IBRANI 1 - BUKI SUSI Wahasa ngu Taghul᷊andang l᷊ou-l᷊ou

Mawu Ruata nudidato bou l᷊al᷊ung u Ahus-E

¹ Su tempo horo Mawu Ruata masau nudidato su manga i upung i kite bou mohong u manga nabi dingang u haghi ngu kakakoa-E.

² Arawe su tempo samuri i'i I Sie nudidato si kite bou l᷊al᷊ung u Ahus-E. Bou Ahus-E i'i Mawu Ruata nundiadi l᷊angi dingang u dunia. Dang Mawu Ruata seng nanantu himoneu Ahus-E i'i l᷊ai pia haki-E managhuang kaul᷊i u patiku.

³ Seng I Sie nupusinang u kawawantughi u Mawu Ruata ko masua-sua. Seng I Sie gambari ko mal᷊ahe bou watangeng u Mawu Ruata sisane. Seng I Sie l᷊ai ko namal᷊ihara kasasimbau u dunia i'i dingang u didato-E ko tumaniu makawasa. Suapang I Sie nupul᷊iwiri taumata bou apang dosa ngi sire, I Sie nukumangiang su kararatuang su sorga dingang u Mawu Ruata, Mangangawasa ko karangetange.

Kawawantughi Ahusi Mawu Ruata

⁴ Ana e'e nakarea kakangianeng ko marau lebe marange bou malaikati, l᷊au areng ko nionggo u Mawu Ruata si Sie l᷊ai marau lebe iadateng bou areng ko nionggo su malaikati.

⁵ Ta sarang paghisa Mawu Ruata nangul᷊i kiri'i su singkatau malaikati, “I Kau ko Ana-Ku; su l᷊ou i'i Ia nakoa i Yamang-U.” Ta sarang paghisa l᷊ai Mawu Ruata nangul᷊i kiri'i hal᷊i u malaikati maneng l᷊ai malaikati sude'e, “Ia sarung makoa Yamang-E, dang I Sie sarung makoa Ana-Ku.”

⁶ Arawe su tempo Mawu Ruata nundoi Ahus-E ko iyakang sarang dunia i'i, Mawu Ruata nangul᷊i kiri'i, “Kaul᷊i u malaikati u Mawu Ruata mambeng manumba Ana e'e.”

⁷ Hal᷊i u manga malaikati, Mawu Ruata nangul᷊i kiri'i, “Mawu Ruata nukoa apang malaikati-E nakoa anging, dang manga paparentang-E nakoa henang u putung.”

⁸ Arawe su Ana e'e Mawu Ruata nangul᷊i, “Kararatuang-U, o Mawu Ruata, sarung kakal sarang kal᷊iwuenge! Pamarentahang-U ko pamarentahang ko maadili.

⁹ I Kau mo ko maadili, dang mubinsi ngu ko ta mutatahino; e'e sabapie Mawu Ruata, Mawu Ruata-Ngu, namile si Kau dang nangonggo si Kau adati ko makasongo kal᷊al᷊uasi, namal᷊iu bou manga ghawe-Ngu.”

¹⁰ Mawu Ruata nangul᷊i l᷊ai, “I Kau Mawu su panitakenge nundiadi dunia, dang I Kau sisane nukoa l᷊angi.

¹¹ Kaul᷊ie e'e sarung maparung, dang makoa ko tuwei kere pakeang; arawe I Kau ta sarung muwal᷊u.

¹² Kal᷊abo u dunia i'i sarung il᷊ukuhi-U kere l᷊aku, dang sarung ighanti-U dingang ko wal᷊inge Arawe I Kau ta sarung muwal᷊u, dang puwawiahi-U ta sarung mahupusi.”

¹³ Mawu Ruata ta sarang paghisa nangul᷊i kiri'i su manga singkatau malaikati, “Kangiangte su kuaneng-Ku, sarang manga roka-U Daku i pakawata si Kau.”

¹⁴ Boko kere'e, manga malaikati e'e ko apa i sire? I sire e'e manga roh ko mutatangkiang Mawu Ruata, dang ko niroi u Mawu Ruata guna ngu mutul᷊ung apang taumata ko sarung manarima kasasal᷊amati.