IMAMAT 1 - BUKI SUSI Wahasa ngu Taghul᷊andang l᷊ou-l᷊ou

Korbang Tongkateng

¹ Bou Kema-E, Mawu nukui si Musa dang nangonggo si sie manga atorang

² ko mambeng pakituhuke su tau Israel. Boko singkatau mangonggo sasumba binatang guna ngu korbang tutungang su Mawu, i sie botonge mangonggo sasumba sapi, domba arako kambinge.

³ Boko sasumba sapi simbau, binatang e'e mambeng ko ese dang takoae kurange. Sapi e'e mambeng iwawae sarang tukari u Kema ngu Mawu, tadeau Mawu manarima tau e'e.

⁴ Bou e'e i sie mambeng manimbo l᷊ima nge su wawo u timbo u binatang e'e, kuteu sasumbange sarung itarima u Mawu guna ngu pangangampung dosange.

⁵ Bou e'e sapi e'e mambeng ihata su saruang u tukari u Kema. Dahange mambeng isumba ngu manga imam hintou ngi Harun su Mawu, bou e'e isiwohi su sindihange pa u mesba su saruang u tukari u Kema.

⁶ Bou e'e taumata e'e mambeng mamuni l᷊au mangangohe binatang e'e.

⁷ Manga imam mambeng mundiko putung su wawo u mesba bou e'e manusung kau ko iriko su wawoe.

⁸ Manga kakompeng u korbang, nasu su l᷊al᷊unge timbo l᷊au tawange mambeng ipilo i sire su wawo u putung.

⁹ Bou e'e tau e'e mambeng manguhasi tataho u tiang l᷊au pang u sapi e'e, dang imam ko kapuhal᷊ie mambeng manongka kaul᷊i u e'e. Raruru ngu korbang tongkateng e'e makal᷊uasi naung u Mawu.

¹⁰ Boko ionggo sasumba domba simbau arako kambing, binatang e'e mambeng ko ese dang takoae kurange.

¹¹ Taumata e'e mambeng muhata binatang e'e su simbuka ngu sawunahi u mesba, bou e'e manga imam mambeng maniwohi u dahange su sindihange pa su mesba.

¹² Suapang binatang e'e mbuae nikakompeng, kaul᷊i u kompenge, nasu l᷊al᷊ung u timboe l᷊au tawange, mambeng itimbo ngu imam su wawo u putung su mesba.

¹³ Bou e'e tau e'e mambeng manguhasi tataho u tiange l᷊au pang u binatang e'e. Bou e'e imam mambeng mangonggo sasumba kaul᷊i u e'e su Mawu, dang manongka e'e su wawo u mesba. Raruru ngu korbang tutungang e'e makal᷊uasi naung u Mawu.

¹⁴ Boko ionggo sasumba burung simbau, mambeng burung tarkuku arako burung paluma ko makuda.

¹⁵ Imam mambeng mumbawa burung e'e sarang mesba, bou e'e muhisa l᷊ehie dang mutongka timboe su wawo u mesba. Daha ngu burung e'e mambeng puhu pasuwang su sindihang u mesba.

¹⁶ Tampa u kange dingang u kaul᷊i u tahoe mambeng pasuwang, bou e'e irume su simbuka ngu raki bou mesba su tampa u awu.

¹⁷ Bou e'e burung e'e mambeng ighehe su wanggili u tatilae, kateho tatilae kumbahang sarang mabusu. Bou e'e burung e'e mambeng itongka su wawo u mesba. Raruru ngu korbang tongkateng e'e makal᷊uasi naung u Mawu.