HOSEA 1 - BUKI SUSI Wahasa ngu Taghul᷊andang l᷊ou-l᷊ou

¹ Ko i'i tatanata ko nionggo u Mawu si Hosea ana i Beeri su tempo ngu kararatuang u Yehuda niparenta ngi Ratu Uzia, i Yotam, i Ahas, l᷊au i Hizkia, dang kararatuang u Israel niparenta ngi Yerobeam ana i Yoas.

Kawing l᷊au manga ana i Hosea

² Su tempo ngu Mawu kahimotongange nuhengetang su bangsa Israel bou watangengku, Mawu nuhengetang, “Hosea, pukawingko dingang u singkatau kowawine ko dal᷊ai, dang manga ana u l᷊ai sarung makoa kere i sie. Umati-Ku musul᷊ung kere kawingu e'e; i sire ta masatia si Sia, dang manintang u Ia.”

³ Kuteu ia nukawing dingang u singkatau kowawine arenge i Gomer ana i Diblaim. Suapang i sie nahinding u ana i kami ko iyakang, singkatau ana ko ese,

⁴ Mawu nuhengetang si sia, “Sighoko areng u ana u e'e i Yizreel, watu'u ta mal᷊iwue l᷊ai Ia sarung muhukung ratu ngu Israel ual᷊ingu pamamate ko nikoa i Yehu, i upunge su Yizreel. Ia sarung manginsue pamarentahang u hintou ngi Yehu.

⁵ Su tempo e'e su Wal᷊ang u Yizreel Ia sarung munggaghoro katatoghasi u sordado ngu Israel.”

⁶ Mbuhue kawingku e'e nahinding ana i kami karuange, singkatau ana kowawine. Mawu nuhengetang si sia, “Hosea, sighoko areng u ana u e'e ‘i Ko Ta Ikindaghi’, watu'u Ia sarung ta mukumindaghi l᷊ai su bangsa Israel dang sarung ta mangonggo u ampunge si sire.

⁷ Arawe bangsa Yehuda sarung Daku kindaghitang. Ia Mawu Ruata ngi sire, sarung manal᷊amati si sire, kateho wal᷊inge dingang u parang, wal᷊inge l᷊ai dingang u pera arako papiti arako kawal᷊o l᷊au sumasakenge.”

⁸ Suapang ana i kami karuange nigha bou susu, kawingku sau pia kal᷊uwaenge bou e'e nahinding singkatau ana ko ese.

⁹ Mawu nuhengetang si sia, “Sighoko areng u ana u e'e ‘i Wal᷊inge Umati-Ku’, watu'u tau Israel wal᷊inge umati-Ku, dang Ia wal᷊inge Mawu Ruata ngi sire.”

Israel sarung sau ikoa pakapia

¹⁰ Bangsa Israel sarung makoa kere nei su sasi ul᷊ie, hakiu ta ikapatehi arako ta ikarekeng. Orasi i'i Mawu Ruata nuhengetang si sire, “I kumu wal᷊inge umati-Ku,” kateho sarung murating temponge Ia sarung muhengetang si sire, “Ko Ia Mawu Ruata ko wiahi dang i kumu e'e ana-Ku!”

¹¹ Bangsa Yehuda l᷊au bangsa Israel sarung sau ipakasimbau. I sire sarung muhengke singkatau pangaha, dang i sire sarung makoa ko l᷊abo dang muwiahi mapia su wanua ngi sire. Tingari, l᷊ou ngu Yisreel sarung makoa l᷊ou ko l᷊abo!