.

¹³ I Sie seng namilo i kite bou kawasa ko marundung dang nupangal᷊ing i kite su kararatuang u Ahus-E ko nikindaghi-E.

¹⁴ Bou Ahus-E e'e i kite nipakal᷊iwiri; mangal᷊enge manga dosa ngi kite seng niampungang.

I Kristus dang hal᷊i-E

¹⁵ I Kristus e'e gambari ko mal᷊ahe bou watangeng u Mawu Ruata ko ta ikawua; I Kristus ko ana ko kaiyakanenge, lebe kahimotongange bou patiku ko niriadi.

¹⁶ Watu'u bo I Sie Mawu Ruata nundiadi patiku kaul᷊ie su sorga l᷊au u su wawo u dunia, patiku kaul᷊i u ikawua dang ko ta ikawua nataho l᷊ai patiku Roh ko mangawasa dang ko mumarenta. Kaul᷊i u dunia i'i niriadi su l᷊iung I Kristus dang guna ngi Kristus.

¹⁷ Su horo u kaul᷊ie patiku ene, Kristus seng pai lebe horo ene. Dang watu i sie l᷊ai kuteu kaul᷊ie seng ene su tampae simbau-simbau.

¹⁸ I Sie nakoa timbo u badang-E; e'e ko jamaati. Watu'u I Sie pung u puwawiahi jamaati e'e. Ko I Sie ana ko kaiyakanenge, ko kahimotongange nipuwiahi sau bou papate, tadeau I Sie sisane l᷊ai ko makoa kahimotongange bou kaul᷊ie patiku.

¹⁹ Mawu Ruata sisanenge ko mo tadeau patiku kaul᷊ie ko ene su watangeng ngu Mawu Ruata, ko ene l᷊ai dingang nasuku su watangeng Ahus-E.

²⁰ Dang bou Ahus-E e'e l᷊ai Mawu Ruata namutusi guna ngu mukoa kaul᷊i u patiku makoa mapia dingang-E – maning ko su dunia, dang l᷊ai ko su sorga. Mawu Ruata mukoa e'e bou papateng Ahus-E su kau salipi.

²¹ Horo i kumu marau bou Mawu Ruata. I kumu nusudu si Sie watu'u kakanoa dang sipirang i kumu ko dal᷊ai.

²² Kateho orasi i'i, dingang u papate ngu Ahus-E, Mawu Ruata nupukauhi kumu dingang I Sie nakoa sau mapia. Dingang l᷊al᷊eng e'e i kumu botonge niwawa mupasaruang u Mawu Ruata su l᷊al᷊ung kakakoa ko susi, mabursi dang takoae kurange.

²³ Watu'u i kumu matatapi satia mangimang dang dumarisi matoghasi su pangangimang i kumu. Kumbahang sarang i kumu mamilo pul᷊aharapi ko seng nionggo si kumu su tempo i kumu nanarima Habari Mapia bou Mawu Ruata. Habari e'e seng nihabari suapang taumata su kaul᷊i u dunia. Dang watu'u e'e l᷊ai ia, I Paulus, seng nakoa paparentang.

Hal᷊i i Paulus su Jamaati

²⁴ Su tempo i'i ia sadia mutatahang u susa guna ngi kumu. Watu'u dingang u kasasusaku, ia mupakasuku apang ko mborong tanggongang I Kristus guna ngu jamaati-E, e'e ko badang-E.

²⁵ Mawu Ruata nundoi si sia nakoa mutangkiang jamaati-E guna ngi kumu. Ia mambeng mumbawa Habari bou Mawu Ruata, kaul᷊ie;

²⁶ Habari ko seng hasue su taunge ko nal᷊iu karareso su Mawu Ruata su kaul᷊i u taumata, arawe su tempo i'i nipakal᷊ahe su umati-E.

²⁷ Su umati-E e'e Mawu Ruata mo mupakal᷊ahe kirapa kapiange dang kawantughi rahasia-E e'e guna ngu kaul᷊i u taumata. Rahasia-E e'e ko Kristus ene su l᷊al᷊ung u watangeng i kumu, ko mangal᷊enge i kumu nakanteng kawawantughi u Mawu Ruata.

²⁸ I Kristus e'e ko ihabari kami su patiku taumata. I kami taumata mangonggo ingati dang manintiro si sire kaul᷊ie dingang u patiku kapapilesa. Pandung i kami tadeau apang taumata botonge mawawa sarang koa u Mawu Ruata kere taumata ko matilang su l᷊al᷊ung u pangangimang, watu'u seng nasimbau dingang I Kristus.

²⁹ Tadeau makarating hal᷊i e'e ia muhal᷊i matoghasi. Ia muhal᷊i dingang u kaul᷊i u katatoghasi ko nionggo I Kristus si sia dang ko nuhal᷊i su l᷊al᷊ung u watangengku dingang napene kawasa.